రాజంపేట:చెన్నకేశవాలయంలో బ్రహ్మోత్సవాలకు సన్నాహాలు

నందలూరు వద్ద చోళరాజుల కాలంలో నిర్మించిన శ్రీసౌమ్యనాథస్వామి ఆలయ వార్షిక బ్రహ్మోత్సవాలు జూలై ఐదు నుంచి 13వ తేదీ వరకు నిర్వహించనున్నారు.

"నందలూరు శ్రీసౌమ్యనాథ స్వామి వార్షిక బ్రహ్మోత్సవాలకు జూలై నాల్గవ తేదీ, తాళ్లపాకలోని శ్రీ చెన్నకేశవ స్వామి, శ్రీ సిద్దేశ్వర స్వామి వారి ఆలయాల బ్రహ్మోత్సవాలకు జూలై ఐదో తేదీన అంకురార్పణ జరుగుతుంది" అని జేఈఓ వీరబ్రహ్మం చెప్పారు.

కడప జిల్లా రాజంపేటకు సమీపంలోని నందలూరు, తాళ్లపాక ఆలయాల వార్షిక బ్రహ్మోత్సవాలకు భక్తుల సౌకర్యార్థం విస్తృతంగా ఏర్పాట్లు చేయడానికి పరిశీలించారు. యాత్రికులకు అసౌకర్యం లేకుండా ఏర్పాట్లు చేయాలని టిటిడి జేఈవో వీరబ్రహ్మం అధికారులకు సూచించారు. వాహన సేవలలో సమయ పాలన పాటించాలని కోరారు. ఆలయ పరిసరాల్లో రోజూ పరిశుభ్రంగా ఉండేలా చర్యలు తీసుకోవాలన్నారు. భక్తులకు దర్శనం, తాగునీరు, ప్రసాదాలు పంపిణీలో ప్రత్యేక దృష్టి పెట్టాలని సూచించారు.

నందలూరు, తాళ్లపాక ఆలయాల వద్ద ఆధ్యాత్మిక వాతావరణం మరింత శోభాయమానంగా మార్చడానికి పుష్పాలంకరణ చేయాలని టిటిడి జేఈవో వీరబ్రహ్మం ఆదేశించారు. విద్యుద్దీపాలంకరణలు కూడా అదే స్థాయిలో ఉండాలని గుర్తు చేశారు. ఆ మూడు ఆలయాల్లో కల్యాణోత్సవాలకు వచ్చే యాత్రికులకు అన్ని రకాల సదుపాయాలు కల్పించాలని అధికారులను ఆదేశించారు. వాహన సేవలో భక్తులను ఆకట్టుకునేలా కళాబృందాలను ఏర్పాటు చేయాలన్నారు. బ్రహ్మోత్సవాలకు విస్తృతంగా ప్రచారం కల్పించాలని ఆదేశించారు. టిటిడి హిందూ ధర్మ ప్రచార పరిషత్, అన్నమాచార్య ప్రాజెక్టుల ఆధ్వర్యంలో ప్రతి రోజూ హరికథలు, ఆధ్యాత్మిక, భక్తి, సంగీత కార్యక్రమాలు చేపట్టాలని అధికారులకు సూచించారు.