తిరుమలలో గరుడోత్సవం.. తిరుపతిలో యాత్రిక నరకం..

అనూహ్యమైన ఆంక్షలతో తిరుమలకు రద్దీ నియంత్రణకు అవకాశం కల్పిస్తున్నట్లు వాతావరణం కనిపిస్తోంది. ఆదివారం మధ్యాహ్నానికే తిరుమల శ్రీవారి ఆలయ మాడవీధులు యాత్రికులతో కిక్కిరిసినట్లు సమాచారం అందుతోంది. గ్యాలరీల్లో తొక్కిసలాటకు ఆస్కారం లేకుండా ఇనుప బారికేడ్లతో కాంపార్టుమెంట్లు ఏర్పాటు చేసింది. నాలుగు వైపులతో పాటు శ్రీవారి ఆలయానికి ఎదురుగా ఉన్న సువిశాల మైదానంలో బేడి ఆంజనేయస్వామి వారి ఆలయం వరకు టీటీడీ లెక్కల ప్రకారం 1.80 లక్షల మంది కూర్చేనే అవకాశం ఉంది.

"ఈసారి బ్రహ్మోవాలకు ఆరు వేల మంది పోలీసులు విధుల్లో ఉంటారు. టీటీడీ విజిలెన్స్ విభాగంలోని 1,500 మందికి సిలిల్ పోలీసులు అదనం. గరుడోత్సవం రోజు అదనంగా 1300 మంది పోలీసులు బందోబస్తులోకి వస్తారు" అని టీటీడీ ఈఓ అనిల్ కుమార్ సింఘాల్ స్పష్టం చేసిన విషయం తెలిసిందే. ఆ మరకే తిరుపతి చేరుకున్న రాయలసీమ, నెల్లూరు, ఇతర జిల్లాల పోలీసులు రంగంలోకి దిగారు.

తిరుమలలో గరుడోత్సవం నేపథ్యంలో నగరంలోని ఇస్కాన్ ఆలయం మైదానం, అలిపిరి వద్ద ఉన్న భూదేవి కాంప్లెక్స్ ఆవరణలో ఉన్న ఏపీఎస్ఆర్టీసీ బస్టేషన్, ఎనిమిది కిలోమీటర్ల దూరంలో జూపార్కుకు సమీపంలో ఇంద్రలోక్ కాంప్లెక్స్ వద్ద వాహనాల పార్కింగ్కు కేటాయించిన ప్రాంతంలో పరిస్థితిని 'ఫెడరల్ ఆంధ్రప్రదేశ్' ప్రతినిధి పరిశీలించిన సమయంలో ఏమి కనిపించిందంటే.. ఆ ప్రదేశాలన్నీ వందలాది బస్సులు, కార్లు, ద్విచక్ర వాహాలతో నిండిపోయి కనిపించింది.

తిరుమలతో పాటు తిరుపతిలో కూడా భారీ భద్రత కల్పించారు. అందులో ప్రధానంగా చీమ కదిలిన తెలిసే విధంగా యాత్రికుల భద్రతను దృష్టిలో ఉంచుకుని 300 సీసీ కెమెరాలు ఏర్పాటు చేశారు. గత పదేళ్లతో పోలిస్తే బ్రహ్మోత్సవాల్లో ద్విచక్రవాహనాలు కూడా అనుమతించేవారు. యాత్రికుల సంఖ్య పెరిగిన నేపథ్యంలో గరుడోత్సవానికి ముందు రోజు నుంచి మరుసటి రోజు వరకు అంటే 48 గంటలపాటు బైక్ లు అనుమతించని విధానం వైసీపీ ప్రభుత్వంలో అదనపు ఈఓగా ఉన్న ఏవీ.ధర్మారెడ్డి ఆంక్షలు అమలులోకి తెచ్చారు. ద్విచక్ర వాహనాల పార్కింగ్ కు అలిపిరి సమీపంలోని భూదేవి కాంప్లెక్స్ వద్ద టీటీడీ ఇంజినీరింగ్ విభాగం ద్వారా ప్రత్యేక బారికేడ్లు ఏర్పాటు చేసే విధానం అమలులోకి తెచ్చారు. విపరీతమైన ఆంక్షల నేపథ్యంలో రెండేళ్ల కిందటి బ్రహ్మోత్సవ వేళ బైక్ పార్కింగ్ బోసిపోయింది. దీంతో తీవ్ర విమర్శలు చెలరేగాయి. అయినా,

యాత్రికుల భద్రతను దృష్టిలో ఉంచుకుని అమలు చేసిన విధానం మంచి ఫలితాలే ఇచ్చింది. అలిపిరి వద్ద ఆదివారం ఉదయం నుంచి ప్రస్తుతం పరిస్థితి గమనిస్తే, వేలాది బైక్ లతో కంపార్టుమెంట్లు నిండిపోయాయి.

బ్రహ్మోత్సవాల కోసం యాత్రికులకు ఇబ్బంది లేకుండా ఈ సంవత్సరం 435 బస్సులు నడుపుతున్నట్లు ఏపీఎస్ఆర్టీసీ రిజనల్ మేనేజర్ జగదేశ్ చెప్పారు. గత ఏడాది ఆ సంఖ్య 400 మాత్రమే. గరుడోత్సవం రోజు మూడు వేల ట్రిప్పులు తిప్పారు.

ఆదివారం మధ్యాహ్న అలిపిరి బస్టాండ్ వద్ద బస్సుల కోసం పెద్ద సంఖ్యలో యాత్రికులు నిరీక్షిస్తూ కనిపించారు. బస్సుల్లో ఎక్కడానికి తీవ్రంగా తాపత్రయపడ్డారు. వారిని నియంత్రించే దిక్కులేకుండా పోయిన పరిస్థితి కనిపించింది.

గరుడోత్సవం చూసి, తిరుమల నుంచి తిరిగి వచ్చే యాత్రికులను తిరుపతి సెంట్రల్ బస్టాండ్ వరకు తరలించడానికి ఉచితంగా ఆర్టీసీ బస్సులు ఏర్పాటు చేశారు.

అలిపిరి బైపాస్ మార్గంలోని జూపార్కుకు సమీపంలో అంటే ఐదు కిలోమీటర్ల దూరంలో తమిళనాడు, కర్ణాటక రాష్ట్రాల నుంచే కాకుండా, ఆ రాష్ట్రాల సరిహద్దుల్లోని ఆంధ్రలోని పట్టణాల నుంచి కూడా భారీ సంఖ్యలో బస్సుల్లో వచ్చారు. ఆ బస్సులన్నీ అక్కడే పార్కింగ్ చేయించారు. సిబ్బందికి భోజన సదుపాయం కల్పించడానికి టీటీడీ మొదటిసారి ప్రత్యేక ఏర్పాట్లు చేసింది.

"చాలా మంచిగా కష్టాలు పెడుతున్నారు సార్. అని వ్యంగ్యంగా వ్యాఖ్యానించారు. మేమే మొదటిసారి తిరుమలకు రాలేదు. ఇంతకుముందెప్పుడూ ఈ పరిస్థితి చూడలేదు. తిరుమలలో ఏమో కానీ గరుడోత్సవం తిరుపతిలోనే కనిపిస్తోంది" అని ఆవేదన చెందారు. తిరుపతి నగరంలో అంతర్భాగంగా ఉన్న ఇస్కాన్ టెంపుల్ మైదానం కార్లు, ఇతర వాహనాలతో నిండిపోయింది. ఈ ప్రదేశంలోనే కొందరు పోలీసులు యాత్రికులపై బూతు పంచాంగం వినిపించిన ఘటన చోటు చేసుకుంది.

తిరుమల గరుడోత్సవం రోజు గతంలో ఎన్నడూ లేని విధంగా ఏర్పాటు చేసిన బందోబస్తు ఏర్పాట్లు ఔరా అనిపించే విధంగానే కనిపిస్తున్నాయనడంలో సందేహం లేదు. ప్రొటోకాల్, ఇతర వీఐపీలు వారి సిఫారసులతో మాత్రమే సొంత వాహనాలను తిరుమలకు అనుమతించడం కనిపించింది.