బస్ మంటల్లో నెల్లూరు ఇంజినీర్ కుటుంబం

ఈ ప్రమాదంలో మరణించిన వారిలో నెల్లూరు కు చెందిన సాఫ్ట్ వేర్ ఇంజినీర్ రమేష్ కుటుంబం ఉంది. రమేష్, ఆయన భార్య, ఇద్దరు పిల్లలు ఉన్నట్టు సమాచారం అందింది.

రమేష్ బెంగళూరులో ఉద్యోగం చేస్తున్నారు. ఆయనకు ఇద్దరు పిల్లలు. హైదరాబాద్ నుంచి బెంగళూరు వెళుతుండగా ఈ ప్రమాదం జరిగింది.  వింజమూరు మండలం గొల్లవారి పాలెంకు చెందిన గొల్ల రమేష్ కుటుంబం బెంగళూరులో స్థిరపడింది.

హైదరాబాద్ నుంచి సుమారు 44 మంది ప్రయాణికులతో కావేరీ ట్రావెల్స్‌కు చెందిన ప్రైవేట్ బస్సు బెంగళూరుకు బయలుదేరింది. బస్సు కల్లూరు మండలం చిన్నటేకూరు సమీపంలోకి రాగానే బైకును ఢీకొట్టింది. దీంతో బస్సు ముందు భాగంలో మంటలు వ్యాపించాయి. చూస్తుండగానే మంటలు బస్సు మొత్తం వ్యాపించాయి. అప్రమత్తమైన 12 మంది ప్రయాణికులు బస్సు అద్దాలను పగలగొట్టి కిందకు దూకేశారు. మిగతా ప్రయాణికులు మంటల్లో ప్రాణాలు కోల్పోయినట్లు తెలుస్తోంది. గాఢ నిద్రలో ఉన్న ప్రయాణికులు తేరుకొని హాహాకారాలు చేస్తూ కొందరు బయటపడగా, పలువురు మంటల్లోనే చిక్కుకున్నారు. పలువురు ప్రాణాలు కోల్పోయారు.