తీరాన్ని దాటిందని అశ్రద్ధ వద్దు, పోయిన ప్రాణాన్ని తిరిగి తేలేం..

తుపాను తీరాన్ని దాటిన తర్వాత పరిస్థితిని ఆంధ్రప్రదేశ్ రాష్ట్ర ముఖ్యమంత్రి చంద్రబాబు నాయుడు సచివాలయం నుంచే సమీక్షిస్తున్నారు. ప్రాణహానీ లేకుండా జాగ్రత్తలు తీసుకోమని విజ్ఞప్తి చేస్తున్నారు. ‘మొంథా’ తుపాను ప్రభావంపై అధికారులతో వరుసగా సమీక్షలు నిర్వహిస్తున్నారు. మంగళవారం రాత్రి 8 గంటలు దాటిన తర్వాత తుపాను అంతర్వేది పాలెం వద్ద తీరాన్ని తాకింది. అయినప్పటికీ మరో నాలుగైదు గంటలు పరిస్థితి బీభత్సంగా ఉండే పరిస్థితి ఉందని చెప్పడంతో ఆయన అధికారులతో వరుస సమీక్షలు నిర్వహిస్తున్నారు.

సీఎం చంద్రబాబుతో పాటు ఆర్టీజీఎస్ కేంద్రంలో మంత్రులు నారా లోకేష్, వంగలపూడి అనిత, నారాయణ ఉన్నారు. ఆర్టీజీ సెంటర్ నుంచి వర్షప్రభావిత జిల్లాల్లో మంత్రులు, అధికారులతో ఎప్పటికప్పుడు మాట్లాడుతూ ఆదేశాలు జారీ చేస్తున్నారు. ఎంత చిన్న పల్లెటూరైనా, లంక గ్రామామైనా తుపాను సహయక చర్యలు అందేలా చూడాలని సీఎం ఆదేశాలు జారీ చేశారు.

పునరావాస శిబిరాల్లో పరిస్థితిని అడిగి తెలుసుకుంటున్నారు. జిల్లాలకు వెళ్లిన మంత్రులు, ప్రత్యేకాధికారులతో సీఎం నిరంతరం సంప్రదింపులు జరుపుతున్నారు. ఇక ఏపీలోని తుపాను పరిస్థితిపై సీఎంకు కేంద్ర మంత్రి అశ్వినీ వైష్ణవ్ ఫోన్‌ చేసి మాట్లాడారు.