భయాందోళనలో 'అంజనాపురం' జనం

పల్నాడు జిల్లా దాచేపల్లి నగర పంచాయతీ అంజనాపురంలో 300కు పైగానే కుటుంబాలు నివసిస్తున్నాయి. ఈ గ్రామానికి బోరు ద్వారా మంచినీరు సరఫరా అవుతోంది. తాగునీటి పైప్ లైన్ లీకేజీ కావడంతో మురుగునీరు అందులో కలిసిందని అంజనాపురం గ్రామస్తులు తెలిపారు. తాగునీటి కాలుష్యం వల్ల దాదాపు పది మంది వాంతులు, విరేచనాలకు గురయ్యారు. కొందరు ఆస్పత్రుల్లో చికిత్స తీసుకుంటుండగా, మరో ఇద్దరు మరణించడంతో ఉలిక్కిపడ్డారు. నీరు కలుషితం అవుతున్న విషయమై గతంలో అధికారులకు తెలిపినా పట్టించుకోలేదని గ్రామస్తులు ఆరోపించారు. తాగునీరు కలుషితం కావడంతో అతిసార వ్యాధికి గురైన వారిలో కొందరు ఆస్పత్రుల్లో చికిత్స తీసుకుంటుండగా, ఇంకొందరు ఇళ్ల వద్దే వైద్య సేవలు తీసుకుంటున్నారు. ప్రస్తుతం ఆస్పత్రిలో ఆరుగురు ఉన్నట్లు సమాచారం. కాగా,

డయేరియా ప్రబలిన అంజనాపురంలో కలెక్టర్ పి. అరుణ్ బాబు వైద్య ఆరోగ్య శాఖాధికారులతో కలిసి ఇంటింటా పరిశీలించారు. ఇళ్లలో అస్వస్థతకు గురైన వారిని వెంటనే ఆస్పత్రులకు తరలించాలని ఆదేశించారు. ఈ కాలనీలో ఇంటింటా సర్వే చేస్తున్నట్లు జిల్లా వైద్య ఆరోగ్య శాఖాధికారి డాక్టర్. బి. రవికుమార్ తెలిపారు. కాలనీలో మురుగునీటి కాలువలను యుద్ధప్రాతిపదికన శుభ్రం చేయించడంతో పాటు బ్లీచింగ్ చల్లించారు. కాలనీకి మంచినీరు సరఫరా అవుతున్న పైపులైన్లను కూడా వెంటనే మరమ్మతు చేయించడం ద్వారా రోగాలు ప్రబలకుండా జాగ్రత్తలు తీసుకుంటున్నారు.