దుర్గమ్మ దర్శన వేళల్లో మార్పులు

విజయవాడ కనక దుర్గమ్మ దేవాలయానికి భక్తుల తాకిడి పెరుగుతోంది. తెలుగు రాష్ట్రాలైన ఆంధ్రప్రదేశ్, తెలంగాణతో పాటు ఇతర రాష్ట్రాల నుంచి కూడా దుర్గమ్మ దర్శనాల కోసం పెద్ద ఎత్తున తరలి వస్తున్నారు. భక్తుల తాకిడి పెరుగుతుండటంతో ఆలయ కమిటీ పెద్దలు ఓ కీలక నిర్ణయం తీసుకున్నారు. దుర్గమ్మ దర్శనం కోసం వస్తున్న సామాన్య భక్తులకు ఎలాంటి ఇబ్బందులు తలెత్తకుండా ముందస్తు జాగ్రత్తలు చేపట్టింది. ఏ సమస్యలు లేకుండా ప్రశాతంగా అమ్మవారిని దర్శనం చేసుకునేందుకు అవకాశాలు కల్పించేందుకు నిర్ణయం తీసుకున్నారు.

దీని కోసం వీఐపీల దర్శనాల వేళల్లో మార్పులు చేయాలని నిర్ణయించారు. ప్రతి రోజూ ఉదయం11:30 గంటల నుంచి మధ్యాహ్నం 1:30 గంటల లోపు వీఐపీ దర్శనాలను నిలుపుదల చేయాలని నిర్ణయం తీసుకున్నారు. ఇదే విషయాన్ని దుర్గమ్మ దేవాలయం ఈఓ శీనా నాయక్‌ శనివారం సాయంత్రం వెల్లడించారు. ప్రతి రోజూ ఉదయం 11:45 గంటల నుంచి మధ్యాహ్నం 12:15 గంటల మధ్య దుర్గమ్మ అమ్మవారికి మçహా నైవేద్య సమర్పణ, ఆలయ శుద్ది వంటి కార్యక్రమాలు ఉంటాయని వెల్లడించారు. నైవేద్య సమయంలో దర్శనాల విరామం వల్ల చిన్న పిల్లలు, దివ్యాంగులు, వయో వృద్దులు ఇబ్బందులు పడుతున్నారని, ఇక నుంచి అలా ఇబ్బందులు పడకూడదనే ఈ నిర్ణయం తీసుకున్నట్లు తెలిపారు. ప్రతి రోజు ఉదయం 5 గంటల నుంచి రాత్రి 10 గంటల వరకు నాలుగు క్యూలైన్ల ద్వారా దుర్గమ్మ అమ్మవారి దర్శనం చేసుకోవచ్చని శీనా నాయక్‌ తెలిపారు. ఉదయం 11:30 గంటల నుంచి మధ్యాహ్నం 1:30 గంటల లోపు దుర్గమ్మ అమ్మవారి దర్శనాల కోసం షెడ్యూల్‌ పెట్టుకోవద్దని, భక్తుల రద్దీని దృష్టిలో ఉంచుకొని షెడ్యూల్‌ను మార్చుకోవాలని వీఐపీలకు దుర్గమ్మ ఆలయ ఈఓ శీనా నాయక్‌ విజ్ఞప్తి చేశారు,