చెత్తనే కాదు వాటిని కూడా క్లీన్‌ చేస్తా

మొన్నటి వరకూ ఇక్కడ ప్రజాస్వామ్యంగా ఎన్నికలు లేవు. కొందరు డిక్టేటర్లు ఉన్నారు. ప్రవర్తన మార్చుకోకపోతే ప్రజలు క్షమించరని పరోక్షంగా వైసీపీ నాయకులను హెచ్చరించారు. మాచర్ల వద్దామంటే నా ఇంటికి తాళ్లు కట్టి రానీయకుండా చేశారు. నా ఇంటికి తాళ్లు కట్టి వారి మెడలకు ఉరితాళ్లు వేసుకున్నారని ఎద్దేవా చేశారు. గతంలో ఇక్కడ చాలా అరాచకాలు చేశారు. వారందరికీ జాగ్రత్తగా ఉండాలని హెచ్చరిస్తున్నా అని పేర్కొన్నారు. రౌడీయిజం చేసినా.. విధ్వంసం చేసినా చూస్తూ ఊరుకోను. నేరాలు వద్దు ఘోరాలు చేయొద్దు. మన పరిసరాల్లోని చెత్తే కాదు.. రాజకీయ చెత్తను కూడా తొలగించాల్సి ఉందన్నారు. గత పాలకులు 85 లక్షల మెట్రిక్‌ టన్నుల చెత్తను అలాగే ఉంచేశారు. చెత్తపై పన్నేశారు. ఆ చెత్తను తొలగించటంతో పాటు చెత్త రాజకీయాలను కూడా తొలగిస్తాను అని సీఎం చంద్రబాబు వెల్లడించారు.

అక్టోబరు 2 గాంధీ జయంతి కల్లా లెగసీ చెత్తను తొలగించేస్తామన్నారు. స్వచ్ఛ వాహనాల ద్వారా పాత వస్తువులు ఇచ్చిన వారికి కావలసిన నిత్యవసర సరుకులు అందిస్తామన్నారు. ఆంధ్రప్రదేశ్‌ను ప్లాస్టిక్‌ ఫ్రీగా మారుస్తామని, 2047 నాటికి ఏపీలో 50 శాతం పచ్చదనం ఉండే విధంగా తయారు చేస్తామన్నారు. త్వరలో సంజీవని కార్యక్రమాన్ని తీసుకొస్తున్నామని, దీని ద్వారా ప్రతి ఒక్కరికీ రూ. 2.5లక్షల బీమా, పేదలకు రూ. 25లక్షల ఆరోగ్య బీమా అందుబాటులోకి తెచ్చి, ఇంటి వద్దే వైద్యం అందే విధంగా చూస్తామని సీఎం చంద్రబాబు స్పష్టం చేశారు. మాచర్లకు తాగు నీటి సమస్య ఉందని, దీనిని పరిష్కరిస్తామన్నారు. మాచర్లకు వంద పడకల ఆసుపత్రిని మంజూరు చేస్తున్నట్లు సీఎం చంద్రబాబు ప్రకటించారు. పల్నాడు ఉత్సవాలను ఘనంగా నిర్వహిస్తామన్నారు.