ఛత్తీస్‌గఢ్‌లో 36 మంది నక్సలైట్ల కాల్చివేత: దండకారణ్యం రక్తసిక్తం

దండకారణ్యం మరోసారి రక్తసిక్తమైంది. మావోయిస్టులకు మరో పెద్ద దెబ్బ తగిలింది. 36మంది నక్సలైట్లు ఎదురుకాల్పుల్లో చనిపోయినట్టు ఛత్తీస్‌గఢ్‌ పోలీసులు ప్రకటించారు. ఈ సంఖ్య ఇంకా పెరిగే సూచనలు కనిపిస్తున్నాయి. నారాయణపూర్-దంతేవాడ జిల్లా సరిహద్దుల్లో ఈ భారీ ఎన్ కౌంటర్ జరిగింది. ముందు ఏడుగురని చెప్పిన పోలీసులు ఆ సంఖ్యను క్రమంగా పెంచుకుంటూ పోయారు. 36 మంది అంటే ప్రజలు ఒక్కసారిగా ఉలిక్కిపడే ప్రమాదం ఉన్నందున చనిపోయిన వారి సంఖ్యను నెమ్మదిగా పెంచుకుంటూ పోయారని తెలుస్తోంది. ఎన్ కౌంటర్ తర్వాత తుపాకుల మోత ఆగిందని, అప్పుడు అడవిలోకి వెళ్లి చూస్తే వివిధ ప్రాంతాల్లో శవాలు కనిపించాయని, అందువల్లే చనిపోయిన వారి సంఖ్యను ఒక్కసారిగా చెప్పలేకపోయామని బస్తర్‌ ఐజీ సుందర్‌రాజ్‌ చెప్పారు. ఛత్తీస్‌గఢ్‌ రాష్ట్ర ముఖ్యమంత్రి విష్ణుదేవ్ ఈ ఎన్ కౌంటర్ చేసిన పోలీసులను అభినందించారు. పోలీసులు, సీఆర్పీఎఫ్ దళాల సాహసానికి తలవంచి శాల్యూట్ చేస్తున్నట్టు ఓ ప్రకటనలో తెలిపారు.

అక్టోబర్ 4, శుక్రవారం ఛత్తీస్‌గఢ్‌లోని బస్తర్ ప్రాంతంలో భద్రతా బలగాలతో నక్సలైట్లు తలపడినపుడు నక్సల్స్ మరణించారన పోలీసుల కథనం. కూంబింగ్ చేస్తుండగా నక్సలైట్లు కాల్పులు జరిపారని, తిరిగి భద్రతా దళాలు కాల్పులు జరపడంతో వారు చనిపోయారన్నది పోలీసుల ప్రకటన. ఎన్ కౌంటర్లు జరిగిన ప్రతిసారీ పోలీసులు చెప్పే పాతకథే ఇప్పుడూ చెప్పారని పౌరహక్కుల సంఘాలు నిరసన తెలుపుతున్నాయి.