పిఠాపురానికి పవన్ కల్యాణ్ ఏమి చేశారో తెలుసా?

పిఠాపురం ఏరియా డెవలప్‌మెంట్ అథారిటీ ఏర్పాటుకు నిర్ణయం తీసుకున్నట్లు పవన్ కల్యాణ్ వెల్లడించారు. అలాగే పిఠాపురం నియోజకవర్గ ప్రజల అవసరాన్ని గుర్తించి ప్రస్తుతం ఉన్న 30 పడకల ఆసుపత్రిని 100 పడకల ఆసుపత్రిగా అభివృద్ధి చేసేందుకు ప్రభుత్వం చర్యలు చేపట్టిందని.. అందుకు అవసరైన సిబ్బంది, మౌలిక సదుపాయాల కోసం రూ. 39.75 కోట్ల వ్యయానికి ఆమోదం తెలిపినట్లు వెల్లడించారు. అలాగే సామాన్యులకు అందుబాటులో ఉండేలా, శ్రీవారి ఆశీస్సులతో తక్కువ ఖర్చుతో పెళ్ళిళ్ళు జరిపించేందుకు వీలుగా రూ. 2 కోట్ల అంచనా వ్యయంతో టీటీడీ కళ్యాణ మండపం మంజూరు చేసినట్లు తెలిపారు.

గొల్లప్రోలులో తాగునీటి సమస్య పరిష్కారం కోసం పైప్ లైన్, మోటార్ల మరమ్మత్తుల కోసం రూ. 72 లక్షల విలువైన పనులు చేపట్టామని.. విధ్యార్ధులకు చదువుతో పాటుగా, క్రీడలలో ఆసక్తి పెంచేందుకు నియోజకవర్గంలోని 32 పాఠశాలలకు క్రీడా సామగ్రి కిట్లను సీఎస్ఆర్ నిధులతో అందించామన్నారు. ప్రజలకు నాణ్యమైన వైద్యసేవలు అందించేలా కమ్యూనిటీ హెల్త్ సెంటర్ కోసం సివిల్ అసిస్టెంట్ సర్జన్, మెడికల్ ఆఫీసర్, ముగ్గురు స్టాఫ్ నర్సులు, ఒక జనరల్ డ్యూటీ అటెండర్‌ను నియమించినట్లు వెల్లడించారు. అలాగే నూతన ఎక్స్ రే యూనిట్ ఏర్పాటు చేశామని.. పిఠాపురం R.R.B.H.R కళాశాలలో ఆర్వో ప్లాంట్ మరమ్మతులు చేయించి తాగునీటి సౌకర్యం కల్పించినట్లు వివరించారు.

గొల్లప్రోలు డంపింగ్ యార్డ్ సమస్యకు శాశ్వత పరిష్కారం దిశగా.. డంపింగ్ యార్డ్ ఏర్పాటు చేసేలా చర్యలు మొదలు పెట్టామని పవన్ కల్యాణ్ ట్వీట్ చేశారు. తాత్కాలికంగా 1.5 ఎకరాల పరిధిలో ఉన్న డంపింగ్ యార్డ్‌ను 0.25 ఎకరాకు కుదించి చుట్టుపక్కల ప్రాంతాలను శుభ్రపరిచామన్నారు. అలాగే గొల్లప్రోలు ప్రాథమిక ఆరోగ్య కేంద్రానికి వెళ్లే దారిలో సీసీ రోడ్డు నిర్మాణం చేపట్టినట్లు తెలిపారు. గొల్లప్రోలు ప్రాథమికోన్నత పాఠశాల కోసం రూ. 4 లక్షల సీఎస్ఆర్ నిధులతో పైప్ లైన్ ద్వారా నూతన R. O ప్లాంట్ ఏర్పాటు చేశామన్నారు. గొల్లప్రోలు ఎంపీపీ పాఠశాలలో 1.75 లక్షల సీఎస్ఆర్ నిధులతో పెండింగ్ పనులు పూర్తి చేశామని.. చేబ్రోలు సాంఘిక సంక్షేమ బాలికల వసతి గృహంలో రూ. 2 లక్షల CSR నిధులతో ఆర్వో ప్లాంట్ ఏర్పాటు చేసినట్లు పవన్ కళ్యాణ్ వివరించారు.

ప్రభుత్వ పారదర్శకత, జవాబుదారీతనంలో భాగంగా ఆరున్నర నెలల కాలంలో జరిగిన కార్యక్రమాలు, అభివృద్ది పనుల వివరాలు తెలియజేశానన్న డిప్యూటీ సీఎం. భవిష్యత్తులో కూడా మీ ప్రేమ, మద్దతు ఇలాగే ఉండాలని కోరుకుంటున్నానని ఎక్స్ లో పేర్కొన్నారు.