'ఈ సంకల్పం' వెనక లక్ష్యం ఏమిటంటే..

అంతకుముందు ఆయన పార చేతపట్టారు. మట్టి తీసి రోడ్డుపై వేశారు. రోడ్డు రోలర్ ఎక్కారు. రోడ్డుపై పోసిన కంకర గుల్ల చదును చేశారు.రెండు నెలల్లో అంటే వచ్చే ఏడాది జనవరిలో సంక్రాంతి నాటికి చక్కటి రోడ్లు ఏర్పాటు చేయాలనే సంకల్పించారు. టీడీపీ కూటమి శ్రేణులకు కూడా అదే విషయంపై కర్తవ్య బోధ చేశారు. సీఎం చంద్రబాబు చేపట్టిన స్ఫూర్తితో అనంతపురం జిల్లా ధర్మవరంలో మంత్రి సత్యకుమార్, రాప్తాడులో ఎమ్మెల్యే పరిటాల సునీత పుట్టపర్తి సాయిబాబా చిత్రానికి పూజలు చేసిన అనంతరం రోడ్లపై గుంతలు పూడ్చే కార్యక్రమానికి శ్రీకారం చుట్టారు.

అనకాపల్లి జిల్లా వెన్నెలపాలెంలో గుంతలు లేని రోడ్లకు శంకుస్థాపన చేసిన సీఎం చంద్రబాబు. సంక్రాంతిలోపు రోడ్లపై ఉన్నటువంటి గుంతలన్నీ పూడ్చాలని ఆదేశాలు జారీ చేశారు. ఈ కార్యక్రమంలో ఆయన మాట్లాడారు.

"గత పాలకుల కారణంగా రాష్ట్రంలోని రోడ్లు నరకానికి రహదార్లు అయ్యాయి. మాజీ సీఎం జగన్ రోడ్లపై ఈత కొలనులు ఏర్పాటు చేశారు" అని సీఎం చంద్రబాబు ఎద్దేవా చేశారు. రోడ్లపై గుంతలు పూడ్చేందుకు జగన్‌కు మనసు రాలేదన్నారు. రహదారులు అభివృద్ధికి చిహ్నమని, గుంతలు లేని రోడ్లకు వెన్నలపాలెంలో శంకుస్థాపన చేశామని, రహదారులు బాగుంటే వ్యాపారాలు బాగా జరుగుతాయని తెలిపారు. సంక్రాంతిలోపు రోడ్లపై ఉన్నటువంటి గుంతలన్నీ పూడ్చాలని అధికారులను ఆదేశించారు. రాష్ట్రంలో రౌడీ రాజకీయాలు వద్దు. అభివృద్ధి రాజకీయాలు కావాలి" అని సూచించారు. 2014-19లో రహదారులు ఎలా ఉండేవో గుర్తుకు తెచ్చుకోవాలని ఆయన ప్రజలకు సూచించారు. మళ్లీ ఆ తరహా అభివృద్ధితో రాష్ట్రాన్ని ముందుకు తీసుకుపోతామని సీఎం చంద్రబాబు స్పష్టం చేశారు.

అంతకుముందు జరిగిన సభలో సత్యకుమార్ మాట్లాడుతూ, " వైసీపీ పాలనలో రాష్ట్రంలో రోడ్లు ప్రజలకు నరకాన్ని చూపించాయి" అని విమర్శించారు. ఈ పరిస్థితిని మార్చడం ద్వారా ప్రమాదాల నివారణకు ప్రభుత్వం శ్రీకారం చుట్టింద ని ఆయన తెలిపారు. జనవరి నాటికి రాష్ట్రంలో ఏ రహదారిపైనా గుంతలు కనిపించకుండా చేయాలనే లక్ష్యంతో ప్రభుత్వం పనిచేస్తోందని, అధికారులు చిత్తశుద్ధితో ఈ కార్యక్రమాన్ని పూర్తి చేయాలని కోరారు. ప్రజల సహకారం కూడా అవసరమని ఆయన విజ్ఞప్తి చేశారు.