వారి చేతి స్పర్శ సోకితే శిలలకు ప్రాణం

తిరుపతి నగరం అలిపిరికి సమీప ప్రాంతం అది. రోడ్డుపై వాహనాల రోద ఎక్కువగా ఉంది. రోడ్డు పక్కనే విశాలమైన ఆవరణలో ఉన్న విగ్రహాలతో నిండిన ప్రశాంత వాతావరణం స్వాగతిస్తోంది. ఆ లోపలికి అడుగుపెట్టగానే ఎటు చూసిన దేవతామూర్తుల విగ్రహాలే. వాటిల్లో ఉట్టిపడే జీవకళ ఆధ్యాత్మిక పాఠాలు బోధించేలా ఉన్నాయి. వృత్తాకారంలోని ఆ భవనంలోని గదుల్లో నిశ్శబ్దం రాజ్యమేలుతోంది. గదిలోకి వెళితే.. మగ, ఆడ పిల్లు కనిపించారు. ఎవరు వచ్చారనేది కూడా గమనించే స్థితిలో వారు లేరు. శిక్షణలో భాగంగా సిమెంటు, పంచలోహాలు, కొయ్యపై విగ్రహాల తయారీలో కొందరు, కాన్వాస్ పై కళంకారీ బొమ్మలు వేయడంలో యువతులు నిమగ్నమై ఉన్నారు.

దేశంలో తమిళనాడు రాష్ట్రం కాంచీపురం తరువాత శిల్పకళలో తిరుపతి కేంద్రంగా మాత్రమే శిక్షణా సంస్థ ఉంది. టీటీడీ ఆధ్వర్యంలోని "శ్రీవేంకటేశ్వర సంప్రదాయ ఆలయ నిర్మాణ, శిల్ప శిక్షణ సంస్థ" రెండవది. ఈ ఆవరణలో కనిపించిన దృశ్యాల్లో విగ్రహాలు, ఔత్సాహిక శిల్పులు, శిక్షణ ఇస్తున్న వారి సృజనాత్మకత మాటల్లో వర్ణించడం సాధ్యం కాదు. ఈ సంస్థలో ఆరు రకాల శిక్షణతో పాటు శిల్పులకు ఉపాధి అవకాశాలు కూడా కల్పిస్తున్నారు. అందులో ప్రధానంగా ఆలయ నిర్మాణం, శిలా- శిల్పం, దారుశిల్పం, లోహ శిల్పం తోపాటు కలంకారీ, చిత్రలేఖన విభాగాల్లో విద్యార్థులకు శిక్షణ ఇస్తున్నారు. ఈ కాలేజీలో డిప్లమో కోర్సుకు రాష్ట్ర ప్రభుత్వ సాంకేతిక విద్య, శిక్షణ (ఎస్ బీటీఈటీ)తో పాటు న్యూఢిల్లీ ఏఐసీటీఈ అనుమతి కూడా ఉంది.