కడపలో మహానాడు ద్వారా టీడీపీ వ్యూహాత్మక దాడి

వైఎస్ జగన్ ను వైఎస్ వారసునిగా కడప జిల్లా వాసులు గుర్తించారని చెప్పొచ్చు. ఎందుకంటే షర్మిల గత ఎన్నికల్లో ఏపీ కాంగ్రెస్ పార్టీ అధ్యక్షురాలు హోదాలో కడప ఎంపీగా పోటీచేసి పరాభవం చెందారు. పైగా ఆమెపై చాలా మంది జగన్ అభిమానులు విమర్శలు గుప్పించారు. సభల్లో సాధారణ కార్యకర్తలు పలు ప్రశ్నలతో నిలదీశారు. వాటన్నింటికీ సమాధానాలు చెప్పినా ఆమెను అక్కడి వారు అక్కున చేర్చుకోలేదు.

ఈ పరిణామాలన్నీ తమకు అనుకూలంగా మార్చుకున్న తెలుగుదేశం కడప జిల్లాలో గత ఎన్నికల్లో ఘన విజయం సాధించింది. ఎప్పుడూ లేనంతగా ఏడు నియోజకవర్గాల్లో ఎమ్యెల్యేలను గెలిపించుకుంది. కడపలో కూడా టీడీపీ ఎమ్మెల్యే గెలవడం తెలుగుదేశం పార్టీకి మరింత బాలాన్ని ఇచ్చింది. ఇదే అదనుగా భావించిన చంద్రబాబు నాయుడు మహానాడు కడపలో నిర్వహించాలనే నిర్ణయానికి వచ్చారు. అది సీఎం బాబు ఒక్కడి ఆలోచన కాదని, పొలిట్ బ్యూరో అంతా కలిసి నిర్ణయించిందని టీడీపీ వారు చెబుతున్నారు.

చంద్రబాబు మెజారిటీ తగ్గించాలనే ప్రయత్నం ఫెయిల్

ముఖ్యమంత్రి చంద్రబాబు నాయుడు ను కుప్పంలో ఓడించాలని, అది సాధ్యం కాకుంటే మెజారిటీ అయినా తగ్గించాలనే గట్టి ప్రయత్నం వైఎస్ జగన్ చేశారు. 2024 ఎన్నికల్లో ఈ మేరకు మంత్రులు, ఎమ్మెల్యేలు మండలాల వారీగా కుప్పం నియోజకవర్గంలో ఇన్చార్జ్ లుగా నియమించి చేసిన ప్రయత్నం విఫలమైంది. 2019లో వచ్చిన మెజారిటీ కంటే చంద్రబాబుకు ఎక్కువ మెజారిటీ వచ్చింది. అంటే చంద్రబాబును ఓడించేందుకు సేస్తున్న ప్రయత్నాలను ముందుగానే తెలుసుకున్న టీడీపీ తమ వంతు ప్రయత్నాలు చేసి వైఎస్సార్సీపీ వ్యూహాన్ని తిప్పి కొట్టారు.

ఒక పార్టీ నాయకుడిని ఓడించాలనే ప్రయత్నం ఇంతగా ఎప్పుడూ చేయలేదు

ఒక పార్టీకి అధ్యక్షుడిగా ఉన్న నాయకుడిని ఓడించాలనే ప్రయత్నం ఆంధ్రప్రదేశ్ రాజకీయ చరిత్రలో ఎప్పుడూ జరగలేదని చెప్పొచ్చు. ఎంతో మంది మహా మహులు ముఖ్యమంత్రులుగా పనిచేశారు. కర్నూలు నుంచి కోట్ల విజయభాస్కర్ రెడ్డి వంటి నాయకులు రాజకీయాల్లో దేదీప్యమానంగా వెలిగారు. అలాంటి నాయకులు పోటీ చేసిన చోట ప్రత్యర్థి పార్టీ నామినల్ పోటీగానే భావించేది. అలాగే పులివెందుల నుంచి వైఎస్ రాజశేఖర్ రెడ్డి ఎమ్మెల్యేగా పోటీ చేసిన ప్రతి సారీ తెలుగుదేశం పార్టీ నామినల్ గా పోటీలో ఉండేదే తప్ప ఓడించేందుకు సామ, దాన, బేధ, దండోపాయాలు ఉపయోగించిన సందర్భం లేదని చెప్పొచ్చు. అలాగే చంద్రబాబుపై కూడా వైఎస్ఆర్ ఎప్పుడూ ఓడించాలనే ప్రయత్నం చేయలేదు. కానీ ఆ ప్రయత్నం జగన్ చేశారు.

కడప, పులివెందుల నియోజకవర్గాలు వైఎస్ఆర్ కాంగ్రెస్ పార్టీ (వైఎస్ఆర్సీపీ)కి కంచుకోటగా ఉన్నాయి. ఈ ప్రాంతంలో వైఎస్ రాజశేఖర్ రెడ్డి, ఆ తర్వాత జగన్ మోహన్ రెడ్డి రాజకీయ వారసత్వం బలమైన పునాదులపై నిలిచి ఉంది. ఈ నేపథ్యంలో తెలుగుదేశం పార్టీ (టీడీపీ) వైఎస్ఆర్సీపీని బలహీనపరిచేందుకు కడప, పులివెందులలో చేస్తున్న ప్రయత్నాలు వ్యూహాత్మకంగా, దీర్ఘకాలిక లక్ష్యాలతో నడుస్తున్నాయని చెప్పొచ్చు.

మహానాడు నిర్వహణ ద్వారా రాజకీయ సందేశం

కడపలో మహానాడు నిర్వహణ అనేది ఒక ప్రధాన వ్యూహం. పులివెందుల జగన్ సొంత నియోజకవర్గం కావడం వల్ల, ఇక్కడ ఈ కార్యక్రమం నిర్వహించడం ద్వారా టీడీపీ తమ రాజకీయ ఉనికిని బలంగా చాటాలని భావిస్తోంది. ఈ కార్యక్రమం ద్వారా టీడీపీ కార్యకర్తల్లో ఉత్సాహాన్ని నింపడం, స్థానికంగా పార్టీ సంస్థాగత బలాన్ని పెంచడం జరుగుతుంది. వైఎస్ఆర్సీపీ ఆధిపత్యం ఉన్న ప్రాంతంలో టీడీపీ ఉనికిని ప్రజలకు చాటడం, తద్వారా వైఎస్ కుటుంబ ఏకఛత్రాధిపత్యానికి సవాలు విసరడం కూడా ఒక కారణంగా చెప్పొచ్చు. జగన్ సొంత గడ్డపై టీడీపీ బలప్రదర్శన చేయడం ద్వారా అతని రాజకీయ పలుకుబడిని ప్రశ్నించడం అవుతుంది.

స్థానిక నాయకత్వాన్ని బలోపేతం చేయడం

టీడీపీ కడప జిల్లాలో స్థానిక నాయకత్వాన్ని పటిష్టం చేసేందుకు ప్రయత్నిస్తోంది. గతంలో వైఎస్ కుటుంబం ఆధిపత్యం వల్ల టీడీపీకి బలమైన స్థానిక నేతలు తక్కువగా ఉండేవారు. ఇప్పుడు అలా కాదు. 2024 ఎన్నికల్లో జిల్లాలో ఏడు సీట్లు గెలిచిన నేపథ్యంలో, ఈ విజయాన్ని పునాదిగా చేసుకుని కొత్త నాయకులను ముందుకు తీసుకొచ్చే ప్రయత్నాలు జరుగుతున్నాయి. వైఎస్ఆర్సీపీలో అసంతృప్తితో ఉన్న స్థానిక నాయకులను టీడీపీలోకి ఆకర్షించేందుకు చర్చలు జరుపుతున్నట్లు సమాచారం. ఇది వైఎస్ఆర్సీపీ ఓటు బ్యాంకును బలహీనపరుస్తుంది.

ప్రభుత్వ పథకాలు, అభివృద్ధి కార్యక్రమాలు

టీడీపీ కూటమి అధికారంలో ఉన్నందున, కడప జిల్లాలో అభివృద్ధి పనుల ద్వారా ప్రజల విశ్వాసాన్ని గెలుచుకునేందుకు ఈ వ్యూహంలో భాగంగా రోడ్లు, నీటి సరఫరా, ఆరోగ్య సదుపాయాల వంటి అభివృద్ధి పనులకు ప్రాధాన్యత కూటమి ప్రభుత్వం ఇస్తోంది. స్థానిక యువతకు ఉపాధి కల్పించే పరిశ్రమల స్థాపనకు ప్రణాళికలు రూపొందిస్తోంది. వైఎస్ఆర్సీపీ హయాంలో అభివృద్ధిని నిర్లక్ష్యం చేశారనే విమర్శలను ఎదుర్కొనేందుకు ఉపయోగపడుతుంది. టీడీపీ సూపర్ సిక్స్ వంటి పథకాలను సమర్థవంతంగా అమలు చేయడం ద్వారా ప్రజల్లో వైఎస్ఆర్సీపీ సంక్షేమ పథకాలపై ఆధారపడే ధోరణిని తగ్గించే ప్రయత్నం కూడా జరుగుతోందని చెప్పొచ్చు.

వైఎస్ఆర్సీపీపై రాజకీయ ఒత్తిడి

వైఎస్ఆర్సీపీని రాజకీయంగా ఒత్తిడిలో ఉంచేందుకు తెలుగుదేశం పార్టీ కొన్ని నిర్దిష్ట నిర్ణయాలు తీసుకున్నట్లు సమాచారం. వైఎస్ఆర్సీపీ హయాంలో జరిగిన అవినీతి ఆరోపణలు, అభివృద్ధి వైఫల్యాలను ఎత్తిచూపడం ద్వారా జగన్ విశ్వసనీయతను దెబ్బతీసే ప్రయత్నం జరుగుతోంది. స్థానిక సంస్థల ఎన్నికల్లో గ్రామ పంచాయతీలు, మున్సిపాలిటీలలో వైఎస్ఆర్సీపీ ఆధిపత్యాన్ని సవాలు చేసేందుకు క్షేత్రస్థాయిలో ప్రణాళికలు రూపొందించారు. మునిసిపాలిటీల్లో సక్సెస్ అయినా జిల్లా పరిషత్ లు, మండల పరిషత్ లు, పంచాయతీల్లో సక్సెస్ కాలేక పోయారు.

సామాజిక సమీకరణలు

కడప జిల్లాలోని వివిధ కులాలు, సామాజిక వర్గాలను తమవైపు తిప్పుకునేందుకు లక్ష్యంగా ప్రచార కార్యక్రమాలు నిర్వహించడం తెలుగుదేశం పార్టీ మొదలు పెట్టింది. 2024 ఎన్నికల విజయాన్ని సద్వినియోగం చేసుకోవడం ద్వారా మరింత బలాన్ని జిల్లాలో పెంచుకునేందుకు టీడీపీ ప్రయత్నాలు చేస్తోంది. 2024 ఎన్నికల్లో కడప జిల్లాలో టీడీపీ కూటమి ఏడు సీట్లు గెలవడం ఒక ముఖ్యమైన మైలురాయి. ఈ విజయాన్ని ఆధారంగా చేసుకుని గెలిచిన నియోజకవర్గాల్లో తమ ఓటు బ్యాంకును మరింత బలోపేతం చేయడం, మిగిలిన ప్రాంతాల్లోకి విస్తరించడం వంటి కార్యక్రమాలు చేపట్టింది.

పులివెందులలో జగన్‌కు గట్టి పోటీ ఇచ్చిన టీడీపీ అభ్యర్థి బిటెక్ రవి ద్వారా స్థానికంగా తమ బలాన్ని పెంచే ప్రయత్నం చేస్తోంది. రాబోయే ఎన్నికల్లో ఈ పోటీని మరింత తీవ్రతరం చేయాలనే లక్ష్యంగా తెలుగుదేశం పార్టీ ముందుకు సాగుతోందని అర్థమవుతోంది.

వైఎస్సార్సీపీని బలహీన పరిచే కార్యక్రమాల్లో సక్సెస్ అయ్యే అవకాశం

టీడీపీ ఈ ప్రయత్నాల ద్వారా కడప, పులివెందులలో వైఎస్ఆర్సీపీని బలహీనపరచడంలో కొంతమేర విజయం సాధించే అవకాశం ఉంది. మహానాడు వంటి కార్యక్రమాలు రాజకీయ సందేశాన్ని బలంగా చాటుతాయి. అభివృద్ధి పనులు ప్రజల విశ్వాసాన్ని పెంచుతాయి. స్థానిక నాయకత్వం బలోపేతం వైఎస్ కుటుంబ ఆధిపత్యానికి సవాలు విసురుతుంది. ఇప్పటికీ వైఎస్ఆర్సీపీ ఇంకా బలమైన స్థానిక మద్దతు, భావోద్వేగ బంధాన్ని ప్రజలతో పెనవేసుకుని ఉందని చెప్పొచ్చు. టీడీపీ ఈ వ్యూహాలను సమర్థవంతంగా, నిరంతరంగా అమలు చేయగలిగితేనే వైఎస్ఆర్సీపీని భారీ స్థాయిలో దెబ్బతీయ గలదనేది రాజకీయ పరిశీలకుల మాట. ఈ ప్రయత్నాలు తాత్కాలిక ఒత్తిడిని సృష్టించినా దీర్ఘకాలిక మార్పును తీసుకురాకపోవచ్చు.

టీడీపీని బలోపేతం చేసే అవకాశం

కడప జిల్లా చారిత్రాత్మకంగా వైఎస్ రాజశేఖర్ రెడ్డి, ఆ తర్వాత జగన్ మోహన్ రెడ్డి నేతృత్వంలోని వైఎస్ఆర్సీపీకి కంచుకోటగా ఉంది. 2019 ఎన్నికల్లో జిల్లాలోని పది అసెంబ్లీ స్థానాలను వైఎస్ఆర్సీపీ కైవసం చేసుకుంది. అయితే 2024 ఎన్నికల్లో టీడీపీ కూటమి ఏడు సీట్లను గెలుచుకోవడం ద్వారా ఈ ఆధిపత్యానికి సవాలు విసిరింది. మహానాడు ను కడపలో నిర్వహించడం ద్వారా టీడీపీ తన కేడర్‌లో ఉత్సాహాన్ని నింపడమే కాకుండా, స్థానికంగా తమ పట్టును మరింత బలోపేతం చేసుకునే అవకాశాన్నిచేజిక్కించుకోవచ్చు. ఈ కార్యక్రమం విజయవంతంగా జరిగితే టీడీపీ జిల్లాలో తమ సంస్థాగత బలాన్ని పెంచుకోవడంతో పాటు, రాబోయే స్థానిక ఎన్నికల్లో మరింత పుంజుకునే అవకాశం ఉంది.

జగన్ మోహన్ రెడ్డి ప్రతిష్టపై ప్రభావం

జగన్ సొంత జిల్లా అయిన కడపలో టీడీపీ మహానాడు నిర్వహించడం రాజకీయంగా ఆయన ప్రతిష్టకు సవాలుగా మారవచ్చు. వైఎస్ఆర్సీపీ అధికారంలో ఉన్నప్పుడు కుప్పంలో చంద్రబాబును బలహీనపరిచేందుకు చేసిన ప్రయత్నాలకు ప్రతీకార చర్యగా దీనిని చూడవచ్చు. 2024 ఎన్నికల్లో పులివెందులలో జగన్ గెలిచినప్పటికీ, టీడీపీ అభ్యర్థి గట్టి పోటీ ఇచ్చారు. ఇప్పుడు మహానాడు ద్వారా టీడీపీ ఈ ప్రాంతంలో తమ ఉనికిని మరింత బలంగా చాటితే, జగన్ అజేయమైన ఇమేజ్‌కు గండి పడే అవకాశం ఉంది. వైఎస్ఆర్సీపీ స్థానికంగా ఇంకా బలమైన మద్దతు ఉంది కాబట్టి ఈ సభలు జగన్ ప్రతిష్టను పూర్తిగా దెబ్బతీయకపోవచ్చు. కానీ కొంతమేర ఒత్తిడిని సృష్టించవచ్చు.

కడప జిల్లా టీడీపీ చేతుల్లోకి పోయే అవకాశం?

కడప జిల్లా వైఎస్ఆర్ కుటుంబం నుంచి టీడీపీ చేతుల్లోకి పూర్తిగా పోతుందా అనేది పలు అంశాలపై ఆధారపడి ఉంటుంది. 2024 ఎన్నికల్లో టీడీపీ కూటమి జిల్లాలో ఏడు సీట్లు గెలవడం ఒక సానుకూల సంకేతం. మహానాడు నిర్వహణ దీనిని మరింత పటిష్టం చేసే అవకాశం ఉంది. అయితే వైఎస్ కుటుంబం రాజకీయ వారసత్వం, స్థానిక ప్రజలతో ఉన్న భావోద్వేగ బంధం ఇంకా బలంగా ఉన్నాయి. ఈ బంధాన్ని ఛేదించడం టీడీపీకి సులభం కాదు. జిల్లా పూర్తిగా టీడీపీ చేతుల్లోకి వెళ్లాలంటే కొన్ని కీలక అంశాలు సహకరించాలి.

1. టీడీపీ జిల్లాలో బలమైన స్థానిక నాయకత్వాన్ని నిర్మించుకోవాలి. గతంలో వైఎస్ కుటుంబంపై ఆధారపడిన ఓటర్లను ఆకర్షించేందుకు ప్రత్యామ్నాయ నాయకులను తయారు చేయాలి.

2. టీడీపీ కూటమి ప్రభుత్వం జిల్లాలో అభివృద్ధి పనులు, ఉపాధి అవకాశాలను సృష్టించడంలో విజయం సాధిస్తే, ప్రజల విశ్వాసాన్ని గెలుచుకోవచ్చు.

3. వైఎస్ఆర్సీపీలో అంతర్గత విభేదాలు లేదా జగన్ నాయకత్వంపై అసంతృప్తి పెరిగితే, టీడీపీ దానిని తమకు అనుకూలంగా మలచుకోవచ్చు.

4. వైఎస్ జగన్ సోదరి షర్మిల కూడా కడప జిల్లాలో కాంగ్రెస్ ను బతికించేందుకు తన ప్రయత్నాలు తాను చేస్తోంది. దానికి కూడా తెలుగుదేశం పార్టీ ఎదుర్కోవాల్సి ఉంటుంది.

5. ఎమ్మెల్యేలు అకారణంగా దూకుడుగా పోవడం ప్రజల్లో కొంత వ్యతిరేకతను తెచ్చే అవకాశం ఉంది. పార్టీలో పనిచేస్తున్న కార్యకర్తలకు ఎంతో కొంత ఆర్థిక తోడ్పాటు ఉంటుందనే ఆశతో చాలా మంది పనిచేస్తున్నారు. వారికి ఆర్థిక భరోసా కల్పిస్తే తప్ప టీడీపీ నిలదొక్కుకోవడం కష్టమని చెప్పొచ్చు.

సానుకూల ఫలితాలు అందుతాయా?

మహానాడు నిర్వహణ టీడీపీకి రాజకీయంగా సానుకూల ఫలితాలను అందించే అవకాశం ఉంది. కానీ ఇది వైఎస్ఆర్ కుటుంబం ఆధిపత్యాన్ని పూర్తిగా తొలగించే అవకాశం లేదని చెప్పొచ్చు. జగన్ ప్రతిష్ట కొంతమేర దెబ్బతినే అవకాశం ఉన్నప్పటికీ, స్థానిక బలం ఇంకా తగ్గలేదు. కడప జిల్లా టీడీపీ చేతుల్లోకి పోవాలంటే మహానాడు ఒక్కటే సరిపోదు, దీర్ఘకాలిక వ్యూహం, స్థిరమైన పనితీరు, వైఎస్ఆర్సీపీలో బలహీనతలు అవసరం. ప్రస్తుత పరిస్థితుల్లో ఈ పరిణామాలు టీడీపీకి ఊపునిస్తాయి. కానీ జిల్లాపై పూర్తి ఆధిపత్యం సాధించడం ఇంకా సవాలుగానే ఉంటుంది.