తండ్రి గుండెల్లో గువ్వల సవ్వడి, పంట చేలో పిట్టల సందడి..

పాలేటి శివాజీది రాజంపేటకు సమీపంలోని సింగనవారిపల్లె. ఊరిలో అతనికి ఓ అన్న, అక్క బావ ఉన్నారు. శివాజీ తండ్రి వెంకటసుబ్బయ్య సంవత్సర కిందట చనిపోయారు. సింగనవారిపల్లె వద్ద వారికి రెండెకరాల పొలంలో అరటి తోట ఉండేది. పంట కాలం పూర్తి కావడంతో చదును చేశారు. 75 రోజుల కిందట ఆ రెండెకరాల్లో సజ్జలు, జొన్నలు సాగు చేసి, పక్షుల కోసం ఆహారంగా వదిలివేశారు. ప్రస్తుతం అక్కడి పరిస్థితి గమనిస్తే ఒకటి కాదు, రెండు కాదు వందల సంఖ్యలో అనేక రకాల పక్షులు, సెల్ ఫోన్ రేడియేషన్ వల్ల అదృశ్యమైన గువ్వలు కూడా గుంపులు గుంపులుగా కిలకిల రావాలతో సందడి చేస్తున్నాయి. పంటను ఇలా పక్షులకు వదిలివేయడంపై పాలేటి శివాజీ ఏమంటారంటే...

సేంద్రియ పద్ధతిలో సాగు చేసిన మిల్లెట్స్ తినడం వల్ల మనుషుల ఆరోగ్యం పదిలంగా ఉంటుందనే విషయం గుర్తించారు. పెద్దపెద్ద హోటళ్లలో కూడా మిల్లెట్స్ ఆహారం తీసుకోవడానికి చాలామంది ఆసక్తి చూపిస్తున్నారు. పక్షులు కూడా ఇలాంటి ఆహారమే తీసుకోవాలని పాలేటి శివాజీ భావించారు. రసాయనాలు ప్రధానంగా ఎరువులు లేకుండా సజ్జ పంట సాగు చేస్తున్నారు. వ్యవసాయ శాస్త్రవేత్తలు చెప్పే మాటలను అర్థం చేసుకున్న ఆయన ఎరువుల జోలికి వెళ్లడం లేదని అంటున్నారు.

రాజంపేట పట్టణానికి సమీపంలోని సింగనవారిపల్లె అనేక రకాల పక్షులకు ఆలవాలంగా మారింది. సజ్జ పంటను చూసి అక్కడి మేతకు వస్తున్న చిలుకల కిలకిల రావాలతో ఆ గ్రామం మొత్తం సందడి ఏర్పడింది. రకరకాల గువ్వలు కూడా ఎక్కడి నుంచో విహారయాత్రకు వచ్చినట్లు అక్కడి ప్రదేశం మారిపోయింది.

తిరుపతిలో వారాంతంలో రెండు రోజులు అందుబాటులో ఉంటూ నగరంలో ప్లాస్టిక్ వ్యర్ధాలను వేరు వేయించడంతోపాటు కపిలతీర్థం సమీపంలోని దివ్యారామంలో కూడా విద్యార్థులకు అవగాహన తరగతులు నిర్వహించారు. పాఠశాలలకు వెళ్లి విద్యార్థులను మరింత చైతన్యం చేశారు. తద్వారా అనేకమందిని ఈ యజ్ఞంలో భాగస్వామ్యం చేశారు. అటవీ ప్రాంతాల్లో సీడ్ బాల్స్ వేయడం, విద్యార్థులు యువతతో కలిసి కార్యక్రమాలలో పాల్గొనేలా చేస్తున్నారు.