తిరుమల:కనువిందు చేసిన కార్తీక పౌర్ణమి గరుడసేవ

పౌర్ణమి తోపాటు కార్తీకమాసంలో వచ్చిన పౌర్ణమి వల్ల యాత్రికులకు తిరుమలలో కనువిందైన దర్శనం దక్కింది. పండువెన్నెల పరుచుకునే వేళ బుధవారం రాత్రి శ్రీవారి క్షేత్రంలో మలయప్ప స్వామివారి గరుడవాహనంపై విహరిస్తూ యాత్రికులకు దర్శనం ఇచ్చారు. ప్రతి నెలా పౌర్ణమి రోజు స్వామివారికి గరుడ పౌర్ణమి నిర్వహించడం ఆనవాయితీ.

శ్రీవారి బ్రహ్మోత్సవాల్లో గరుడ వాహన సేవతో సగం వంతు ఉత్సవాలు ముగిసినట్లు భావిస్తారు. ఆ రోజు తిరుమల ఆలయ మాడవీధుల్లో గరుడ వాహనంపై విహరించే స్వామివారిని దర్శించుకోవడానికి దేశ, విదేశాల నుంచి భక్తులు పోటెత్తుతారు. ఆ ఉత్సవానికి ఏమాత్రం తీసిపోని విధంగా ప్రతి నెలా పౌర్ణమి రోజు రాత్రి మలయప్పస్వామి వారికి గరుడవాహన సేవ నిర్వహించడం పరిపాటి.