ఘనంగా ముగిసిన ఇంద్రకీలాద్రి దసరా ఉత్సవాలు

రాష్ట్ర దేవాదాయ శాఖ మంత్రి ఆనం రాంనారాయణరెడ్డి, ఆ శాఖ కమిషనర్‌ రామచంద్రమోహన్, దుర్గగుడి ఈవో శీనా నాయక్‌ ఈ కార్యక్రమంలో పాల్గొన్నారు. ఆలయ స్థానాచార్యులు విష్ణుభొట్ల శివప్రసాదశర్మ పర్యవేక్షణలో పండితులు యాగశాలలో పూర్ణాహుతి, కలశ ఉద్వాసన ఇతర వైదిక కార్యక్రమాలను నిర్వహించారు.

విజయదశమి రోజున రాజరాజేశ్వరిదేవి అలంకరణలో అమ్మవారిని దర్శించుకునేందుకు భక్తులు భారీ సంఖ్యలో తరలివచ్చారు. ‘భక్తులకు ఎలాంటి అసౌకర్యం లేకుండా అన్ని ఏర్పాట్లు చేశాము,‘ అని మంత్రి ఆనం రాంనారాయణరెడ్డి తెలిపారు. పురాణ ఇతిహాసాల ప్రకారం దసరా ఉత్సవాలకు విశిష్టత ఉందని, దుర్గతులను తొలగించే సర్వోన్నత శక్తి ఆరాధన కోసం ఈ ఉత్సవాలు నిర్వహిస్తామని పండితులు పేర్కొన్నారు. ‘యాదేవి సర్వభూతేషు శక్తి రూపేణ సంస్థితా‘ అంటూ జగత్తు అంతా నిండిన పరాశక్తి అందరికీ శుభాలను అందించాలని వారు ఆకాంక్షించారు.