గోడ నిర్మాణంలో క్వాలిటీ లేదు..అందువల్లే ప్రమాదం జరిగింది

గోడ నిర్మాణానికి సంబంధించి దేవాలయం మాస్టర్‌ ప్లాన్‌ నిబంధనలకు అనుగుణంగా జరిగిందా? లేదా? అనే దానిని నిర్థారించే పనిలో కమిటి నిమగ్నమైంది. దీంతో పాటుగా గోడ నిర్మాణాన్ని నిర్మాణం చేపట్టిన కాంట్రాక్టర్‌ ఎవరు? దానికి అనుమతులు ఇచ్చిన అధికారులు ఎవరు? వాళ్ల ప్రమేయం ఎంత మేరకు ఉంది? వంటి పలు అంశాలపైన కూడా కమిటీ విచారణ చేపట్టనుంది. గోడ నిర్మాణంపైన, ప్లాన్‌కు సంబంధించిన అంశాలను, లోపాలపైన ఓ సమగ్రమైన నివిదేకను రూపొందించి ప్రభుత్వానికి అందజేయనున్నారు.

సింహాద్రి అప్పన్న స్వామి సన్నిధిలో చందనోత్సవం సందర్భంగా గోడ కూలి చోటు చేసుకున్న ప్రమాదంలో ఏడుగురు భక్తులు ప్రాణాలు పోగొట్టుకున్నారు. ఈ ప్రమాద ఘటనపై కూటమి ప్రభుత్వం ఉన్నతాధికారులతో కూడిన ఒక కమిటీని ఏర్పాటు చేసింది. పురపాలక శాఖ ముఖ్య కార్యదర్శి ఎన్‌ సురేష్‌కుమార్‌ను దీనికి హెడ్‌గా ఏర్పాటు చేశారు. గంజాయి, ఇతర నిషేధిత డ్రగ్స్‌ మీద ఎక్సైజ్‌ శాఖ ప్రత్యేకంగా ఏర్పాటు చేసిన ఈగల్‌ వింగ్‌ అధికారి ఐజీ ఆర్కే రవికృష్ణ, ఇరిగేషన్‌ శాఖ ఇంజనీర్‌ ఇన్‌ చీఫ్‌ ఎం వెంకటేశ్వరరావులను కమిటీలో సభ్యులు ఏర్పాటు చేశారు. బుధవారం ఈ కమిటీని సీఎం చంద్రబాబు ఏర్పాటు చేశారు. 72 గంటల్లో ప్రమాదానికి గల కారణాలకు సంబంధించి ప్రాథమిక నివేదిక ఇవ్వాలని కమిటీని ఆదేశించారు. దీంతో గురువారం ఈ కమిటీ రంగంలోకి దిగింది. క్షేత్ర స్థాయి పరిశీలన చేపట్టిన ఈ కమిటీ గోడ కూలిపోవడంతోనే ప్రమాదం జరిగిందని తేల్చింది.