పేకాటకు బానిసైన భార్యపై పోలీసులకు భర్త ఫిర్యాదు

ఎన్ని సార్లు చెప్పినా మాట వినక పోవడంతో ఆగ్రహించిన ఆ భర్త కాస్త పోలీసులను ఆశ్రయించాడు. తన భార్య పేకాటకు బానిసగా మారిందని, నిత్యం పేకాట ఆడుతోందని పోలీసులకు ఫిర్యాదు చేశారు. కేసు నమోదు చేసుకున్న విశాఖ నాలుగో పట్టణ పోలీసులు రంగంలోకి దిగారు. స్థానిక లలితానగర్‌ ప్రాంతంలో ఆమె ఆడుతున్న పేకాట స్థావరం దాడి చేశారు. ఈ దాడుల్లో పేకాట ఆడుతున్న ఆరుగురు మహిళలను పోలీసులు అదుపులోకి తీసుకున్నారు. ఆ మహిళల వద్ద నుంచి రూ. 22వేల నగదును పోలీసులు స్వాధీనం చేసుకున్నారు. పేకాట ఆడొద్దని భర్త చెప్పిన మాటలను పెడచెవిన పెట్టిన మహిళతో పాటు మరో ఐదుగురు మహిళలు కటకటాలపాలయ్యారు. మహిళలు పేకాట జూదం ఆడుతూ పోలీసులకు పట్టబడటం అటు విశాఖలోను, ఇటు ఏపీలోను తాజాగా చర్చనీయాంశంగా మారింది.