చిత్తూరు: నకిలీ మద్యం ఫ్యాక్టరీనే ఏర్పాటు చేశారు...

తంబళ్లపల్లె నియోజకవర్గం ములకలచెరువు మండలం జాతీయ రహదారిపై ఉంటుంది. దీనికి సమీపంలోనే ఉన్న ఓ ప్రదేశంలో చాలా రోజుల నుంచి నకిలీ మద్యం తయారు చేయడానికి ఓ ఫ్యాక్టరీ తరహాలోనే యంత్రాలు, వర్కర్లను ఏర్పాటు చేసుకున్నారు. ఈ విషయంపై ఎక్సైజ్ శాఖకు సమాచారం అందినట్లు తెలిసింది. వివరాలు సేకరించిన కడప ఎక్సైజ్ అసిస్టెంట్ కమిషనర్ చంద్రశేఖరరెడ్డి సారధ్యంలోని సిబ్బంది, ములకలచెరువు పోలీసులు దాడులు నిర్వహించారు.

"నకిలీ మద్యం ఫ్యాక్టరీ నుంచి సెమీ ఆటోమేటిక్ యంత్రాలు రెండు. ఓ యంత్రం సీసాలకు మూతలు బిగిస్తుంది. 35 లీటర్ల మద్యం నింపే క్యాన్లు, నకిలీ మూతలు, లేబుల్లు, హోలో గ్రామ్స్ భారీగా స్వాధీనం చేసుకున్నాం" అని ఎక్సైజ్ అసిస్టెంట్ సూపరింటెండెంట్ చంద్రశేఖరరెడ్డి వివరించారు.

మద్యం నింపిన 40 బాక్సులు (ఒకో బాక్సులో 45 క్వార్టర్ బాటిళ్లు కూడా ఉన్నాయని ఆయన వివరించారు. పెద్దతిప్పసముద్రంలో ఆంధ్రా వైన్స్ పేరిట లైసెన్స్ దక్కించుకున్న నిర్వాహకుడిని కూడా అరెస్టు చేశామని తెలిపారు. ఘటనా స్థలంలో తమిళనాడు నుంచి వచ్చిన నలుగురిని, ఇద్దరు ఒరిస్పా కార్మికులు, విజయవాడకు చెందిన ఓ వ్యక్తిని కూడా అదుపులోకి తీసుకున్నట్లు చెప్పారు నర్సీపట్టణం ప్రాంతానికి చెందిన వాహన డ్రైవర్ జనార్థనరావు, ఇతని అనుచరుడు రాజు కూడా అదుపులో ఉన్నాడని తెలిపారు. ఇతని ద్వారానే మద్యం తయారీకి కూలీలను తీసుకుని వచ్చారని ప్రాథమిక దర్యాప్తులో గుర్తించామని ఆయన చెబుతున్నారు. భవన యజమాని లక్ష్మీనారాయణ బెంగళూరులో ఉంటారు. డాబా హెటల్ నిర్వహణకు రామ్మోహన్ అనే వ్యక్తికి అద్దెకు ఇచ్చాడని ఆయన ఖాళీ చేయడంతో నకిలీ మద్యం తయారీ కేంద్రం ప్రారంభించిన విషయం దర్యాప్తులో తేలిందని ఎక్సైజ్ ఏసీ చంద్రశేఖరరెడ్డి వివరించారు.