వణికిస్తున్న 'దానా' తుపాను, 200కి పైగా రైళ్ల రద్దు

తూర్పుమధ్య బంగాళాఖాతంలో ఏర్పడిన ‘దానా’ తుపానుతో ఒడిశా, పశ్చిమ బెంగాల్ రాష్ట్రప్రభుత్వాలు ముందస్తు జాగ్రత్తలు తీసుకుంటున్నాయి. ఈ తుపాను పారాదీప్ (ఒడిశా)కి ఆగ్నేయంగా, సాగర్ ద్వీపానికి (పశ్చిమ బెంగాల్) దక్షిణ ఆగ్నేయంగా కేంద్రీకృతమై ఉంది. ‘దానా’ తుపాను (సైక్లోన్ దానా) ప్రభావంతో దక్షిణ మధ్య రైల్వే తాజాగా 200కి పైగా రైళ్లను రద్దు చేసింది. ప్రయాణికుల భద్రతను దృష్టిలో ఉంచుకొని కొన్ని రైళ్లను దారిమళ్లించింది. 23, 24, 25, 26, 27, 29 తేదీల్లో పలు రైళ్లను రద్దు చేసింది. ఈ తుపాను నేపథ్యంలో తెలుగు రాష్ట్రాల్లోని ముఖ్య కేంద్రాల్లో రైళ్ల రాకపోకల సమాచారం కోసం 17 నగరాలు, పట్టణాల్లో హెల్ప్‌లైన్ నంబర్లను ఏర్పాటు చేసింది. ఇప్పటివరకు దాదాపు 200 రైళ్ల సర్వీసులను రద్దు లేదా దారిమళ్లించింది.

తుపానుతో ఒడిశా ప్రభుత్వం అప్రమత్తమైంది. ముందస్తు చర్యల్లో భాగంగా ఇప్పటికే 23వ తేదీ నుంచి 25 వరకు జరగాల్సిన పరీక్షలను రద్దు చేసింది. ఈ నెల 27న జరగాల్సిన ఒడిశా సివిల్‌ సర్వీస్‌ ప్రిలిమినరీ పరీక్షను సైతం వాయిదా వేశారు. కొత్త తేదీని తర్వాత ప్రకటిస్తారు. ఈ నెల 24, 25 తేదీల్లో నందన్‌కానన్‌ జూ, బొటానికల్‌ గార్డెన్‌లకు సందర్శకులను అనుమతించరాదని నిర్ణయించారు. 23 నుంచి 25 వరకు సిమిలిపాల్‌ టైగర్‌ రిజర్వు, భిటార్కనిక జాతీయ పార్కులను మూసివేశారు. తుపాను సమయంలో మూగ జీవాలకు ఆశ్రయం కల్పించాలని మత్స్య, పశుసంవర్ధక శాఖ మంత్రి గోకులానంద మల్లిక్‌ ప్రజలకు విజ్ఞప్తి చేశారు. 1962 హెల్ప్‌లైన్‌కు ఫోన్ చేసి సమాచారం కనుక్కోవచ్చు. అక్టోబర్ 24వ తేదీ రాత్రి - అక్టోబర్ 25 ఉదయంలోపు ఉత్తర ఒడిశా, పశ్చిమ బెంగాల్ సమీపంలో పూరీ, సాగర్ ద్వీపం మధ్య తీరం దాటే అవకాశం ఉంది.