తిరుపతి కొండల్లో యోగుల పర్వతానికి ట్రెక్

ఎవరో చెప్పారు అప్పలాయ కుంట దగ్గిర ఒక చూడముచ్చటయిన ప్రదేశం ఉందని. దాన్నిచూడ్డానికి ఒక నలుగురం బయలుదేరాం. దీని గురించి ఏ రకమయిన సంగతులు తెలియవు. ఒక రెండు గంట్లలో పోయిరావచ్చనుకున్నాం ఎందుకంటే, ఇది తిరుపతికి కేవలం 24 కి.మీ దూరానే ఉంటుంది. ఈ ప్రదేశం మీద ఎందుకు ఆసక్తి కలిగిందంటే, దీని పేరులో పర్వతం అంటే ఎత్తయిన కొండ అనే మాట ఉంది.

తిరుపతి చుట్టుపక్కల ప్రదేశాలలోఉండేవన్నీ చిన్నచిన్నగుట్టలే. ఇది చాలా ఎత్తయిన కొండ. దీని పేరు యోగుల పర్వతం. ఒకపుడు దీనిని ఉత్తర కొండ అనీ యానాదుల కొండ,యమయ్య కొండ అని పిలిచే వారు. ఒక రెండేళ్లుగా మాత్రమే ఇది బాగా ప్రచారంలోకి వస్తూ ఉంది. అక్కడ ప్రతాప్ స్వామి అనే ఒక స్వామి ఉన్నాడు. ఆయన ఈ కొండప్రాంతాన్ని అభివృద్ది చేసే సంకల్పం ఉన్న వాడు.

ప్రతాప స్వామికి ఫోన్ చేసి వస్తున్నాం అని చెప్పాగానే, ఆయన ఆహ్వానించాడు. నేను తెలుసని కూడా చెప్పాడు. అయితే, ఈ కొండ తిరుపతి నుంచి ఎంత దూరమనే విషయాన్ని ఆయన కూడా కచ్చితంగా చెప్పలేకపోయాడు.

అప్పలాయగుంట నుంచి ఒక అయిదు కిలో మీటర్లుంటుంది. అక్కడి వెళ్లాక పర్వతం ఎక్కాలి. ఎక్కేందుకు పడమర తూర్పున రెండు దారులున్నాయి.

ఈ కొండ గురించి చుట్టుపక్కల గ్రామస్థులతో మాట్లాడాం. వాళ్ళలో రకరకాల కథలు ప్రచారంలో ఉన్నాయి. వెంకటేశ్వర స్వామి, పద్మావతి అమ్మవారు వివాహమయ్యాక వారం రోజులు హానీ మూన్ కు ఇక్కడికే వచ్చి విహరించారని కొందరు చెప్పారు. వెంకటేశ్వరస్వామి , పద్మావతి దాంపత్య జీవితం ఇక్కడే ప్రారంభమయింది కాబట్టి ఇది చాలా పవిత్రమయిందనే భావన అక్కడి ప్రజల్లో ఉంది.

అయితే, ఈ ప్రదేశం, ఇక్కడి ప్రకృతి సౌందర్యం గురించి ప్రపంచానికి పెద్దగా తెలియదు. కొన్నాళ్లు అక్కడ అబ్రకం ఉందనే ప్రచారం జరిగింది. కొంతమంది ఇనుప ఖనిజం ఉందని అన్నారు. దానితో కొందరు ఈ కొండను తవ్వడానికి కూడా ప్రయత్నించారు.

అయితే, స్థానికులు అభ్యంతర పెట్టడంతో ఈ ప్రయత్నాలు సాగలేదు. ఇపుడు ఈ ప్రతాప్ స్వామిరావడంతో కొండ చుట్టు పక్కల పల్లెల్లో ప్రాచుర్యం పొందింది.

ఈ కొండను చాలా నిటారుగా ఎక్కాలి. మొత్తం యాత్రంతా రెండు మూడు గంట్లో ముగించుకుని రావాలని మేము బయలుదేరాం. కాని మాకు ఎక్కడానికే మూడుగంటలు పట్టింది. ఎక్కడా సమతలం లేదు. ఒక కిలోమీటరు ఎక్కిన తర్వాత అద్భుతమయిన జలపాతం కనిపించి కనువిందు చేసింది. ఆ జలపాతం వెంబడి కొంతదూరం ప్రయాణించాం. అక్కడి నుంచి ఎడమ వైపున ఉన్న కొండ ఎక్కాం. శిఖరం మీద గొప్ప అనుభవం ఎదురయింది.

మేం వెళ్లేసరికి అక్కడికి కొందరు గిరిజన స్త్రీలు కూడా చేరుకున్నారు. కార్తీక పౌర్ణమి సందర్బంగా అక్కడ రెండువేల మందికి భోజనాలు ఏర్పాటుచేస్తున్నారు. మమ్మల్ని కూడా రాత్రికి అక్కడే భోజనాలు చేసి పొమ్మని చెప్పారు. అయితే, మాకు వీలుకాలేదు. మేము ఆ ప్రదేశాలన్నీ కలియతిరిగేందుకు వచ్చాం కాబట్టి అపని ముగించుకోవాలనుకున్నాం. కాబట్టి కార్తీక దీపాన్ని చూల్లేక పోయాం.

నేనింతకాలం తిరుపతి చుట్టుపక్కల తిరిగినవన్నీ ఈ కొండతో పోలిస్తే మరుగుజ్జులే. రెండు గంటల పాటు ఆ ప్రదేశాలన్నీ కలియతిరిగాం. కొండమీదకు చేరుకునేందుకు వాళ్లు చేసిన ఏర్పాట్లు చూస్తే ముచ్చటేసింది.చక్కటి దార్లు వేశారు.వచ్చేవాళ్ల కు ఎలాంటి ఇబ్బందిలేకుండా ముళ్లకంప అడ్డం కాకుండా శుభ్రం చేశారు. దీన్నంతా చూస్తే ముందు ముందు ఈ ప్రదేశం బాగా ప్రాముఖ్యం సంతరించుకుంటుందేమోనని నాకు అనిపించింది.

ఈ కొండపైనుంచి అలాగే వెళ్లే రాయలచెరువు కొండలొస్తాయని చెప్పారు.మేము దానికి సిద్ధమయి వెళ్లలేదు కాబట్టి, ఆ ప్రయత్నం చేయలేకపోయాం.

ఈ ప్రాంతంలో నేను చాలా ప్రదేశాలు తిరిగాను. అన్నింటికంటే ఇదే ప్రత్యేకమయింది. చాలా పెద్ద ట్రెక్ ఇది. ఒక విధంగా సాహసోపేతమయిన ట్రెకింగ్ కూడా అని చెప్పవచ్చు. తిరుపతికి ఇంత సమీపాన ఇంతఅందమయిన పర్వతం ఉందంటే నమ్మలేం.

ఎక్కడెక్కడో ఇతర రాష్ట్రాలలలో ఉండే పర్వత క్షేత్రాలకు ప్రజలు వెళ్లి వస్తుంటారు. అయితే, ఇది చూశాక, ఇది మొదటచూడాల్సిన పర్వతం అనిపించింది. ఇది ఇంకా చెక్కు చెదరని ప్రకృతి. ఇక్కడి జలపాతాలు, పక్షలు కిలకిలా రావాలు, రకరకాల జంతువులు. చెప్పనలివికాని ప్రకృతి సౌందర్యం ఇక్కడ ఆస్వాదించవచ్చు. ఇక్కడి జలపాతాల నీళ్లన్ని సమీపంలోని గాలేరు నగరి కాలువలో చేరి అక్కడి వ్యవసాయానికి ఉపయోగపడుతున్నాయి. ఈ అడవిలో చందనం చెట్లు లేవు. ఉండేవన్నీ టేకు చెట్లే. వీటిని కొట్టే ప్రయత్నాలు చేస్తే విజయవంతంగా అడ్డుకున్నారు.

==

సెయింట్ లూయిస్ నగరం

గట్ వే ఆర్చ్ నేషనల్ పార్కు :-

అమెరికా లోని మిస్సోరి రాష్ట్రంలో సెయింట్ లూయీస్ నగరం ఉన్నది . అమెరికా లో ఉన్న నేషనల్ పార్కుల అన్నింటిలో తక్కువ స్థలంలో ఏర్పాటయింది. దీని విస్తీర్ణం 93 ఎకరాలు మాత్రమే. పక్కనే మిస్సారి నది మీసిసిపి నదుల సంగమం ఉన్నది. దానిలో పడవ ప్రయాణం చేసే ఏర్పాటు ఉన్నది.

అర్ధ చంద్రాకారం లో ఉన్న స్టెయిన్లెస్ స్టీలు నిర్మాణం. దీని రూపశిల్పి ఈరో సారినన్. 1963 ఫిబ్రవరి 12 తేదీన మొదలైన నిర్మాణం 1965 అక్టోబర్ కు పూర్తయింది. జూన్ 10 - 1967 లో దీనిని ప్రారంభించారు. దీనిని అమెరికా ప్రజలకు అంకితం చేశారు. దీని ఎత్తు 630 అడుగులు. ప్రపంచం లోనే ఎత్తైన ఆర్చీ. దీనిలో ఒకసారికి 160 మంది ఎక్కవచ్చు. ఒక ట్రాం లో ఐదుగురు కూర్చోవడానికి వీలుగా ఉంటుంది. పైకి వెళ్ళడానికి నాలుగు నిమిషాలు దిగడానికి మూడు నిమిషాల సమయం పడుతుంది. పైన ఎని మిది నిమిషాలు ఆగుతుంది. పై నుంచి చూసినప్పుడు ఫెడరల్ కోర్టుభవనం తోపాటు సెయింట్ లూయిస్ నగరం కనిపిస్తుంది. మరోవైపు నది కనిపిస్తుంది. ప్రయత్నించి మరింత ముందుకు వంగి చూస్తే మనం ఉన్న ఆర్చీ సగభాగం కనిపిస్తుంది. పైన ఆగిన సమయంలో ఫోటోలు తీసుకోవచ్చు. అమెరికా సివిల్ వార్ కు సంబంధించిన చాలా ఫోటోలు అక్కడ ఉన్నాయి. ట్రాం ప్రయాణం పదిహేను నిమిషాలే అయినా ఒక గంట ముందునుంచే సందర్శకులు అక్కడ ఉండాలి. సిబ్బంది దానికి సంబంధించిన విశేషాలు మనకు వివరిస్తారు. ఇరుకుగా కనిపించే అర్థ చంద్రాకారంలో ఉన్న అంత ఎత్తైన ట్రాం లో ప్రయాణించడం చాలా థ్రిల్లింగ్ గా ఉంటుంది. ట్రామ్ లోకి వెళ్లడానికి ముందు చిన్న మ్యూజియం ఉంటుంది. తిరిగి వచ్చేటప్పుడు దానిని చూడవచ్చు. మాకు సమయం ఎక్కువగా లేనందువల్ల మేము మ్యూజియం చూడ లేదు.

నేషనల్ పార్కుకు కొద్ది దూరంలో పురాతనమైన చర్చి ఉన్నది. దాని పేరు

బాసిలికా ఆఫ్ సెయింట్ లూయిస్, కింగ్ ఆఫ్ ఫ్రాన్స్. ఆయన పేరుతోనే ఆ నగరానికి సెయింట్ లూయిస్ అనే పేరు వచ్చింది. ఇది రోమన్ కాథలిక్ చర్చి. 1834 లో దీనిని ప్రారంభించారు. జోసెఫ్ లావెల్లి మరియు జార్జి మార్టిన్ అనే వారు దీని రూపశిల్పులు. 134 అడుగుల పొడుగు, 84 అడుగుల వెడల్పు, 95 అడుగుల ఎత్తుతో గ్రీకు శిల్పనిర్మాణ పద్ధతిలో ఉంటుంది.

సెయింట్ లూయిస్ నగరంలో మరో ఆకర్షణ ఆర్ట్ మ్యూజియం. మూడు అంతస్తుల భవనంలో ఉన్న ఆర్ట్ మ్యూజియం లో ప్రపంచం నలు మూలల నుంచి సేకరించిన ఎన్నో శిల్పాలు, ఆయిల్ పెయింటింగ్స్, ఆయా ప్రాంతాల సంస్కృతిని తెలియపరిచే ఎన్నో వస్తువులను ప్రదర్శనకు ఉంచారు.

మేము బస చేసిన హోటల్ ను us ప్రభుత్వం చారిత్రాత్మక ప్రదేశాలలో ఒకటిగా గుర్తించింది. అది 93 యేళ్ల నాటి భవనం అప్పట్లో స్పోర్ట్ అకాడమీ అధీనంలో ఉండేది. దేశవిదేశాల నుంచి వచ్చిన వివిధ ఆటగాళ్లకు అక్కడ వసతి ఏర్పాటు చేసేవారు. అక్కడ ఒక హాలులో అప్పటి ఆటగాళ్లకు చెందిన ఎన్నో వస్తువులను ప్రదర్శనకు ఉంచారు. మాకు తెలియకుండానే మేము ఒక ప్రశస్తమైన హోటలు గదిలో బస చేయడం ఎంతో ఆనందాన్ని కలిగించింది.