విజయవాడ పార్కుల్లో ఉట్టిపడుతున్న పల్లె శోభ!

ఈమధ్య మీరెప్పుడైనా విజయవాడ బస్టాండ్ పక్కనున్న రాజీవ్ పార్క్ వైపు వెళ్లారో లేదో.. ఒకవేళ వెళ్లినా ఆ రణగొణ ధ్వనుల మధ్య ఆ పార్క్ గోడల్ని చూశారో లేదో గాని ఆ గోడలపై పల్లె జీవనం, ప్రకృతి సోయగం ఉట్టిపోడుతోంది. పరికించి చూస్తే వాటి సోయగం ముందు మన మనసు కచ్చితంగా రంజిల్లుతుంది.

విజయవాడ రాజీవ్ పార్క్ ఇప్పుడు కేవలం ఒక పార్క్ మాత్రమే కాదు. అక్కడి గోడలు ఆకాశం కింద నిలుచున్న ప్రకృతి జీవంతో తొణికిసలాడుతున్నాయి. నిజంగా చెప్పాలంటే ఓ చిత్రశాల అని చెప్పవచ్చు. ఎరుపు, పసుపు, ఆకుపచ్చ, నీలం రంగులు కలగలిపిన ఈ కుడ్య చిత్రాలు కనువిందు చేస్తున్నాయి.

సంస్కృతి ప్రతిబింబం

ఇంకొంచెం ముందుకు వెళితే అదే గోడపై మనకు గిరిజనులు సంప్రదాయ నృత్యంతో స్వాగతం పలుకుతారు. నాట్యరంగపు కదలికలు కనిపిస్తాయి. పురాతన భారతీయ కళల సౌందర్యం వీధిగోడలపై తిరిగి జీవం పోసుకుంది. ఇది కేవలం పెయింటింగ్ కాదు, మన సంస్కృతికి ఓ అద్దం.