పల్లెలకు ఏసీ బస్సులు

సాధారణంగా ఏసీ సౌకర్యం కేవలం సుదూర ప్రాంతాలకు వెళ్లే సూపర్ లగ్జరీ, ఇంద్ర లేదా గరుడ బస్సులకే పరిమితం అనే భావనను మార్చాలని సీఎం అభిప్రాయపడ్డారు. గ్రామీణ ప్రాంత ప్రజలకు కూడా తక్కువ ధరలో అత్యుత్తమ ప్రయాణ అనుభవాన్ని అందించాలన్నదే ప్రభుత్వ లక్ష్యమని ఆయన పేర్కొన్నారు. పర్యావరణ హితం కోరుతూ కాలుష్యాన్ని తగ్గించేందుకు పెట్రోల్, డీజిల్ బస్సుల స్థానంలో దశలవారీగా ఎలక్ట్రిక్ బస్సులను పెంచాలని నిర్ణయించారు. నాణ్యతకు పెద్దపీట వేయాలని సూచించారు.

కొత్తగా కొనుగోలు చేసే ప్రతి ఈవీ బస్సులో అత్యాధునిక హంగులు, సౌకర్యవంతమైన సీటింగ్ ఏసీ ఉండాలి. నష్టాల్లో ఉన్న ఆర్టీసీని లాభాల బాటలోకి తెచ్చేందుకు సాంకేతికతను జోడించాలని, ప్రయాణికులను ఆకర్షించేలా సేవల నాణ్యత పెంచాలని సూచించారు. ఏసీ సౌకర్యం కల్పించినప్పటికీ, సామాన్యులపై భారం పడకుండా చార్జీల విషయంలో సమతుల్యత పాటించాలని అధికారులను ఆదేశించారు. సీఎం ఆదేశాలతో ఆర్టీసీ అధికారులు కొత్త ఈవీ బస్సుల డిజైన్, కొనుగోలు ప్రక్రియలో మార్పులు చేయనున్నారు. పల్లె వెలుగు బస్సుల్లో సైతం ఏసీ రానుండటంపై గ్రామీణ ప్రాంత ప్రయాణికులు హర్షం వ్యక్తం చేస్తున్నారు. ఆర్టీసీని దేశంలోనే అత్యుత్తమ రవాణా సంస్థగా తీర్చిదిద్దేందుకు అవసరమైన ప్రణాళికలు సిద్ధం చేయాలని సీఎం చంద్రబాబు అధికారులను ఆదేశించారు.