తిరుమలకు దశలవారీగా డీజిల్ బస్సులకు విశ్రాంతి..!
ఏడాదిలోపు విద్యుత్ బస్సులు, ట్యాక్సీలకే అనుమతి!
తిరుమల పర్యావరణ పరిరక్షణకు ప్రాధాన్యత
మొదటి ఆర్టీసీ నుంచి ప్రారంభం
పాత వాహనాల స్థానంలో విద్యుత్ వాహనాలు
యాత్రికులకు రూ.60 అదనపు చార్జీ భారం
తిరుమల ఘాట్ రోడ్డులో వాతావరణ కాలుష్యం, శబ్ద కాలుష్యం నివారణకు ఆర్టీసీ డీజిల్ బస్సులకు దశల వారీగా స్వస్తి చెప్పనున్నారు. వాటి స్థానంలో విద్యుత్ బస్సులు నడపాలనే లక్ష్యానికి ఈ సంవత్సరంలోనే నాంది పలికారు. ఆ తరువాత ప్రయివేటు ట్యాక్సీలను తప్పించనున్నారు. మూదో దశలో ద్విచక్ర వాహనాలు కూడా అనుమతించే పరిస్థితి ఉండదు.
తిరుమలకు ఎలక్ట్రిక్ బస్సులు నడపడం వల్ల ఆర్టీసీ డీజిల్ భారం తగ్గుతుంది. యాత్రికులకు తిరుపతి నుంచి తిరుమలకు వెళ్లిరావడానికి ప్రస్తుతం ఉన్న చార్జీలో రూ.60 అదనపు భారం పడుతుంది.
"తిరుమల పవిత్రత, పర్యావరణ పరిరక్షణ" ప్రధాన లక్ష్యంగా పాత డీజిల్, పెట్రోల్ వాహనాల స్థానంలో విద్యుత్ బస్సులు వినియోగంలోకి తీసుకుని వస్తామని టిటిడి అదనపు ఈఓ సి.హెచ్. వెంకయ్య చౌదరి స్పష్టం చేశారు.
తిరుమలకు నడుపుతున్న 343 బస్సులు..
తిరుమలకు ప్రస్తుతం BS-1 తరహా బస్సుల స్థానంలో సెంట్రల్ మోటార్ ఎలక్ట్రికల్ రూల్స్ (Central Motor Electrical Rules CMER) ప్రకారం కాలుష్య రహిత వాహనాలు నడపాలనేది లక్ష్యంగా ఎంచుకున్నారు. అందులో భాగంగాలనే తిరుపతి, తిరుమల మధ్య ప్రస్తుతం ఏపీఎస్ ఆర్టీసీ 64 ఏసీ ఎలక్ట్రిక్ బస్సులు నడుపుతోంది. కొన్ని రోజుల్లోనే మరో 50 బస్సులు రోడ్డెక్కనున్నాయి. దీనికి సంబంధించి కాంట్రాక్టు కూడా కుదిరినట్లు ఆర్టీసీ వర్గాలు వెల్లడించాయి. వాటికి తోడు దశాబ్దాల కాలంగా తిరుపతి నుంచి 323 డీజిల్ బస్సులు నడుపుతోంది.
తిరుమలకు మొదటి దశలో డీజిల్, పెట్రోల్ రహిత బస్సులు నడపాలనే లక్ష్యంలో భాగంగా ఇటీవల నిర్వహించిన సమీక్షలో కేంద్ర రహదారుల మంత్రిత్వ శాఖ సీనియర్ కన్సల్టెంట్ కునాల్ జోషి టీటీడీ అధికారులతో భేటీ అయ్యారు.
"తిరుమలకు పూర్తిగా ఎలక్ట్రిక్ బస్సులు నడపడానికి సమగ్ర నివేదిక అందించండి" అని టీటీడీ, ఆర్టీసీ అధికారులకు కునాల్ జోషి స్పష్టమైన సూచనలు జారీ చేశారు.
డిసెంబర్ బోర్డు మీటింగ్ లో చర్చ
తిరుమలను కాలుష్య రహిత పుణ్యక్షేత్రంగా తీర్చిదిద్దడానికి ముఖ్యమంత్రి నారా చంద్రబాబు సూచనల మేరకు ఇప్పటికే అనేక చర్యలు తీసుకున్నట్లు టిటిడి అదనపు ఈఓ సి.హెచ్. వెంకయ్య చౌదరి తెలిపారు. మొదట తిరుపతి–తిరుమల మధ్య పూర్తి స్థాయిలో విద్యుత్ బస్సులు ప్రవేశపెట్టాలని యోచిస్తున్నాం ఆయన తెలిపారు.
"ఆర్టీసీ డీజిల్ బస్సుల స్థానంలో ఎలక్ట్రికల్ వాహనాలను అందుబాటులోకి తీసుకుని వస్తాం. రానున్న రోజుల్లో దశలవారీగా తిరుమలలో ట్యాక్సీలు, ఇతర అద్దె వాహనాలను కూడా తప్పిస్తాం. ద్విచక్రవాహనాలు కూడా విద్యుత్ తో నడిచే వాటినే అనుమతిస్తాం" అని వెంకయ్య చౌదరి స్పష్టం చేశారు. రానున్న టిటిడి బోర్డు సమావేశంలో చర్చించి, తగిన నిర్ణయాలు తీసుకోనున్నట్లు అదనపు ఈఓ వెంకయ్యచౌదరి వెల్లడించారు.
తిరుమలకు 300 ఎలక్ట్రిక్ బస్సులు
తిరుమలలో కాలుష్య నివారణకు కోసం 300 ఎలక్ట్రిక్ బస్సులు ఇవ్వడానికి కేంద్రప్రభుత్వం ఈ సంవత్సరం జూన్ నెలలోనే సుముఖత వ్యక్తం చేసిన విషయం తెలిసిందే. రాష్ట్రానికి అందించే 750 బస్సుల్లో సగం వంతు తిరుమలకు కేటాయించడానికి కార్యాచరణ సిద్ధం చేశారు. ప్రస్తుతం తిరుపతి, తిరుమల మధ్య ఏపీఎస్ ఆర్టీసీ 64 ఏసీ ఎలక్ట్రిక్ బస్సులు నడుపుతున్నారు. మరో 36 ఎలక్ట్రిక్ బస్సులు తిరుపతి నుంచి కడప, నెల్లూరు, మదనపల్లె మధ్య నడుపుతున్నారు. వాటికి తోడుగా త్వరలో మరో 50 ఎలక్ట్రిక్ బస్సులు కూడా అందుబాటులోకి రానున్నట్లు ఏపీఎస్ఆర్టీసీ అధికారుల ద్వారా తెలిసిన సమాచారం.
బస్సుచార్జీలో తేడా..
తిరుపతి నుంచి రోజూ తిరుమలకు 335 ఆర్టీసీ బస్సులు నడుపుతున్నారు. రోజుకు 1,350 ట్రిప్పులు నడుపుతున్నారు. బ్రహ్మోత్సవాల్లో మరో 50 బస్సులు అదనంగా నడుపుతుంటారు. 19 కిలోమీటర్లు ఘాట్ రోడ్డులో ప్రయాణానికి సప్తగిరి ఎక్స్ ప్రెస్ బస్సులో ఓ ప్రయాణికుడి నుంచి రూ.90 రూపాయలు చార్జీ. తిరుమల నుంచి కూడా అంతే చార్జీ ఉంటుంది. అయితే, తిరుపతి లేదా తిరుమలలోనే రిటర్న్ టికెట్ తీసుకుంటే మొత్తం రూ. 160 టికెట్టులో రూ. 20 రూపాయలు తగ్గుతుంది.
తిరుమలకు ప్రయాణించే ఏసీ ఎలక్ట్రిక్ బస్సుల్లో ఒకో యాత్రికుడి నుంచి రూ. 110 చార్జీ వసూలు చేస్తున్నారు. అంటే తిరుమలకు వెళ్లి రావడానికి ఒకో ప్రయాణికుడు రూ.220 చార్జీ చెల్లించాలి.
ఎలక్ట్రిక్ బస్సులే ఉండాలని...
తిరుపతి, తిరుమల మధ్య ఏసీ ఎలక్ట్రిక్ బస్సులు నడపాలనే ప్రతిపాదన ఈ ఏడాది ఆరంభం నుంచే ప్రారంభమైంది. టీడీపీ కూటమి అధికారంలోకి వచ్చిన తరువాత కాలుష్య నివారణ ద్వారా పర్యావరణ పరిరక్షణకు గ్రీన్ ఎనర్జీ వాహనాలు, విద్యుత్ ఉత్పత్తికి ప్రాధాన్యత ఇస్తున్నారు. ప్రస్తుతం నడుస్తున్న ఆర్టీసీ బస్సుల స్థానంలో పూర్తిగా ఎలక్ట్రిక్ వాహనాలు అందుబాటులో తీసుకుని రావడానికి కసరత్తు ముమ్మరం చేశారు.
ఈ సంవత్సరం చివరి లోపు పాత ఆర్టీసీ బస్సుల స్థానంలో ప్రస్తుతం ఉన్న 67 ఎలక్ట్రిక్ బస్సులకు అదనంగా మరో 50, ఆ తరువాత మరో వంద బస్సులు వచ్చే అవకాశం ఉంది. నూతన సంవత్సరంలో దశలవారీగా ప్రయివేటు వాహనాలకు తిరుమల నుంచి పూర్తిగా తొలగించే అవకాశం ఉన్నట్లు తెలుస్తోంది. ప్రయివేటు టాక్సీలు కూడా ఎలక్ట్రిక్ వాహనాల వైపు మొగ్గు చూపక తప్పనిసరి వాతావరణం కనిపిస్తోంది.
తిరుమలలో ప్రయివేటు ట్యాక్సీలు కూడా తప్పిస్తామని టీటీడీ అధికారులు చెబుతున్నారు. వాటి స్థానంలో ఎలక్ట్రిక్ వాహనాలు మాత్రమే అనుమతించే విధంగా యజమానులకు తెలియజేస్తామని కూడా చెబుతున్నారు.
తిరుమలలో ట్యాక్సీల రద్దీ..
తిరుమలలో ప్రస్తుతం సుమారు రెండు వేలకు పైగానే ప్రయివేటు ట్యాక్సీలు, జీపులు నడుపుతున్నారు. పాయింట్ టు పాయింట్ నడిపే వాహనాలు కొన్ని ఉంటే, తిరుమల పరిసర ప్రాంతాల్లో ఉన్న శ్రీవారి పాదాలు, పాపవినాశనం, ఆకాశగంగ, శిలాతోరణం తదితర ప్రదేశాలకు నడిపే జీపుల సంఖ్య కూడా వెయ్యికి తక్కువ లేవు. ఆ వాహనాలు కూడా ఏడాది లోపు ఖాళీ చేయించడానికి టీటీడీ అధికారులు కార్యాచరణ సిద్ధం చేస్తున్నట్లు సమాచారం.
Next Story