తిరుమల ఘాట్ రోడ్డులో హాలీవుడ్ స్టంట్..

తమిళనాడుకు చెందిన యాత్రికులు నలుగురు ఓ కారులో తిరుమల శ్రీవారి దర్శనానికి బయలుదేరారు. అలిపిరి తనిఖీ కేంద్రం దాటుకున్న వారు మితిమీరిన వేగంతో ప్రయాణిస్తున్నారని తెలిసింది. వేగంగా ప్రయాణిస్తున్న కారణంగా మలుపు వద్ద అదుపు చేయలేక పిట్టగోడను ఢీకొట్టిన ఈ కారు రోడ్డుపై అడ్డంగా బోల్తా పడినట్లు తెలుస్తోంది.  ఈ ప్రమాద సమాచారం అందుకున్న వెంటనే టిటిడి విజిలెన్స్ అండ్ సెక్యూరిటీ విభాగం సిబ్బంది స్పందించారు. గాయపడిన బాధితులను తిరుమలలోని టిటిడి అశ్వని ఆసుపత్రికి తరలించారు.

తిరుపతి నుంచి తిరుమలకు వెళ్లాలంటే రెండో ఘాట్ రోడ్లో ప్రయాణం చేయాలి. 19 కిలోమీటర్ల దూరం ప్రయాణించడానికి టిటిడి విజిలెన్స్ అండ్ సెక్యూరిటీ విభాగం వాహనాల వేగానికి కళ్లెం వేసే దిశగా నిర్దిష్ట సమయాన్ని నిర్ణయించింది. ప్రతి వాహనం 30 నుంచి 40 నిమిషాల పాటు ప్రయాణించడానికి వీలుగా ఆంక్షలు విధించారు. అంటే వాహనం మెల్లగా నడుపుతూ ప్రమాదాలను నివారించాలని ఇందులో ప్రధాన ఉద్దేశం.

తిరుపతి నుంచి తిరుమలకు కానీ, తిరుమల నుంచి తిరుపతికి రావడానికి ఇదే సమయం వర్తిస్తుంది. తిరుమలకు వెళ్లే సమయంలో మొదటి ఘాట్ రోడ్లో ప్రకృతి ఆహ్లాదంగా ఉంటుంది. అయితే సరైన నిఘా లేకపోవడం వల్ల వాహనదారులు ఇష్టానుసారంగా  ర్యాష్ర డ్రైవింగ్ చేయడం పరిపాటిగా మారుతుంది. ముందు వెళ్లే వాహనాలను అధిగమించే ప్రయత్నంలో కూడా ప్రమాదాలు జరుగుతున్నాయి.