తిరుమలలో యాత్రికుల వసతికి ఇక సమస్య లేదబ్బా..

తిరుమల శ్రీవారి దర్శనానికి వచ్చే యాత్రికులకు గది దొరకలేదనే సమస్య లేదు. ముందుగా గది బుక్ చేసుకోకుండా తిరుమలకు వచ్చినా ఇబ్బంది లేదు. 4,000 మందికి వసతి కల్పించే భవనం అందుబాటులోకి తెచ్చారు.

తిరుమలలో 102 కోట్ల రూపాయలతో నిర్మించిన యాత్రికుల వసతి సముదాయం ( pilgrim amenities complex PAC) భవనాన్ని భారత ఉపరాష్ట్రపతి రాధాకృష్ణన్ తో కలిసి ముఖ్యమంత్రి నారా చంద్రబాబు గురువారం ఉదయం ప్రారంభించారు. ఆధునిక వసతులు అందుబాటులోకి తీసుకుని వచ్చిన టీటీడీ అధికారులను సీఎం చంద్రబాబు అభినందించారు.

"యాత్రికులకు వసతి, మంచి దర్శనం కల్పించడంలో ఏమాత్రం రాజీలేకుండా సేవలు అందించండి" అని సీఎం చంద్రబాబు అధికారులను ఆదేశించారు. అన్నప్రసాదాల తయారీ, వడ్డించడంలో కూడా నాణ్యతకు ప్రాధాన్యత ఇవ్వాలని మరోసారి ఆయన గుర్తు చేశారు. శ్రీవారి నిలయంలో ఎలాంటి అపసవ్య పరిస్థితులకు ఆస్కారం ఇవ్వకుండా చిత్తశుద్ధితో పనిచేయాలని కూడా సీఎం చంద్రబాబు సూచించారు.