MADANAPALLI | మదనపల్లి: సబ్ కలెక్టరేట్ కు పూర్వవైభవం

చిత్తూరు జిల్లా ( అన్నమయ్య జిల్లా) మదనపల్లి సబ్ కలెక్టర్ కార్యాలయానికి మళ్లీ కళకళలాడుతుంది. బుధవారం నుంచి ఈ కార్యాలయంలో యధావిధిగా రెవెన్యూ పరిపాలన కార్యకలాపాలు ప్రారంభమయ్యాయి.

2024 జూలై 21వ తేదీ అర్ధరాత్రి (ఆదివారం) మదనపల్లి సబ్ కలెక్టర్ కార్యాలయంలో రెవెన్యూ రికార్డులు దద్దమైన విషయం తెలిసిందే. ఆ మరుసటి రోజు అంటే సోమవారం వేకువ జామున ఈ ఘటన వెలుగు చూసింది. ఈ సమాచారం అందుకున్న సీఎం చంద్రబాబు సీరియస్ గా స్పందించారు. ఆనాటి డీజీపీ ద్వారకా తిరుమలరావు, సిఐడి చీఫ్ రవిశంకర్ అయ్యన్నార్ ను వెంటనే మదనపల్లికి వెళ్లాలని ఆదేశించారు.

మదనపల్లి సబ్ కలెక్టర్ కార్యాలయంలో రికార్డులు దగ్ధమైన నేపథ్యంలో ఆ గదులను సిఐడి అధికారులు ఆధీనంలో ఉంచుకున్నారు. కొందరు సిబ్బందిని కూడా అదుపులోకి తీసుకున్నారు. వైసిపి నేతలకు అండగా నిలిచి, భూముల వ్యవహారంలో ప్రమేయం ఉన్న వారిపై కేసులో కూడా నమోదు చేశారు. ఈ పరిస్థితుల్లో మదనపల్లి రెవెన్యూ కార్యాలయంలో నిత్య కార్యక్రమాలు కొంతమేరకే సాగుతూ వచ్చాయి. తాజాగా మంటల ధాటికి పొగ చూరిన గదులు, గోడలనుశుభ్రం చేయించారు. సబ్ కలెక్టర్ కార్యాలయంలో మళ్ళీ పరిపాలనా వ్యవహారాలు పునరుద్ధరించడానికి వీలుగా రాష్ట్ర రెవెన్యూ శాఖ ప్రత్యేక కార్యదర్శి సిసోడియా పూజలతో ప్రారంభించారు. అన్నమయ్య జిల్లా జాయింట్ కలెక్టర్ ఆదర్శ రాజేంద్రన్, రాయచోటి ఆర్డీవోశ్రీనివాస్, మదనపల్లె తహసిల్దార్ ధనుంజయులు, మదనపల్లి డివిజన్లోని రెవెన్యూ అధికారులు ఈ కార్యక్రమానికి హాజరయ్యారు.