ఆ హెలికాప్టర్‌ను కొనలేదు..అద్దెకు తీసుకున్నది

పాత హెలికాప్టర్‌ బెల్‌ కంపెనీకి చెందింది. దీనిని ఇప్పటి వరకు ముఖ్యమంత్రి పర్యటనల కోసమే కాకుండా ఇతర వీవీఐపీల టూర్‌లకు కూడా అద్దె ప్రాతిపదికనే ఇన్నాళ్లూ ఉపయోగించింది. అయితే ఈ హెలికాప్టర్‌ ఇటీవల ముఖ్యమంత్రి చంద్రబాబుతో పాటు కేంద్ర మంత్రి పియూష్‌ గోయల్‌ పర్యటనల్లో పలుమార్లు సాంకేతిక సమస్యలు తలెత్తాయి. వీవీఐపీల పర్యటనల సందర్భంగా ఇలా సాంకేతిక సమస్యలు తలెత్తిన హెలికాప్టర్‌ను ఉపయోగించడం సరైంది కాదు. ఇలాంటి పరిస్థితుల నేపథ్యంలో పాత హెలికాప్టర్‌ను బెల్‌ సంస్థ క్షుణ్ణంగా పరిశీలించింది. వీవీఐపీ పర్యటనలకు దీనిని ఉపయోగించడం మంచిది కాదు. దీనికి బదులుగా మరొక హెలికాప్టర్‌ను ఉపయోగించాలని సూచించాయి. ఇలాంటి పరిస్థితుల్లోనే అధునాత సౌకర్యాలు కలిగిన ఎయిర్‌బస్‌–160 హెలికాప్టర్‌ను ఉపయోగించాలని, ఆ మేరకు దానిని అద్దెకు తీసుకున్నట్లు సీఎం కార్యాలయం స్పష్టం చేసింది.

అయితే కొత్తగా అద్దెకు తీసుకున్న ఈ అధునాతన హెలికాప్టర్‌లో ఉండవల్లిలోని సీఎం నివాసం నుంచి నేరుగా జిల్లాల పర్యటనలకు వెళ్లొచ్చు. దీని వల్ల కాన్వాయ్‌కు, విమానానికి అయ్యే ఖర్చులు తగ్గుతాయని వివరించింది. ఈ అధునాతన ఎయిర్‌బస్‌–160 మోడల్‌ హెలికాప్టర్‌ను వినియోగించడం వల్ల సీఎంతో పాటు ఇతర వీవీఐపీ ప్రయాణాలకు అయ్యే ఖర్చుల్లో దాదాపు 70 శాతం ఖర్చులు ఆదా అవుతుందని ముఖ్యమంత్రి కార్యాలయం స్పష్టం చేసింది. దీనిపైన సోషల్‌ మీడియాలో అబద్దపు ప్రచారం చేస్తే కఠిన చర్యలు తప్పవని హెచ్చరికలు జారీ చేసింది.