చిరంజీవికి అవమానమా? : బాలకృష్ణ ఆగ్రహం

మెగాస్టార్, డిప్యూటీ సీఎం పవన్‌ కల్యాణ్‌ అన్నయ్య చిరంజీవి గురించి ఆంధ్రప్రదేశ్‌ అసెంబ్లీలో ఆసక్తికర చర్చ జరిగింది. దీనిపైన మాట్లాడుతూ నందమూరి బాలకృష్ణ తీవ్ర ఆగ్రహం వ్యక్తం చేశారు. హిందూపురం ఎమ్మెల్యే, ప్రముఖ నటుడు నందమూరి బాలకృష్ణ వైసీపీ ప్రభుత్వ హయాంలో సినీ ప్రముఖులకు అవమానం జరిగిందంటూ ఆంధ్రప్రదేశ్‌ అసెంబ్లీలో గురువారం నాడు తీవ్ర ఆగ్రహం వ్యక్తం చేశారు. గతంలో సినీ పరిశ్రమ సమస్యలపై చర్చించేందుకు నాటి ముఖ్యమంత్రి వైఎస్‌ జగన్‌మోహన్‌రెడ్డిని కలిసేందుకు సినీ ప్రముఖులు తాడేపల్లి వెళ్లిన సందర్భంలో జగన్‌ వారిని కలవకపోవడం, సినిమాటోగ్రఫీ మంత్రిని కలవమని సూచించడం ద్వారా తీవ్ర అవమానం జరిగిందని బీజేపీ ఎమ్మెల్సీ కామినేని శ్రీనివాస్‌ అసెంబ్లీలో వ్యాఖ్యానించారు.