టీడీపీ, జనసేన మధ్య అగ్గి రాజేసిన పొల్యూషన్ కంట్రోల్ బోర్డు

బోర్డు నిర్లక్ష్యం, సిబ్బంది ఖాళీలు వంటి అంశాలు ప్రభుత్వ పాలనా వైఫల్యాలకు అద్దం పడుతున్నాయి. ఇది కూటమి ఐక్యతను పరీక్షిస్తున్న సమయంలో రాష్ట్ర పారిశ్రామిక అభివృద్ధి, పర్యావరణ సమతుల్యతపై ప్రశ్నలు లేవనెత్తుతోంది. ఉప ముఖ్యమంత్రిగా ఉన్న పవన్ కల్యాణ్ స్వరం గతంలో మాదిరి కరకుగా లేదు. సానుకూల ధోరణిలో ఉంది. ఇలా అయితే గత ప్రభుత్వానికి, నాకు తేడా ఏముంటుందనే వ్యాఖ్యలు ఆయన చేశారు.

బొండా ఉమా ఆరోపణలు

అసెంబ్లీ సమావేశాల్లో బొండా ఉమా ఏపీపీసీబీ పనితీరును ప్రశ్నించారు. "బోర్డు వ్యవహారం ఇష్టానుసారంగా సాగుతోంది. చైర్మన్ కృష్ణయ్య ఇష్టమొచ్చినట్టు మాట్లాడుతున్నారు. ఉప ముఖ్యమంత్రి పవన్ కళ్యాణ్ అందుబాటులో లేకపోవడమే ఇందుకు కారణం" అని ఆరోపించారు. విజయవాడలోని రాంకీ, క్రెబ్స్ వంటి పరిశ్రమలపై చర్యలు తీసుకోకపోవడం, కాలుష్య నియంత్రణ లోపాలను ఎత్తిచూపారు. ఇది కూటమి లోపలి అసమ్మతిని బహిర్గతం చేసింది.

పవన్ కళ్యాణ్ కౌంటర్

పవన్ కళ్యాణ్ తీవ్రంగా స్పందించారు. "నేను అందుబాటులో లేననడం సరికాదు. మీరు ఇచ్చిన ఫిర్యాదుల ప్రకారం పరిశ్రమలు మూసేస్తే రాష్ట్రంలో పారిశ్రామిక అభివృద్ధి జరగదు. గత ప్రభుత్వంతో పోలిస్తే మన ప్రభుత్వం వేరు" అని కౌంటర్ ఇచ్చారు. అప్పటికప్పుడు బోర్డు అధికారులను పిలిపించి, ముఖ్యమంత్రి చంద్రబాబు నాయుడికి నివేదిక అందజేశారు. ముఖ్యమంత్రి నిశ్శబ్దంగా చూస్తూ ఉండటం గమనార్హం. ఇది పవన్ కళ్యాణ్ పాలనా పట్టును చూపిస్తుంది కానీ, బొండా ఉమా లాంటి ఎమ్మెల్యేల నుంచి వచ్చే ఒత్తిళ్లను ఎదుర్కోవడంలో కూటమి ఐక్యత లోపాన్ని సూచిస్తుంది.

ఉమా పై వ్యక్తిగత వత్తిడి ఉందా?

బొండా ఉమా ఆరోపణల వెనుక వ్యక్తిగత ఒత్తిడి ఉందని ఆరోపణలు వస్తున్నాయి. క్రెబ్స్ కెమికల్స్ పై ఫిర్యాదు ఇచ్చి, తర్వాత చర్యలు విత్‌డ్రా చేయాలని ఒత్తిడి చేశారని, బోర్డు నిరాకరించడంతో పవన్ పేరును లాగారని వార్తలు బయటకొచ్చాయి. ఇది బోర్డును వ్యక్తిగత ప్రయోజనాలకు ఉపయోగించాలనే ప్రయత్నమా? పవన్ కళ్యాణ్ దీనిపై విచారణకు ఆదేశించి, బోర్డును మిస్యూజ్ చేయవద్దని హెచ్చరించటమా? అనేది కూడా చర్చకు దారితీసింది. కూటమి లోపలి బ్లాక్‌ మెయిలింగ్ లాంటి ఆరోపణలు రాష్ట్ర పాలనపై ప్రభావం చూపుతాయనటంలో సందేహం లేదు.

జనసేన ఎమ్మెల్యేలతో డిప్యూటీ సీఎం పవన్ కల్యాణ్ (అసెంబ్లీ సమావేశాలు ప్రారంభం రోజు)

టీడీపీ, జనసేన మధ్య రాజకీయ పరిస్థితి బహిర్గతం

2024 ఎన్నికల్లో టీడీపీ, జనసేన, బీజేపీ కూటమి విజయం సాధించినప్పటికీ, అధికార భాగస్వామ్యంలో ఘర్షణలు తలెత్తుతున్నాయి. ఏపీపీసీబీ వివాదం దీనికి అద్దం పట్టింది. టీడీపీ ఎమ్మెల్యే బొండా ఉమా ఆరోపణలు జనసేన అధినేత పవన్ కళ్యాణ్‌ను టార్గెట్ చేయడం, కూటమి ఐక్యతను బహిర్గతం చేసింది. వైఎస్సార్‌సీపీ నేతలు దీనిని వినియోగించుకుని, "టీడీపీ, జనసేన మధ్య విభేదం హఠాత్తుగా పేలి బయట పడింది" అని ప్రచారం చేస్తున్నారు.

ఇది కూటమి ఐక్యతపై ప్రశ్నలు లేవనెత్తుతుంది. 2024లో అలయన్స్ ఏర్పడినప్పటికీ... అధికార భాగస్వామ్యంలో టెన్షన్స్, ముఖ్యంగా పవన్ కళ్యాణ్ పోర్ట్‌ ఫోలియోలపై టీడీపీ అసమ్మతి, బయటపడుతున్నాయి. బోర్డు చైర్మన్ కృష్ణయ్య చంద్రబాబు సన్నిహితుడు కావడం, బొండా ఉమా బ్లాక్‌ మెయిలింగ్ ఆరోపణలు, ఇవి టీడీపీ లోపలి డైనమిక్స్‌ను సూచిస్తాయి. పవన్ కళ్యాణ్ "త్రిశూల్ స్ట్రాటజీ"తో కూటమి సమానత్వాన్ని ప్రకటించినప్పటికీ, ఇటువంటి ఘర్షణలు దీర్ఘకాలిక ప్రభావం చూపుతాయి. 2025లో కూటమి సమన్వయం లేకుండా పోతుందా అనేది కాలమే చెబుతుంది.

పొల్యూషన్ కంట్రోల్ బోర్డు ఆఫీస్

ఏపీపీసీబీ నిర్లక్ష్యం, సిబ్బంది ఖాళీలు, పాలనా వైఫల్యాలు

ఏపీపీసీబీ నిర్లక్ష్యానికి ప్రధాన కారణం సిబ్బంది కొరత. బోర్డులో అనేక ఖాళీలు ఉన్నాయి. గత ప్రభుత్వం రిక్రూట్‌మెంట్ బ్యాన్ విధించడం, బడ్జెట్ లోపాలు ఇందుకు కారణాలు. 2023లో అసిస్టెంట్ ఎన్విరాన్‌మెంటల్ ఇంజినీర్ పోస్టులకు నోటిఫికేషన్ ఇచ్చినప్పటికీ, భర్తీ ప్రక్రియ ఆలస్యమవుతోంది. విశాఖలో బోర్డు పనితీరు లోపాలు, పోల్యూషన్ చెక్ చేయలేకపోవడం వంటివి ఇందుకు ఉదాహరణలు.

ప్రస్తుత ప్రభుత్వం ఇంకా ఖాళీలు భర్తీ చేయకపోవడం ఆందోళనకరం. పవన్ కల్యాణ్ బోర్డును బలోపేతం చేయాలని పిలుపు నిచ్చినప్పటికీ, కాలుష్య నియంత్రణలో ఫలితాలు కనిపించడం లేదు. గత ప్రభుత్వం గ్రీవెన్స్ మెకానిజమ్‌ను ఇగ్నోర్ చేసినట్టు, ప్రస్తుతం కూడా రాజకీయ ఒత్తిళ్లు బోర్డు స్వతంత్రతను దెబ్బతీస్తున్నాయి. ఇది పారిశ్రామిక అభివృద్ధి, పర్యావరణ సంరక్షణ మధ్య సమతుల్యతను దెబ్బతీస్తుంది.

ఏపీపీసీబీ వివాదం కూటమి అంతర్గత ఘర్షణలకు, పాలనా లోపాలకు సూచిక. పవన్ కళ్యాణ్ చర్యలు అభినందనీయం. టీడీపీ, జనసేన మధ్య సమన్వయం లేకుండా పోతే, రాష్ట్ర అభివృద్ధి ప్రభావితమవుతుంది. ఇది ప్రభుత్వానికి వార్నింగ్ బెల్. రాజకీయాలు పాలనను మింగకుండా చూసుకోవాలి!