శ్రీవారి ఆలయంలో వెలిగిన కార్తీకదీపం..

శ్రీవారి ఆలయంలోకి వెళ్లడానికి మహద్వారం దాటగానే ధ్వజస్తంభానికి సమీపంలోని బలిపీఠంపై ప్రమిదను పోలిన కుండను ఆలయ అర్చకుడు ఉంచారు. అందులో నెయ్యి పోసి, దూదితో చేసిన ఒత్తిని వేయడం ద్వారా వెలగించారు. ఆ తరువాత టీటీడీ ఈఓ అనిల్ కుమార్ సింఘాల్ కార్తీక దీపాన్ని వెలిగించడం ద్వారా కార్తీకమాసంలో అది కూడా కృతిగా తిథిలో కార్తీకపౌర్ణమి విశిష్ట క్రతువును ప్రారంభించారు.

శ్రీవారి ఆలయంలో మొదట కార్తీకదీపాలు వెలిగించారు. ఛత్రచామర, మంగళవాయిద్యాలతో ఊరేగింపుగా ఆనందనిలయం కింది భాగంగలోని శ్రీవెంకటేశ్వరస్వామివారి సన్నిధి అంటే ఆలయ ప్రాకారంలో విమాన ప్రదక్షిణం చేశారు. ఆ తరువాత ఆనంద నిలయంలో శ్రీవారికి హారతి ఇచ్చారు. దీంతో కార్తీకపౌర్ణమి వేళ కార్తీకదీపోత్సవం ఘనంగా నిర్వహించారు..

శ్రీవారి ఆలయం, పరిసరాలు రోజు సాయంత్రం కాగానే విద్యుత్ వెలుగుల్లో జిగేలు మంటు ఉంటుంది. కార్తీక పౌర్ణమి సందర్భంగా ఆలయ సన్నిధి, ధ్వజస్తంభం సమీప ప్రదేశాల తోపాటు ప్రధాన ప్రదేశాలన్నీ కార్తీకదీపం కాంతుల్లో మరింత వెలుగులు విరజిమ్ముతూ, ఆధ్యాత్మిక పరిమణాలు వెదజల్లాయి.

ఆనందనిలయం నుంచి ప్రదక్షిణ పూర్తయిన తరువాత సంపంగి ప్రాకరంలోని ఆలయాల్లో కూడా కార్తీకదీపాలు వెలిగాయి. గర్భాలయంలో అఖండం, కులశేఖర పడి, రాములవారి మేడ, ద్వార పాలకులు, గరుడాళ్వారు, వరదరాజస్వామి సన్నిధి, వకుళమాత, బంగారుబావి, కల్యాణ మండపం, సభ అర, తాళ్లపాక అర, భాష్యకారుల సన్నిధి, యోగ నరసింహస్వామి, విష్వక్సేనులు, చందనం అర, పరిమళం అర, వెండి వాకిలి, ధ్వజస్తంభం, బలి పీఠం, క్షేత్ర పాలకుల సన్నిధి, తిరుమలరాయ మండపం, పూలబావి, రంగనాయక మండపం, మహాద్వారం, బేడి ఆంజనేయస్వామి, శ్రీవరాహస్వామి ఆలయం, స్వామి పుష్కరిణి వద్ద దీపాలను ఏర్పాటు చేశారు.