రుషికొండ ప్యాలెస్‌ను కార్పొరేట్లు తన్నుకుపోతారా?

రుషికొండ ప్యాలెస్‌! ఇటీవల కాలంలో పరిచయం అక్కర్లేని, పేద, ధనిక వర్గాల్లో అదే పనిగా నానుతున్న పేరిది. వైఎస్సార్‌సీపీ హయాంలో నిర్మించిన ఈ అత్యంత అధునాతన భవంతి కూటమి ప్రభుత్వం వచ్చాక వివాదాల్లో చిక్కుకుంది. ఈ ప్యాలెస్‌ను ఏం చేయాలన్న దానిపై కూటమి సర్కారు ఏడాదిన్నరగా ఎటూ తేల్చుకోలేక పోతోంది. ఎమ్మెల్యేలు, ఎంపీలు, మంత్రుల నుంచి ముఖ్యమంత్రి వరకు ఈ భవంతిలోకి వెళ్లడం, రావడం, వెళ్లినప్పుడల్లా వైఎస్సార్‌సీపీ అధినేత, మాజీ ముఖ్యమంత్రి వైఎస్‌ జగన్‌మోహన్‌రెడ్డిపై విమర్శలు గుప్పించడం, త్వరలోనే ఏదో నిర్ణయం తీసుకుంటామని ప్రకటించడం షరా మామూలై పోయింది. ప్రజ ల అభిప్రాయం, నిపుణుల సూచనల మేరకు నడుచుకుంటామని ఒకసారి, మంత్రుల కమిటీ చర్చిస్తుందని మరోసారి చెబుతూ వస్తోంది. కానీ అంతకు మించి ఒక్క అడుగూ ముందుకు వేయలేకపోతోంది. ఈ ప్యాలెస్‌ నిర్వహణను గాలికొదిలేసింది. దీంతో ఆ భవన సముదాయంలోని కొన్ని బిల్డింగుల పైకప్పు (సీలింగ్‌) పెచ్చులూడి పడిపోతోంది. క్రమంగా శిథిలావస్థకు చేరుకుంటోంది. అంతేకాదు.. లోపల రూ.కోట్ల విలువ చేసే ఫర్నిచరు కూడా నిరుపయోగంగా ఉండడంతో తుప్పు పడుతోంది. ఇటీవల ఉప ముఖ్యమంత్రి పవన్‌ కల్యాణ్‌ రుషికొండ ప్యాలెస్‌ను సందర్శించినప్పుడు దాని దుస్థితి బయట ప్రపంచానికి తెలిసింది. దీంతో ప్రజల నుంచి వస్తున్న విమర్శల నేపథ్యంలో ప్రభుత్వం ఎట్టకేలకు మంత్రుల కమిటీని నియమించింది.

కళ్లు మిరుమిట్లు గొలిపే భవంతి లోపల భాగం