ఆదివారం వరకు వేటకు వెళ్లొద్దు

ఉపరితల ఆవర్తనం ప్రభావంతో రేపు ఉత్తర, ఆనుకుని ఉన్న మధ్య బంగాళాఖాతంలో అల్పపీడనం ఏర్పడే అవకాశం ఉందని విపత్తుల నిర్వహణ సంస్థ మేనేజింగ్‌ డైరెక్టర్‌ ప్రఖర్‌ జైన్‌ తెలిపారు. ఇది ఎల్లుండికి దక్షిణ ఒడిశా–ఉత్తరాంధ్ర తీరాల వెంబడి వాయువ్య, పశ్చిమమధ్య బంగాళాఖాతంలో వాయుగుండంగా బలపడే అవకాశం ఉందన్నారు. శనివారం దక్షిణ ఒడిశా–ఉత్తరాంధ్ర తీరాలను దాటే అవకాశం ఉందని వెల్లడించారు. ఆదివారం వరకు మత్స్యకారులు వేటకు వెళ్ళరాదని హెచ్చరించారు.  దీని ప్రభావంతో శుక్ర, శనివారాల్లో కోస్తాంధ్రలో కొన్నిచోట్ల భారీవర్షాలు, అక్కడక్కడ భారీ నుంచి అతిభారీ వర్షాలు రాయలసీమలో అక్కడక్కడ తేలికపాటి నుంచి మోస్తరు వర్షాలు కురిసేందుకు అవకాశం ఉందని తెలిపారు. తీరం వెంబడి గంటకు 40–50 కిమీ వేగంతో ఈదురు గాలులు వీచే అవకాశం ఉందన్నారు.