మామ జగన్ పై తొడగొట్టనున్న రాజారెడ్డి..!

కర్నూలులో ఉల్లి సాగు చేసే రైతులకు ఆసరాగా నిలవాలని సోమవారం ఉదయం ఆమె హైదరాబాద్ నుంచి బయలుదేరారు. తల్లి షర్మిల వెంట కుమారుడు రాజారెడ్డి కూడా వచ్చారు.

హైదరాబాదులోని నివాసం నుంచి బయలుదేరడానికి ముందు అమ్మమ్మ వైఎస్. విజయమ్మ పాదాలకు వందనం చేసిన రాజారెడ్డి ఆశీర్వచనం తీసుకోవడం ద్వారా రాజకీయాల్లోకి తొలి అడుగు వేసినట్లు కనిపిస్తోంది. ఈ సన్నివేశం ప్రాధాన్యత సంతరించుకుంది. ఆ దృశ్యాన్ని చూస్తూ వైఎస్. షర్మిల కూడా అక్కడే నిలబడి ఉన్నారు.

నగరంలోని ఉల్లి మార్కెట్లో రైతులతో షర్మిలారెడ్డి మాట్లాడుతున్నారు. తల్లి వెంట వచ్చిన రాజారెడ్డి ప్రజల స్థితిగతులు గమనిస్తూ ఉన్నారు. రాజకీయ పాఠాలు నేర్పించడానికి షర్మిలారెడ్డి తన కొడుకును మొదటిసారి కార్యక్రమానికి తీసుకొని వచ్చినట్లు కనిపించింది. రైతుల సమస్యలపై షర్మిల రెడ్డి మీడియాతో మాట్లాడారు. అదే సమయంలో తన కొడుకు రాజారెడ్డి రాజకీయ ప్రవేశంపై కూడా ఆమె స్పందించారు.

పులివెందుల రాజకీయాలు దివంగత సీఎం వైఎస్ రాజశేఖర్ రెడ్డి కుటుంబం చుట్టూనే పరిభమిస్తుంటాయి. పదవుల్లో కూడా వారి కుటుంబానిది ఐక్యతరాగంగా సాగింది. వైఎస్సార్ మరణం తర్వాత పరిస్థితులు మారిపోయాయి. వైఎస్ జగన్ సొంతంగా వైసిపి ఏర్పాటు చేసుకున్నారు. అప్పటి నుంచి జగనన్న స్పందించిన బాణాన్ని అంటూ ఆయన చెల్లెలు వైఎస్. షర్మిల దూసుకుపోయారు. ఆ తర్వాత వైఎస్ వివేకానంద రెడ్డి హత్య, వైసీపీ అధికారంలోకి వచ్చిన తర్వాత కూడా పదవి దక్కని పరిణామాలు అన్నా, చెల్లెలు జగన్, షర్మిల మధ్య అగ్గి రాజుకుంది.

అన్న విబేధించిన షర్మిల సొంతంగా పార్టీ ఏర్పాటు చేసుకుని, తెలంగాణకు పరిమితమయ్యారు. బీఆర్ఎస్ ప్రధానంగా మాజీ సీఎం కేసీఆర్ పై సమరం సాగించారు. రాజకీయ పరిస్థితులు మారిన నేపథ్యంలో తెలంగాణలో కాంగ్రెస్ పార్టీ ఓటు బ్యాంకు చీలకుండా షర్మిలను కాంగ్రెస్ పార్టీలోకి తీసుకోవడం, ఏపీసీసీ బాధ్యతలు అప్పగించాలనే ఒప్పందం కుదిరింది. దీంతో..

2024 ఎన్నికలకు ముందు వైఎస్. షర్మిలారెడ్డి కాంగ్రెస్ పార్టీలో చేరారు. పీసీసీ అధ్యక్షురాలిగా బాధ్యతలు చేపట్టిన ఆమె సొంత అన్న వైఎస్ జగన్ సారథ్యం వహిస్తున్న వైసీపీకి వ్యతిరేకంగా రాష్ట్రమంతా కలియదిరిగారు. ఫలితాలు వచ్చాయా లేదా అనేది పక్కన ఉంచితే కుటుంబ కలహాలు, ఆర్థిక సంబంధమైన విషయాల్లో వైఎస్సార్ కుటుంబంలో కలతలు చెలరేగాయి. ఈ పరిస్థితుల్లో

మాజీ మంత్రి, బాబాయ్ వైఎస్. వివేకానంద రెడ్డి హత్య కేసును ప్రధాన అస్త్రంగా ప్రయోగించారు. అన్న వైఎస్. జగన్ పై బాణం ఎక్కుపెట్టారు. బాబాయ్ వైఎస్ వివేక కూతురు సునీతారెడ్డితో కలిసి కడప జిల్లాలో షర్మిలారెడ్డి విస్తృతంగా సాగించారు. ప్రచారంలో అన్న జగన్ పై మాటల తూటాలు పేల్చారు. ఆ తర్వాత కూడా ఆస్తుల పంపకం విషయంలో అన్నా చెల్లెలి మధ్య తీవ్ర అగాధం ఏర్పడింది. ఈ పరిణామాల నేపథ్యంలో వారి తల్లి వైఎస్. విజయమ్మ తన కూతురు షర్మిల వైపే నిలిచారు. కాగా, దివంగత సీఎం వైఎస్సార్ వర్ధంతి, జయంతి రోజు మాత్రమే ఇడుపులపాయలోని వైఎస్ సమాధి వద్ద కొడుకు వైఎస్. జగన్ తో విజయమ్మ కాసేపు మాట్లాడగలుగుతున్నారు. అది మినహా కుటుంబ సభ్యులందరూ కలిసిన దాఖలాలు లేవు. ఇదిలావుంటే..

వైఎస్ రాజా శేఖరరెడ్డి అంటే షర్మిలకు వల్లమాలిన ప్రేమ. ఆమెతో వైఎస్సార్ కూడా అదు అనుబంధం. తన కొడుకుకు రాజారెడ్డి అని పేరు పెట్టడం ద్వారా షర్మిల తాతపై ఉన్న మమకారాన్ని చాటుకున్నారు. అయితే, వైఎస్సార్ కుటుంబంలో చాలామంది రాజకీయాల్లో ఉన్నారు. వారిలో ys. వివేకానంద రెడ్డి తరువాత బాబాయ్ కొడుకు వైఎస్. అవినాష్ రెడ్డి కడప ఎంపీగా ఉన్నారు. అన్న జగన్ తో విభేదించిన వైఎస్ షర్మిలారెడ్డి కాంగ్రెస్ పార్టీ నుంచి ప్రధాన ప్రత్యర్థిగా మారారు. ఆస్తుల పంపకాలు, కుటుంబంలో కలతల నేపథ్యంలో తన కొడుకు రాజారెడ్డి ని కూడా రాజకీయాల్లోకి తీసుకురావడం ద్వారా అన్న జగన్ ను మరింత గట్టి దెబ్బ కొట్టాలని భావిస్తున్నట్లే కనిపిస్తోంది.

తన కొడుకు రాజారెడ్డిని పార్టీలోకి తీసుకుని రావడానికి ముందు రాజకీయంగా పాఠాలు చెప్పడానికి షర్మిలారెడ్డి ప్రత్యేక శ్రద్ధ తీసుకుంటున్నట్లు కనిపిస్తోంది. కర్నూలు నగరంలో ఉల్లి రైతులకు సంఘీభావం ఊరట కల్పించి ఓదార్చాలని బయలుదేరిన వైయస్ షర్మిల రెడ్డి తన కొడుకు రాజారెడ్డిని కూడా వెంట తీసుకుని రావడం వెనుక ప్రత్యేక కారణం ఉందనే విషయం ఆమె స్పష్టం చేశారు. ఎన్నికలకు ఇంకా మూడు సంవత్సరాలకు పైగానే గడువు ఉన్న నేపథ్యంలో ఇప్పటినుంచే తన కొడుకును రాజకీయంగా పరిణితి చెందేలా తీర్చిదిద్దాలని భావిస్తున్నట్లు రాజకీయ పరిశీలకులు అంచనా వేస్తున్నారు.

Pcc అధ్యక్షురాలు వైఎస్ షర్మిల కర్నూల్లో చేసిన వ్యాఖ్యలు కూడా ఈ విషయాన్ని స్పష్టం చేస్తున్నాయి.

"సరైన సమయంలో పార్టీలోకి తీసుకొని వస్తా" అని చెప్పడమే నిదర్శనం.