'బాయ్ కాట్ల' పై పవన్ కల్యాణ్ అంత మాట ఎందుకన్నట్టు?

ఆయనే ఆ మాటంటే అభిమానులు ఊరుకుంటారా?;

Update: 2025-07-25 05:00 GMT
"నన్ను విమర్శించే కొందరు, రాజకీయ ప్రత్యర్థులు నా చిత్రాలను బాయ్ కాట్ చేస్తామని చెబుతున్నారు. నేను అస్సలు దీనిని పట్టించుకోను. బాయ్ కాట్ చేసినా నాకు వచ్చిన ఇబ్బంది లేదు. నేను నటించిన ఒక సినిమా మిమ్మల్ని ఇంతలా భయపెడుతోంది అంటే మనం ఎంత ఎత్తుకు ఎదిగామో అర్థమవుతోంది. మీ తాటాకు చప్పుళ్లకు భయపడే వ్యక్తిని కాదు" అని పవన్ కల్యాణ్ చెప్పిన మాటలు ఇప్పుడు రాష్ట్ర వ్యాప్తంగా కలకలం రేపాయి. అంతటితో ఆగకుండా నా అభిమానులు అంత సున్నితంగా ఉండవద్దు అని కూడా పిలుపివ్వడం దేనికి సంకేతమని పలువురు ప్రశ్నిస్తున్నారు.

ఓపక్క కొందరు వైసీపీ నాయకులు, మరోపక్క ముస్లిం మత పెద్దలు- హరిహర వీరమల్లును బాయ్ కాట్ చేయమని పిలుపిచ్చిన నేపథ్యంలో ఆయన ఈ మాటలన్నారు. ఆ సినిమా సక్సెస్ మీట్ లో ఆయన చేసిన వ్యాఖ్యలు ఇప్పుడు కలకలం రేపాయి. ఆయన ఎవర్ని ఉద్దేశించి ఆ మాటలు అన్నారని ముస్లిం నేతలు ప్రశ్నిస్తున్నారు. అదే సమయంలో సీపీఎం కూడా ఘాటుగానే స్పందించింది. ఈ సినిమాలో ముస్లింలను టార్గెట్ చేశారని ఆరోపించింది. బహుశా వీటికి సమాధానంగా పవన్ కల్యాణ్ ఇలా స్పందించారేమోనని జనసేన నాయకుడొకరు చెప్పారు.
ఇంతకీ ఆ సక్సెస్ మీట్లో పవన్ ఏమన్నారో ఒక్కసారి చూద్దాం..
‘చరిత్రలో భారతదేశ రాజులు, రాజ్యాలు, వారి మంచితనాన్ని తక్కువగా చెప్పి ఇతర దేశాల నుంచి వచ్చి మనల్ని పాలించిన వారి గొప్పతనాన్ని ఎక్కువగా చెప్పారు అనిపిస్తుంది. భారతదేశాన్ని కేవలం 200 ఏళ్లపాటు పాలించిన మొఘల్స్ గురించిన మంచితనం అధికంగా ప్రస్తావించారు. బాబర్, అక్బర్, షాజహాన్ వంటి మొఘల్ రాజుల గొప్పతనాన్ని ఎక్కువగా చూపించి, ఔరంగజేబు వంటి రాజు దారుణ పాలనను పూర్తి స్థాయిలో ప్రస్తవించలేదు అనిపిస్తుంది. మన కాకతీయ రాజులు, కృష్ణదేవరాయులు, రాణి రుద్రమ వంటి పరిపాలకుల చరిత్ర తక్కువగా కనిపిస్తుంది. అందుకే ఔరంగజేబు కాలంలో హిందువుగా బతకాలంటే జిజియా పన్ను కట్టే దారుణమైన రోజులను హరిహర వీరమల్లు చిత్రంలో సునిశితంగా చర్చించాం. ఔరంగజేబు చనిపోయి ఇంతకాలమైనా అప్పటి దారుణాలను చెప్పాలంటే ఇప్పటికి చాలా మంది భయపడతారు. నాకు అలాంటి భయాలు లేవు. చరిత్రలో జరిగిన విషయాలను హరిహరవీరమల్లు చిత్రం ద్వారా ప్రజలకు తెలిసేలా చెప్పడం ఆనందంగా ఉంది’ అని ఉప ముఖ్యమంత్రి, హరిహర వీరమల్లు చిత్ర కథానాయకులు పవన్ కళ్యాణ్ చెప్పారు.
“ఔరంగజేబు కాలంలో చీకటి రోజులను ఆ కాలంలో సామాన్యులు పడిన ఇబ్బందులను చిత్రంలో చక్కగా చూపించాం. మొఘల్స్ సామ్రాజ్యంలో మంచితోపాటు చెడును చెప్పాలన్నదే ప్రధానమైన ఉద్దేశం. నేను ఏమీ చేసినా భారతదేశం సంస్కృతి, సంప్రదాయాలను కాపాడుతూ, దేశ ఉన్నతిని బలంగా చెప్పాలని చూస్తాను. నా మనసు అంతా భారతదేశపు ఆత్మ నిండిపోయి ఉంది. చిత్రం పార్ట్-2 కూడా 20 శాతం పూర్తయ్యింది. దీనిలో ఖాన్ అబ్దుల్ గఫూర్ ఖాన్ ను దృష్టిలో పెట్టుకొని కొంత భాగం చిత్రీకరించాం’’ అన్నారు పవన్ కల్యాణ్.
"నన్ను విమర్శించే కొందరు, రాజకీయ ప్రత్యర్థులు నా చిత్రాలను బాయ్ కాట్ చేస్తామని చెబుతున్నారు. నేను అస్సలు దీనిని పట్టించుకోను. బాయ్ కాట్ చేసినా నాకు వచ్చిన ఇబ్బంది లేదు. నేను నటించిన ఒక సినిమా మిమ్మల్ని ఇంతలా భయపెడుతోంది అంటే మనం ఎంత ఎత్తుకు ఎదిగామో అర్థమవుతోంది. మీ తాటాకు చప్పుళ్లకు భయపడే వ్యక్తిని కాదు. ఎవరైన మన గురించి పూర్తి నెగిటివ్ గా మాట్లాడుతున్నారంటే కచ్చితంగా మనం చాలా బలంగా ఉన్నామని అర్థం. నేను ఇంత బలంగా ఉన్నానంటే నా అభిమానులు ఇచ్చిన బలమే."
"హరిహర వీరమల్లు సినిమా చూసిన చాలా మంది కొన్ని సాంకేతిక అంశాలు ఇబ్బంది పెట్టినట్లు చెబుతున్నారు. దానిని కచ్చితంగా సరిదిద్దుకుంటాం. నా అభిమానులు సున్నితంగా అయిపోవద్దు. శత్రువు ఎంత బలంగా మనపై దాడి చేస్తే అంత బలంగా ఎదుర్కొని సమాధానం చెప్పడానికి సిద్ధంగా ఉండండి. కోహినూర్ వజ్రం కంటే విలువైన గొప్ప ధర్మం భారతదేశంలో ఉంది. వేదాలు, ఉపనిషత్తులు, జ్ఞానం, విజ్ఞానం, కలగలిపిన గొప్ప భూమి ఇది. దీనినే చిత్రంలోనూ చూపించాం. నాకు ఎలాంటి ఆటంకాలు కలిగించినా వాటిని అధిగమిస్తూనే నా జీవిత ప్రయాణాన్ని గొప్పగా ఎంజాయ్ చేస్తాను. ప్రతి కష్టాన్ని దాటుకొంటూ కాలర్ ఎగరేయకుండా... ఆ దాటే క్రమాన్ని చక్కగా అనుభవాలు, అనుభూతులుగా మిగుల్చుకుంటాను’’ అన్నారు పవన్ కల్యాణ్.
పవన్ కళ్యాణ్ చేసిన వ్యాఖ్యలు సినిమాతో పాటు రాజకీయరంగాన్నీ వేడెక్కిస్తున్నాయి. ఆయన మాటల్లోని ధీమా అభిమానులకు బలం కావొచ్చు కానీ... అదే మాటలు మతపరమైన సమాజాలను లేదా ప్రత్యర్థి వర్గాలను ఎలా ప్రభావితం చేస్తున్నాయన్న అంశంపై చర్చ మొదలైంది. ఉప ముఖ్యమంత్రి హోదాలో ఉన్న వ్యక్తి చేసిన వ్యాఖ్యలు బాధ్యతతో కూడినవేనా? ఇది వ్యక్తిగత అభిప్రాయమా, అధికారిక ప్రభుత్వ స్థానం ప్రతిబింబమా? — అనేది రాష్ట్రంలో వడివడిగా పెరుగుతున్న చర్చకు కేంద్ర బిందువైంది. ఒక చిత్ర కథానాయకుడిగా కాదు, ఒక ప్రజాప్రతినిధిగా పవన్ కళ్యాణ్ ఇప్పుడు చెప్పిన ప్రతి మాట బాధ్యతను మోస్తుంది. అది ఆయన అభిమానులకే కాదు, సమాజానికీ సందేశం. ఇప్పుడు ప్రశ్న ఇదే— ఈ మాటలు వ్యక్తిగతమా లేక రాజకీయ అజెండాకు సంకేతమా?
Tags:    

Similar News