దేవి నవరాత్రులు: మహిషాసుర మర్దినిదేవిగా కొలువైన అమ్మవారు

విజయవాడ ఇంద్రకీలాద్రి దేవి నవరాత్రులు చివరి దశకు చేరుకున్నాయి. శుక్రవారం మహిషాసురమర్దిని దేవి రూపంలో కొలువైన అమ్మవారు భక్తులకు దర్శనమిస్తున్నారు. ఈ రూపానికి ఓ ప్రత్యేకత ఉంది. మహిషాసురుడనే రాక్షసుడిని చంపిన ఉగ్రరూపంగా ఈ రూపాన్ని చెబుతారు. సకల దేవి, దేవతల శక్తులన్నీ ఈ దేవిలో మూర్తిభవించి ఉంటాయని భక్తులు విశ్వసిస్తారు. మానవ నేత్రంతో చూడడానికి సాధ్యం కాని దివ్య తేజస్సుతో, అనేక ఆయుధాలతో సింహవాహినిౖయె దుర్గమ్మ భక్తులకు దర్శన భాగ్యం కల్పిస్తుంది. ఈ రోజు అమ్మవారిని దర్శనం చేసుకుంటే అసాధ్యమనేది ఉండదనేది భక్తుల నమ్మకం.

మహిషాసుర సంహారం జరిగిన రోజునే మహర్నవమిగా ఈ రోజును జరుపుకోవడం భక్తులు చేస్తారు. ఈ రోజున చండీ సప్తశతీ హోమం చేస్తారు. ఈ హోమాన్ని చేస్తే శత్రుభయం ఉండదని నమ్ముతారు. అన్ని విధాలుగా విజయం కలుగుతుందని భావిస్తారు. పూజలు చేసి, ఓం ఐం హ్రీం శ్రీం సర్వసమ్మోహిన్యై స్వాహా అనే మంత్రాన్ని జపిస్తారు. పానకం, వడపప్పు, గారెలు, పులిహోరా, పాయసన్నంతో నివేదన ∙చేస్తారు. సువాసినీ పూజ చేసి, మంగళద్రవ్యాలు, శక్తి కొద్దీ కొత్త వస్త్రాలను అమ్మవారికి సమర్పిస్తారు. శుక్రవారం మహిషాసురమర్దిని దేవిగా దర్శనమిచ్చే అమ్మవారు శనివారం పండుగ రోజు శ్రీరాజరాజేశ్వరిదేవి రూపంలో భక్తులకు దర్శనమిస్తారు.