నకిలీ ఐఏఎస్‌ దొరికింది

అమృత భాగ్య రేఖ అనే యువతి నకిలీ ఐఏఎస్‌ అవతారమెత్తింది. ట్రైనీ కలెక్టర్‌ని అంటూ విశాఖలో హడావుడి చేసింది. తన మాటకారి తనంతో పలువురికి టోకరా వేసింది. ఆమె చేత మోసపోయిన బాధితులు విశాఖపట్నం కంచరపాలెం పోలీసులకు ఫిర్యాదు చేశారు. ఇంకా పలు పోలీసు స్టేషన్‌లలో కూడా ఫిర్యాదులు చేశారు. ఇది కాస్త విశాఖపట్నం పోలీసు కమిషనర్‌కు తెలిసింది. ఆమె ఒరిజినలో.. డూప్లికేటో అని నిగ్గు తేల్చేందుకు పోలీసులను రంగంలోకి దింపారు. చివరకు ఆమె అసలు కాదు నకిలీ అని నిగ్గు తేల్చారు విశాఖ సిటీ పోలీసు కమిషనర్‌ శంక బ్రత బాగ్జీ. ఆమెను పట్టుకునేందుకు డీసీపీ ఆధ్వర్యంలో మూడు బృందాలుగా రంగంలోకి దిగిన పోలీసులు గాలింపులు చేపట్టాయి.

అయితే తన కోసం పోలీసులు గాలిస్తున్నారనే విషయం తెలుసుకున్న ఆ నకిలీ మహిళా ఐఏఎస్‌ చిన్నగా అక్కడ నుంచి జారుకుంది. విశాఖ నుంచి విజయనగరం పారి పోయింది. అయినా ఆమె గురించి గాలింపులు ఆప లేదు. శుక్రవారం కూడా కొనసాగించారు. చివరికి ఆమె ఫోన్‌ సిగ్నల్‌ ఆధారంగా ఆమెను గుర్తించారు. ప్రకాశం జిల్లాలో ఉన్నట్లు గుర్తించిన పోలీసులు ఆ నకిలీ ఐఏఎస్‌ను శుక్రవారం అదుపులోకి తీసుకున్నారు. మరో వైపు ఇదే అవతారమెత్తిన ఆమె భర్త కూడా ఇది వరకే అరెస్టు కాగా ప్రస్తుతం బెయిల్‌పై బయట తిరుగుతున్నట్లు పోలీసులు గుర్తించారు.