జగన్కు తీవ్ర జ్వరం..పర్యటనలు రద్దు
మంగళవారం పులివెందులలో ప్రజా దర్బార్ నిర్వహించిన జగన్ ప్రజల నుండి వినతులను స్వీకరించారు.
ప్రస్తుతం కడప జిల్లా పులివెందుల పర్యటనలో ఉన్న వైఎస్సార్ కాంగ్రెస్ పార్టీ (వైఎస్సార్సీపీ) అధినేత, ఆంధ్రప్రదేశ్ మాజీ ముఖ్యమంత్రి వైఎస్ జగన్ మోహన్ రెడ్డి బుధవారం (డిసెంబర్ 24, 2025) అస్వస్థతకు గురయ్యారు. వైఎస్సార్సీపీ కార్యాలయం వెల్లడించిన తాజా సమాచారం ప్రకారం.. వైఎస్ జగన్ తీవ్రమైన జ్వరంతో బాధపడుతున్నారు. వైద్యుల సలహా మేరకు ఆయన విశ్రాంతి తీసుకోవాలని నిర్ణయించుకున్నారు. దీనివల్ల బుధవారం పులివెందులలో జరగాల్సిన ఆయన పర్యటన, ఇతర కార్యక్రమాలన్నీ రద్దయ్యాయి.
మునుపటి షెడ్యూల్:
ఇది వరకు ప్రకటించిన షెడ్యూల్ ప్రకారం వైఎస్ జగన్ బుధవారం ఉదయం పులివెందుల నుండి ఇడుపులపాయకు వెళ్లి క్రిస్మస్ ప్రత్యేక ప్రార్థనల్లో పాల్గొనాల్సి ఉంది. మధ్యాహ్నం తిరిగి పులివెందులకు చేరుకుని భాకరాపురం క్యాంప్ ఆఫీస్లో 'ప్రజా దర్బార్' నిర్వహించాల్సి ఉంది. అస్వస్థత కారణంగా ఈ కార్యక్రమాలన్నీ వాయిదా పడ్డాయి. ఆరోగ్యం కుదుటపడిన తర్వాత తిరిగి పర్యటన వివరాలను పార్టీ వెల్లడించే అవకాశం ఉంది. అయితే మంగళవారం (డిసెంబర్ 23) ఆయన పులివెందులలో ప్రజా దర్బార్ నిర్వహించి, ప్రజల నుండి వినతులను స్వీకరించిన విషయం తెలిసిందే.