సేవకు వెళాయే.. 15 నెలలకు కుదిరిన ముహూర్తం..

రాష్ట్రంలో టీడీపీ కూటమి ఏర్పడిన తరువాత నామినేటెడ్ పోస్టుల భర్తీలో తాత్సారం జరిగింది. కూటమిలో టీడీపీ తోపాటు జనసేన, బీజేపీ కూడా భాగస్వామ్య పక్షాలుగా ఉండడం వల్ల నామినేటెడ్ పదవుల్లో సమతూకం పాటించడంలో జాప్యం జరిగింది. ప్రాంతాన్ని బట్టి, పార్టీల ప్రతినిధులకు అవకాశం కల్పించడంలో అనేక సమీకరణలను పరిశీలించింది. దీంతో ఎట్టకేలకు కూటమిలోని ఆశావహులకు అవకాశం కల్పించింది. అందులో..

టీడీపీ కూటమి ఏర్పడిన 15 నెలల తరువాత గురువారం రాష్ట్రంలోని ఏడు దేవస్థానాలకు ఆలయ కమిటీలను నియమిస్తూ, దేవాదాయ శాఖ ఆదేశాలు జారీ చేసింది.

1. తాతయ్యగుంట గంగమ్మ తల్లి దేవస్థానం, తిరుపతి.

2. కుమార రామ భీమేశ్వర స్వామి వారి దేవస్థానం, సామర్లకోట, కాకినాడ జిల్లా.

3. వెంకటేశ్వర స్వామి వారి దేవస్థానం, అమలాపురం, అంబేద్కర్ కోనసీమ జిల్లా.

4. వీరేశ్వరస్వామి వారి దేవస్థానం, మురమళ్ళ గ్రామం, అంబేద్కర్ కోనసీమ జిల్లా.

5. అస్వర్త నారాయణ & భీమలింగేశ్వర స్వామి వారి దేవస్థానం, ఏ.పప్పూరు గ్రామం, అనంతపురం జిల్లా.

6. చౌడేశ్వరి అమ్మవారి దేవస్థానం, నందవరం గ్రామం, నంద్యాల జిల్లా.

7. సహస్ర లింగేశ్వర స్వామి, శ్రీ వీరాంజనేయ స్వామి వారి దేవస్థానం, పొన్నూరు, గుంటూరు జిల్లా.

రాయలసీమలో ప్రధానంగా చిత్తూరు జిల్లా ప్రపంచ స్థాయిలో గుర్తింపు పొందిన ఆధ్యాత్మిక క్షేత్రాలకు నిలయం. తిరుమలలో శ్రీవారి ఆలయం. శ్రీకాళహస్తిలోని ముక్కంటి క్షేత్రం. పూతలపట్టు నియోజకవర్గంలోని కాణిపాకం వరసిద్ధి వినాయకస్వామి ఆలయం ప్రత్యేక గుర్తింపు ఉంది. తిరుమలకు వచ్చిన యాత్రికులు మిగతా క్షేత్రాలను సందర్శించినదే తిరిగి వెళ్లరు. ఇవన్నీ సీఎం చంద్రబాబు నాయుడుకు సొంత జిల్లాలోనే ఉండడం గమనార్హం.

తిరుమల మినహా మిగతా ఏ ఆలయాలకు ఇంతవరకు పాలక మండళ్లు ఏర్పాటు కాలేదు. పదవులను ఆశిస్తున్న నాయకుల మధ్య పోటీ ఎక్కువగా ఉంది. మూడు పార్టీల మధ్య సమన్వయం అనడం కంటే సమతూకం పాటించడంలో జాగ్రత్తలు తీసుకోవడంలో తీవ్ర జాప్యం జరిగింది. తిరుమల తిరుపతి దేవస్థానానికి పాలక మండలిని గత ఏడాదే నియమించింది. మిగతా ఆలయాలకు కమిటీలను ఏర్పాటు చేయడంలో తీవ్ర తాత్సారం చేసింది. పార్టీ నేతల మధ్య సమన్వయం సాధించడం, ఎవరికి ప్రాధాన్యం ఇవ్వాలనే విషయంలోనే జాప్యం జరుగుతోంది. దీంతో జిల్లాలోని శ్రీకాళహస్తి, కాణిపాకం ఆలయాల ఉత్సవాలు కూడా ముగిశాయి. పదవుల కోసం తీవ్ర పోటీ ఏర్పడడం వల్ల పాలక మండలి కూర్పులో జాప్యం జరుగుతోంది.