మద్యం తాగితే ఎలా పసిగడతారు?.. టీటీడీ ఈఓ ధర్మసందేహం!

ఒక వ్యక్తి మద్యం తాగాడు అనుకోండి. బ్రీతింగ్ అనలైజర్ ( Breathing analyzer ) టెస్టింగ్ ద్వారా ఎలా పసిగడతారు? ఇదీ టీటీడీ ఈఓ అనిల్ కుమార్ సింఘాల్ ధర్మసందేహం. ట్రాఫిక్ కానిస్టేబుల్ ఆ యంత్రం ఎలా పనిచేస్తుందనేది వివరించారు. తిరుపతి జిల్లా ఎస్పీ ఎల్. సుబ్బారాయుడు బ్రీతింగ్ అనలైజర్ టెస్టింగ్ పరికరంలో శ్వాస ఊదడం ద్వారా ఆల్కహాల్ ఎంత మోతాదులో తీసుకున్నాడనేది ఎలా తెలుస్తుందనేది వివరించారు.

తిరుపతిలోని టీటీడీ పరిపాలనా భవనంలో ఆదివారం ఈ ఆసక్తికర సన్నివేశం చోటుచేసుకుంది. తిరుమల శ్రీవారి దర్శనానికి వచ్చే యాత్రికుల భద్రతకు టీటీడీ తిరుపతి పోలీసులకు సహకారం అందించింది. తిరుమల ఘాట్ రోడ్డులో మద్యం సేవించి ప్రయాణం, వాహనాలు నడపకుండా కట్టడి చేయడానికి 20 బ్రీతింగ్ ఎనలైజర్ పరికరాలను టీటీడీ ఆదివారం తిరుపతి పోలీసులకు అందించిన సందర్భంలో జరిగిన సంభాషణ ఇది.