ఇండిగో సంక్షోభం: అసలు సమస్య ఎక్కడ మొదలైంది?

ఈ కొత్త నియమాలు రెండు దశల్లో అమలయ్యాయి. మొదటి దశ జులై 2025 నుంచి, రెండో దశ నవంబర్ 1, 2025 నుంచి మొదలైంది. రెండో దశలో రాత్రి పని సమయం ఒక గంట ముందుగానే మొదలవడం, పైలట్లు ఒక్క్కొక్కరు రోజుకు చేయగలిగే గంటలు గణనీయంగా తగ్గడం జరిగింది. ఈ మార్పు పైలట్ల ఆరోగ్యం, ప్రయాణికుల భద్రత కోసం తీసుకొచ్చినదే అయినా, ఇండిగో దీనికి ముందే సిద్ధపడలేదు.

హైరింగ్ ఫ్రీజ్ ఎంతపని చేసింది...

ఇండిగో దేశంలో 60 శాతం విమాన ప్రయాణాలను నిర్వహిస్తుంది. రోజుకు 2200కి పైగా విమానాలు నడుపుతుంది. ఇంత పెద్ద స్థాయిలో ఆపరేషన్ చేసే సంస్థకు పైలట్లు, ఎయిర్ హాస్టెస్ లేదా ఫ్లైట్ అటెండెంట్ సంఖ్యలో కొంత అదనపు బఫర్ ఉండాలి. కానీ ఇండిగో గత రెండేళ్లుగా కొత్త పైలట్లను నియమించడం ఆపేసింది. దీన్నే ఇండస్ట్రీలో “హైరింగ్ ఫ్రీజ్” అంటారు. ఫలితంగా నవంబర్ 1 నుంచి కొత్త నియమాలు అమల్లోకి వచ్చిన వెంటనే పైలట్ల కొరత తీవ్రమైంది.

విషయం	పాత నియమం	కొత్త నియమం (2025)
వారానికి విశ్రాంతి	36 గంటలు	48 గంటలు (జులై 2025 నుంచి)
రాత్రి డ్యూటీ ప్రారంభం	రాత్రి 12 గంటల నుంచి	రాత్రి 10 గంటల నుంచే (నవంబర్ 2025 నుంచి)
ఒక్కొక్క రోజు గరిష్ఠ డ్యూటీ	13 గంటల వరకు	11–12 గంటలకు తగ్గింది
రాత్రి ల్యాండింగ్‌లు	ఎక్కువ అనుమతి	గణనీయంగా తగ్గాయి

ఎందుకు తెచ్చారు?

పైలట్లు, ఎయిర్ హాస్టెస్‌లు ఎక్కువ గంటలు పనిచేస్తే అలసట వల్ల ప్రమాదాలు జరిగే అవకాశం ఉంది. గతంలో జరిగిన కొన్ని ప్రమాదాల తర్వాత ప్రపంచవ్యాప్తంగా ఈ నియమాలు కఠినం చేశారు. భారత్ కూడా DGCA ద్వారా ఈ కొత్త FDTL తెచ్చింది.

రోజుకు 200 విమానాలు రద్దు

ఒక పైలట్ డ్యూటీ పూర్తయితే, తర్వాత విమానం నడపడానికి మరో పైలట్ సిద్ధంగా లేకపోతే మొత్తం షెడ్యూల్ కూలిపోతుంది. ఇదే జరిగింది. ఒక్కో రోజు 170 నుంచి 200 విమానాలు రద్దవుతున్నాయి. నవంబర్‌లో మొత్తం 1232 విమానాలు రద్దయ్యాయి. డిసెంబర్ మొదటి వారంలో పంక్చువాలిటీ (సమయానికి బయలుదేరే శాతం) 35 శాతానికి పడిపోయింది.

ఇండిగో యాజమాన్యం డీజీసీఏ ముందు ఒప్పుకున్న మాట ఏమిటంటే... ఈ కొత్త నియమాల ప్రభావాన్ని తాము సరిగా అంచనా వేయలేదు, కాబట్టి పూర్తి స్థిరత్వం కోసం ఫిబ్రవరి 10, 2026 వరకు పడుతుందని చెప్పింది. అంటే మరో రెండు నెలల పాటు ఈ గందరగోళం కొనసాగే అవకాశం ఉంది.

ఈ సమస్య ఇండిగోకు మాత్రమే ఎందుకు వచ్చింది?

ఎయిర్ ఇండియా, ఆకాశ ఎయిర్, స్పైస్‌జెట్ వంటి ఇతర సంస్థలు కూడా ఇదే నియమాలకు లోబడి ఉన్నాయి. కానీ వాళ్లకు ఇంత తీవ్ర సమస్య లేదు. ఇండిగో స్కేల్ చాలా పెద్ది. అదనపు సిబ్బంది లేకుండా టైట్ షెడ్యూల్ నడిపే అలవాటు ఉంది. మిగతా సంస్థలు ముందుగానే పైలట్లను నియమించుకుని సిద్ధంగా ఉంచాయి.

ప్రయాణికులు తీవ్ర ఇబ్బంది

ప్రయాణికులు ఈ రోజుల్లో తీవ్ర ఇబ్బంది పడుతున్నారు. హైదరాబాద్, బెంగళూరు, ఢిల్లీ, ముంబై విమానాశ్రయాల్లో గంటల తరబడి వేచి ఉండాల్సి వస్తోంది. చాలా మంది ఇతర ఎయిర్‌లైన్స్ టికెట్లు కొనాల్సి వచ్చింది. అవి రెండింతలు, మూడింతలు ధర పలుకుతున్నాయి. సోషల్ మీడియాలో #IndiGoFail ట్రెండ్ అవుతోంది.

ఇండిగో ఇప్పుడు భారీ ఎత్తున పైలట్లు, క్యాబిన్ క్రూను నియమిస్తోంది. కానీ కొత్తగా వచ్చిన వాళ్లకు శిక్షణ ఇవ్వడం, వాళ్లను లైన్‌లోకి తేవడం అంత త్వరగా జరిగే పని కాదు. అందుకే ఫిబ్రవరి వరకు ఓపిక పట్టాల్సిందే అని సంస్థ చెబుతోంది.

ఈ సంక్షోభం ఒక ముఖ్యమైన పాఠం

ఎంత పెద్ద సంస్థ అయినా భవిష్యత్ నియమాలను ముందుగా అంచనా వేయకపోతే, లాభాల కోసం సిబ్బందిని ఆదా చేస్తే ఒక రోజు ఈ పరిస్థితి తప్పదు. ఇండిగో ఇప్పుడు ఆ తప్పును ఒప్పుకుని సరిచేసుకుంటోంది. కానీ అప్పటిదాకా ప్రయాణికులు మాత్రం ఈ ధర చెల్లించాల్సి వస్తోంది.

మీరు తదుపరి రెండు నెలల్లో ఇండిగో టికెట్ బుక్ చేసుకుంటే, ఆల్టర్నేటివ్ ప్లాన్ కూడా రెడీగా పెట్టుకోండి. లేదా ఎయిర్ ఇండియా, ఆకాశ ఎయిర్ వంటి ఇతర ఎయిర్‌లైన్స్‌ను పరిగణనలోకి తీసుకోండి. సమస్య త్వరలోనే పూర్తిగా తీరే అవకాశం కనిపించడం లేదు.