తిరుపతిలో ఆంక్షలు కఠినం.. బైక్ పై వెళ్లే ఇద్దరికీ హెల్మెట్ ఉండాల్సిందే

తిరుపతి జిల్లాలో ఈ నెల 15 వ తేదీ నుంచి నో హెల్మెట్.. నో పెట్రోల్ ( No helmet, no petrol ) ఆంక్షలు అమలులోకి తెచ్చారు. అంతకు పది రోజుల ముందు నుంచే జిల్లాలోని ప్రధాన పట్టణాలతో పాటు, మండల కేంద్రాల్లో కూడా పోలీసు అధికారులు, సిబ్బంది విస్తృతంగా ప్రజలకు అవగాహన కార్యక్రమాలు నిర్వహించారు. ఇంధన సంస్థల ప్రతినిధులకు కూడా సూచనలు చేశారు. పెట్రోల్ బంకుల వద్ద సీఐ స్థాయి అధికారి సారధ్యంలో ద్విచక్ర వాహనదారులకు అవగాహన కల్పించారు.

వాహనదారుల ప్రాణాలు కాపాడేందుకు ఆంక్షలు అమలు చేస్తున్న పోలీసులు, హెల్మెట్లను కూడా అందుబాటులోకి తెచ్చారు. ఐఎస్ఐ మార్కు కలిగిన వివిధ రకాల హెల్మెట్ల విక్రయానికి తిరుపతి పోలీస్ పెట్రోల్ బంకు వద్ద ఎస్పీ ఎల్. సుబ్బారాయుడు ఓ కేంద్రం ప్రారంభించారు. ఈ కార్యక్రమంలో అదనపు ఎస్పీ రవిమనోహరాచారి , డీఎస్పీలు రామక్రిష్ణచారి (ట్రాఫిక్ ), భక్తవత్సలం (తిరుపతి డీఎస్పీ), చంద్రశేఖర్ ( ఏఆర్), సీఐలు, ఎస్ఐలు హాజరయ్యారు.