శ్రీవారి దర్శనంలో క్షేత్ర సంప్రదాయం ఆచరించిన రాష్ట్రపతి

తిరుమల వరాహస్వామి ఆలయం నుంచి శ్రీవారి ఆలయానికి కుటుంబ సభ్యులతో కలిసి చేరుకున్న రాష్ట్రపతి ద్రౌపదీ ముర్ము టిటిడి ఛైర్మ‌న్ బీఆర్.నాయుడు, ఈఓ అనిల్ కుమార్ సింఘాల్, అదనపు ఈఓ సి.హెచ్.వెంకయ్య చౌదరి సాదరంగా అహ్వానించారు. అర్చక బృందం ఆలయ మర్యాదలతో ఇస్తికఫాల్ స్వాగతం పలికారు. ఆలయంలో ధ్వజస్తంభానికి నమస్కరించిన అనంతరం రాష్ట్రపతి ముర్ము శ్రీవారిని దర్శించుకున్నారు. ఆమె వెంట రాష్ట్ర దేవాదాయశాఖ మంత్రి ఆనం రామనారాయణరెడ్డి ఉన్నారు.

శ్రీవారి దర్శనం తరువాత రంగనాయకుల మండపంలో రాష్ట్రపతి ముర్ముకు వేదాశీర్వచనం చేశారు. ఛైర్మ‌న్‌, ఈఓమ శ్రీవారి చిత్ర పటాన్ని తీర్థప్రసాదాలను, టీటీడీ 2026 క్యాలెండర్, డైరీలను అందజేశారు. ఈ కార్యక్రమంలో టీటీడీ బోర్డు సభ్యులు పనబాక లక్ష్మి, జానకి దేవి, జీ. భానుప్రకాష్ రెడ్డి, సీవీఎస్వో మురళీకృష్ణ, తదితరులు పాల్గొన్నారు.

తిరుపతి జిల్లాలో రెండు రోజుల పర్యటన కోసం గురువారం మధ్యాహ్నం చేరుకున్నారు. తిరుచానూరు పద్మావతీ అమ్మవారి దర్శనం తరువాత రాష్ట్రపతి ద్రౌపదీ ముర్ము సాయంత్రం ఐదు గంటలకు తిరుమలకు చేరుకున్నారు. రాష్ట్ర హోం శాఖ మంత్రి వంగలపూడి అనిత, టిటిడి చైర్మన్ బి ఆర్ నాయుడు, టీటీడీ ఈవో అనిల్ కుమార్ సింఘాల్, తిరుపతి జిల్లా కలెక్టర్ డాక్టర్ వి. వెంకటేశ్వర్, ఎస్పి ఎల్ సుబ్బారాయుడు ఘన స్వాగతం పలికారు. తిరుమల పద్మావతి అతిథి గృహాల సముదాయంలో రాష్ట్రపతి ద్రౌపతి ముర్ము గురువారం రాత్రి బస చేశారు.

తిరుమల లో శ్రీవారిని దర్శించుకోవడానికి ముందు యాత్రికులు మొదట శ్రీలక్ష్మి వరాహ స్వామి ఆలయాన్ని దర్శించుకోవాలనేది స్కంద పురాణం చెబుతున్న కథనం. వరాహక్షేత్రాన్ని దర్శించుకున్న తర్వాత శ్రీవెంకటేశ్వరస్వామిని దర్శనం చేసుకుంటే తిరుమల యాత్ర పరిపూర్ణం అవుతుందనేది పురాణాలు చెబుతున్న మాట. తిరుమల శ్రీవారి ఆలయ పుష్కరిణికి ఉత్తర మాడవీధిలో తూర్పు ముఖంగా శ్రీవరాహస్వామి ఆలయం ఉంది.

తిరుమలలో శ్రీవెంకటేశ్వరస్వామి ఉండడానికి స్థలం ఇవ్వడానికి వరాహస్వామి అనుగ్రహించారు. దీంతో వరాహస్వామి తొలిదర్శనం, మొదటి అర్చన, మొదటి నివేదన జరిగినట్టు చరిత్ర చెబుతోంది. ఆ మేరకు తామ్రపత్రం (రాగి రేకు)పై శ్రీవెంకటేశ్వరస్వామి రాసి ఇచ్చారు. బ్రహ్మలిపిలో ఉండే ఆ శాసనం (రాగి రేకు) ఇప్పటికీ వరాహస్వామి ఆలయం గర్భగుడిలో ఉంది.

రాష్ట్రపతి ద్రౌపదీ ముర్ము పద్మావతి అతిథి గృహం నుంచి బయలుదేరిన కాన్వాయ్ తిరుమల రాంబగీచా అతిథి గృహాల సముదాయం సమూహంలోని వాహన మండపం వద్దకు చేరుకుంది. దూరంగా నిలబడి చూస్తున్న యాత్రికులకు ముకుళిత హస్తాలతో నమస్కరిస్తూ వాహనం నుంచి కిందికి దిగారు. అక్కడి నుంచి బ్యాటరీ వాహనంలో కూర్చున్నారు. భద్రతా సిబ్బంది కళ్లలో ఒత్తులు వేసుకుని పరిసరాలను సునిశితంగా గమనిస్తూ ఉండగా, రాష్ట్రపతి ముర్ము కూర్చొన్న బ్యాటరీ వాహనం శ్రీవారి ఆలయానికి సమీపంలోని మాడవీధిలోకి ప్రవేశించింది. అక్కడి నుంచి కుడిపక్కకు తిరిగి, భూ వరాహక్షేత్రం సమీపానికి చేరుకుంది. ఆలయం వద్ద టీటీడీ అధికారులతో పాటు పాలక మండలి చైర్మన్ బీఆర్. నాయుడు సాదరంగా ఆహ్వానించారు. ఆయన వెంట ఈఓ అనిల్ కుమార్ సింఘాల్, అధికారులు స్వాగతించారు.

శ్రీవారి ఆలయ మహద్వారం నుంచి రాష్ట్రపతి ద్రౌపదీ ముర్మును టీటీడీ పాలక మండలి చైర్మన్, సభ్యుల్లో కొందరు, అధికారులు ఆలయంలోకి తోడ్కొని వెళ్లారు. ధ్వజస్తంభం వద్ద తల ఆనించి ఆమె మొక్కారు. గరుడపటాన్ని ఆవిష్కరించే ప్రదేశంలో ఆకాశంలోకి చూస్తూ శ్రీవారిని ప్రార్థించారు. అనంతరం శ్రీవారి మూలవిరాట్టును దర్శించుకున్నారు. అక్కడ రాష్ట్రపతి ముర్ముకు వేద పండితులు స్వామివారి దర్శనం కల్పిస్తూ, వేద మంత్రాలు పఠించారు. ఆ తరువాత తలపై శఠారి ఉంచి, ఆశీర్వచనాలు ఇచ్చారు. హారతి అందుకున్న తరువాత శ్రీవారి చెంత ముకుళిత హస్తాలతో ప్రార్థిస్తూ, కొన్ని నిమిషాల పాటు గడిపిన రాష్ట్రపతి ముర్ము దేశ ప్రజల సంక్షేమం కోసం ప్రార్థించారు. అక్కడి నుంచి ఆలయంలోని రంగనాయకుల మండపానికి చేరుకున్న ఆమెకు వేదపండితులు వేదాశీర్వచనం, శ్రీవారి లడ్డు ప్రసాదాలతో పాటు తీర్థం అందించారు. జ్ణాపికను బహూకరించారు. ఈ జ్ణాపకాలను మదిలో పదిలం చేసుకున్న రాష్ట్రపతి ద్రౌపదీ ముర్ము ఆలయం వెలుపలికి వచ్చారు.