రోడ్ టెర్రర్: సంకీర్తనకు వెళ్లి వస్తూ.. ఆరుగురు ఇస్కాన్ భక్తుల మృతి..

అనంతపురం ఇస్కాన్ ఆలయానికి చెందిన ఆరుగురు తాడిపత్రికి వెళ్లారు. అక్కడ నగర సంకీర్తన ముగించుకున్న వారంతా ఒకే కారులో తిరిగి అనంతపురం బయలుదేరారు. వారి ప్రయాణిస్తున్న కారు సింగనమల మండలం నాయన పల్లి హైవే వద్ద వస్తుండగా టైరు పేలిపోయినట్లు సమాచారం అందింది. దీంతో అదుపుతప్పిన కారు ఎదురుగా వస్తున్న లారీని ఢీకొంది. ఈ ప్రమాదంలో కారు ముందు భాగం లారీ కిందికి దూసుకుపోయి నుజ్జునుజ్జయింది. దీంతో కారులో ప్రయాణిస్తున్న ఆరుగురు అక్కడికక్కడే ప్రాణాలు కోల్పోయారు. స్థానికులు అందించిన సమాచారంతో పోలీసులు ఘటనా స్థలానికి చేరుకున్నారు. ఈ ప్రమాదంలో మరణించిన వారిని అనంతపురం నగరంలోని ఇస్కాన్ టెంపుల్ కు చెందిన వారీగా గుర్తించారు. మరణించిన వారిలో సంతోష్, షణ్ముగ , వెంకన్న, శ్రీధర్, ప్రసన్న, వెంకీ ఉన్నారని గుర్తించినట్లు సమాచారం అందింది. వీరికి సంబంధించిన వ్యక్తిగత వివరాలు తెలియలేదు. ఈ ఘటనపై పోలీసులు కేసు దర్యాప్తు చేస్తున్నారు.