తేజోమయుడి వాహనంపై మలయప్ప విహారం

తిరుమలలో శ్రీవారి సాలకట్ల బ్రహ్మోత్సవాలు వైభవంగా జరుగుతున్నాయి. బ్రహ్మోత్సవాల్లో ఏడో రోజు మంగళవారం ఉదయం ఎనిమిది గంటలకు మలయపప్ప స్వామివారు బద్రి నారాయణుడి అలంకారంలో సూర్యప్రభ వాహనంపై భక్తులకు దర్శనమిచ్చారు.

తిరుమలలో వాహనమండపం నుంచి సూర్యప్రభ వాహనంపై మాడవీధుల్లో విహరించారు. గ్యాలరీల్లోని యాత్రికులకు దర్శనం ఇస్తూ సాగిన వాహనసేవ కనువిందు చేసింది. బద్రినారాయణుడిగా కనిపించిన స్వామివారి పల్లకీ ముందు వేదపారాయణం, జీయర్ స్వాముల గోష్ఠి వినిపించింది. స్వామివారి వాహనం ముందు భక్తజన బృందాలు చెక్కభజనలు, కోలాటాలతో స్వామివారిని కీర్తిస్తుండగా, మంగళవాయిద్యాల నడుమ స్వామివారి వాహనసేవ కోలాహలంగా జరిగింది. భక్తులు అడుగడుగునా కర్పూరహారతులు సమర్పించి స్వామివారిని దర్శించుకున్నారు.