మన ఎన్నికలంటే విదేశీయులకు అంత మోజు ఎందుకో!
భారతీయ ఎన్నికల ప్రక్రియను చూసేందుకు విదేశీ పర్యాటకులు క్యూకట్టారు. ఐక్య రాజ్య సమితీ మొదలు అగ్రరాజ్యాల వరకు ఎన్నో దేశాల వారు వస్తున్నారు. ఎందుకంటే
ప్రపంచంలోనే అతి పెద్ద ప్రజాస్వామ్య దేశమైన భారత్ లో జరుగుతున్న సార్వత్రిక ఎన్నికలు ప్రపంచ దేశాల దృష్టిని ఆకర్షిస్తున్నాయి. ఐక్యరాజ్యసమితీ మొదలు అగ్రరాజ్యల వరకు ఇప్పుడు అందరి దృష్టి ప్రస్తుతం జరుగుతున్న 18వ లోక్ సభ ఎన్నికలపై పడింది. దేశంలోనే అతిపెద్ద పండువగా భావిస్తున్న ఎన్నికల్లో సుమారు 96 కోట్ల మందికి పైగా ఓటుహక్కును వినియోగించుకుంటున్నారు. ఇంత పెద్ద సంఖ్యలో ఓటర్లు ప్రజాస్వామ్య ప్రక్రియలో పాల్గొంటున్న దేశం మరొకటి లేదు. అందుకే ఇప్పుడు ఎక్కడెక్కడి వారందరూ ఇండియా వైపు చూస్తున్నారు. నిజానికిదో పర్యాటక కేంద్రంగా మారిందంటే అతిశయోక్తి కాదు. ఇప్పటి వరకు ఇండియాకు ఆధ్యాత్మిక టూరిస్ట్ కేంద్రంగా ప్రపంచ దేశాల్లో పేరుంది. ఇప్పుడు ప్రజాస్వామ్య ఎన్నిక ప్రక్రియ కూడా పర్యాటకుల్ని ఆకట్టుకుంటోంది. అసలీ ఎన్నికలు ఎలా జరుగుతున్నాయో చూద్దామని వచ్చే వారు కొందరైతే ప్రపంచంలోనే ఇంతమంచి ప్రక్రియ లేదా అని చూడడానికి వస్తున్న వారు మరికొందరు. 2019 ఎన్నికల నాటికంటే 2024లో వచ్చే ఎన్నికల టూరిస్టుల సంఖ్య పెరిగింది. 2019 సార్వత్రిక ఎన్నికలకు ప్రపంచ వ్యాప్తంగా 25వేల మందికి పైగా వచ్చినట్టు రికార్డులు తెలుపుతుంటే ఈసారి ఇప్పటికే అంటే మొదటి రెండు విడతల ఎన్నికలు పూర్తయ్యే సమయానికే 7 వేల మంది దాకా విదేశీ టూరిస్టులు వచ్చారు. మూడో దశ పోలింగ్ మే 7న జరుగనుంది. అప్పటికి మరికొన్ని వేల మంది రానున్నట్టు తెలుస్తోంది. వీళ్లందరూ వ్యక్తిగత హోదాలో వచ్చారు. వచ్చే వాళ్లందరూ భారతదేశ ఎన్నికల అపూర్వ దృశ్యాన్ని చూసి అబ్బురపడేవాళ్లు కొందరైతే మరికొందరు ఓటింగ్ సరళిని చూసి ఆశ్చర్యచకితులవుతున్నారు. పార్లమెంటుతో పాటు జరిగే వివిధ రాష్ట్రాల అసెంబ్లీ ఎన్నికల దృశ్యాన్ని కూడా కొందరు ఆసక్తి చూపుతున్నారు. దశాబ్ద కాలంగా ఈ తరహా పర్యాటకుల సంఖ్య పెరుగుతోంది.
భారత దేశ ఎన్నికల సందర్భంగా వచ్చే పర్యాటకుల్ని ఆకట్టుకోవడానికి దేశంలో పలు ఏజెన్సీలు కూడా పుట్టుకువచ్చాయి. అటువంటిలో ఒకటి గుజరాత్ టూరిజం కార్పొరేషన్ ఒకటి. ఎలక్షన్ టూరిజం ఆఫ్ ఇండియా అనే మరో సంస్థ కూడా విదేశీ పర్యాటకులకు వివిధ ప్యాకేజీల రూపంలో టూరిస్టులను ఆకట్టుకుంటోంది. వచ్చిన విదేశీ టూరిస్టులు పార్లమెంటు ఎన్నికల సందర్భంగా వివిధ నియోజకవర్గాలలో, గ్రామాల్లో, వార్డుల్లో ఏర్పాటు చేసే ప్రచార సభలను, బహిరంగ సభలను, సభల నిర్వహణకు చేస్తున్న ఏర్పాట్లను, ఆ సభల సందర్భంగా జరిగే నృత్య ప్రదర్శనలు, పాడే పాటల్ని ఆలకిస్తున్నారు. ప్రచారానికి వెళ్లే నాయకులకు పలికే స్వాగత సత్కారాలను, నృత్యాలను, సంగీత బృందాలను, వాద్యపరికరాలు వినియోగిస్తున్న తీరుపై ఆసక్తి చూపుతున్నారు. మరికొందరు విదేశీ పర్యాటకులు నేరుగా వాళ్లు ఎంచుకున్న ప్రాంతాలకు వెళ్లి వాళ్లు చూడాలనుకున్న వాటిని చూస్తున్నారు. పోలింగ్ రోజున బారులు తీరి ఉండే జనాన్ని, వాళ్లకు చేస్తున్న ఏర్పాట్లను కూడా పరిశీలిస్తున్నారు. ఓటింగ్ స్లిప్పుల పంపిణీ మొదలు ఓటు వేసి బయటకు వచ్చే వరకు ప్రతి అంశాన్ని తెలుసుకునేందుకు ప్రయత్నం చేస్తున్నారు.