బాక్సింగ్ డే టెస్ట్ లో అయినా టాప్ ఆర్డర్ పరుగులు సాధించాలి: జడేజా

" మీరు భారతదేశం వెలుపల, ముఖ్యంగా ఆస్ట్రేలియా, దక్షిణాఫ్రికాలో ఆడుతున్నప్పుడు టాప్-ఆర్డర్ పరుగులు చాలా ముఖ్యమైనవి. టాప్ ఆర్డర్ పరుగులు చేయనప్పుడు, లోయర్ ఆర్డర్‌పై బాధ్యత, ఒత్తిడి పెరుగుతుంది," అని MCGలో జరిగిన విలేకరుల సమావేశంలో జడేజా చెప్పారు.

" ఈ టెస్టులో టాప్-ఆర్డర్, మిడిల్ ఆర్డర్ బాగా రాణిస్తారని ఆశిస్తున్నాము. జట్టుగా, మాకు టాప్ ఆర్డర్ ప్రదర్శన అవసరం. బ్యాటింగ్ యూనిట్‌లో ప్రతి ఒక్కరూ సహకరిస్తే, జట్టు బాగా రాణిస్తుంది." బ్రిస్బేన్‌లో భారత టాప్-ఆర్డర్ పోరాడింది. ఓపెనర్ KL రాహుల్ 84 పరుగులు చేశాడు. మిగిలిన టాప్, మిడిల్ ఆర్డర్ కుప్పకూలింది.

జడేజా ఆదుకోకపోయింటే మ్యాచ్ చేజారేది. చివర్లో జస్ప్రీత్ బుమ్రా - ఆకాష్ దీప్ మధ్య చివరి వికెట్ భాగస్వామ్యంతో ఫాలో ఆన్ తప్పిపోయింది. మొదటి రెండు మ్యాచ్‌లకు దూరం కావడం తనకు మేలు చేసిందని, ఇక్కడి పరిస్థితులకు అలవాటుపడి గబ్బా టెస్టుకు సిద్ధమయ్యేందుకు వీలు కల్పించిందని జడేజా చెప్పాడు.

సిరీస్ 1-1తో సమంగా ఉండటంతో, బోర్డర్-గవాస్కర్ ట్రోఫీని నిలబెట్టుకోవడానికి భారత్‌కు మిగిలిన మ్యాచ్‌ల్లో కేవలం ఒక విజయం అవసరం. ఇదే విషయాన్ని జడేజా నొక్కి చెప్పారు.

బ్రిస్బేన్ టెస్టులో వెటరన్ ఆఫ్ స్పిన్నర్ రవిచంద్రన్ అశ్విన్ రిటైర్మెంట్ తనకు ఆశ్చర్యం కలిగించిందని జడేజా చెప్పారు. విలేకరుల సమావేశం జరగడానికి ఐదు నిమిషాల ముందు తనకు నిర్ణయం తెలిసిందని జడ్డూ తెలిపారు.

"ఇది జరగబోతోందని ఎవరో చెప్పారు. రోజంతా కలిసి గడిపాము, అతను నాకు సూచన కూడా ఇవ్వలేదు. చివరి నిమిషంలో నాకు తెలిసింది. అశ్విన్ మనస్సు ఎలా పనిచేస్తుందో మనందరికీ తెలుసు." అశ్విన్ 24 సగటుతో 537 టెస్ట్ వికెట్లు, ఆరు సెంచరీలతో సహా 3,503 పరుగులతో రిటైర్ అయ్యాడు. వన్డేల్లో 156, టీ20ల్లో 72 వికెట్లు కూడా సాధించాడు.

"అతను నా మైదానంలో మెంటార్‌గా ఆడాడు. మేము బౌలింగ్ భాగస్వాములుగా చాలా సంవత్సరాలు కలిసి ఆడుతున్నాము. మేము మ్యాచ్ పరిస్థితికి సంబంధించి మైదానంలో ఒకరికొకరు సందేశాలను పంపుతూనే ఉన్నాము. యాష్ ను ఇక నేను మిస్ అవుతా." అన్నారు. ఈ ద్వయం 58 మ్యాచ్‌లలో 587 వికెట్ల కూలగొట్టి చిరస్మరణీయ విజయాలు అందించారు. అశ్విన్ రిటైర్మెంట్ తర్వాత, జట్టుకు సరైన ప్రత్యామ్నాయం దొరుకుతుందని ఆశాభావం వ్యక్తం చేశాడు.