Breaking | శ్రీకాళహస్తి: అడవిలో చిక్కుకుపోయిన యాత్రికుల బృందం..

కార్తీకసోమవారం కావడంతో శ్రీకాళహస్తి పట్టణం 23 వార్డు కొండమిట్ట ప్రాంతానికి చెందిన చిలుకా గోపి కుటుంబం బత్తినయ్య కోనకు వెళ్లింది. పెద్దకూతురు బిడ్డకు పుట్టువెంట్రుకలు తీయించే మొక్కు చెల్లించడానికి 15 మంది కుటుంబ సభ్యులు కోనకు వెళ్లారు. చిన్న కూతురు దివ్యతో కలిసి గోపి సోమవారం రాత్రి శ్రీకాళహస్తికి తిరిగి వచ్చారు. మంగళవారం మధ్యాహ్నానికి కూడా పెద్దకూతురు, అల్లుడు, పుట్టువెంట్రుకలు తీయించిన మూడేళ్ల పాప తోపాటు మిగతా వారు ఇంటికి చేరలేదు. సోమవారం ఉదయం వెళ్లిన వారంతా రాత్రికి ఆ ఆలయం సమీపంలోనే నిద్ర చేసి, మంగళవారం ఉదయం బయలుదేరి రావాలని భావించారు. సోమవారం రాత్రి ఆలయం వద్ద యాత్రికుల బృందం నిద్ర చేశారని, తుపాను కారణంగా కురుస్తున్న వర్షాల వల్ల వాగులు, వంకలు వరదనీటితో పొంగుపొర్లుతున్న పరిస్థితుల్లో ఎటు వెళ్లాలనే దిక్కు తెలియని స్థితిలో 15 మంది యాత్రికుల బృందం అడవిలోని గుట్టపైనే చిక్కుకుపోయినట్లు సమాచారం అందింది. దీంతో సెల్ ఫోన్ కూడా పనిచేయని స్థితిలో చిలుకా గోపి సీపీఐ నేత జనమాల గురవయ్యకు ఈ విషయం తెలపడంతో యాత్రికులు అడవిలో చిక్కుకుపోయిన వ్యవహారం వెలుగులోకి వచ్చింది.