'సీమ'ను వణికిస్తున్న 'దిత్వా' తుపాను..

తిరుపతి, నెల్లూరు జిల్లాల్లో ఉన్న తీరప్రాంతల వద్ద అధికారులు గట్టి నిఘా ఏర్పాటు చేశారు. జాలర్లు చేపలవేటకు వెళ్లవద్దని హెచ్చరికలు జారీ చేశారు. ఆ జిల్లాల తోపాటు చిత్తూరు, అన్నమయ్య జిల్లాల్లో కూడా తహసీల్దార్లను అప్రమత్తం చేసిన కలెక్టర్లు ప్రత్యేకంగా కంట్రోల్ రూంలు కూడా ఏర్పాటు చేశారు. అత్యవసర పరిస్థితి ఏర్పడితే సమాచారం అందించాలని కూడా సూచించారు.

నైరుతీ బంగాళాఖాతంలో శ్రీలంకను దాటిన దిత్వా తుపాను రాష్ట్రంవైపు శరవేగంగా దూసుకుని వస్తున్నట్లు వాతారణ శాఖ హెచ్చరించింది. రాష్ట్రంలోని కోస్తా తీరంవైపు గంటకు ఏడు కిలోమీటర్ల వేగంగా ప్రయాణిస్తున్నట్లు వాతావరణ శాఖ వెల్లడించింది.

దిత్వా తుపాను ప్రస్తుతం తమిళనాడులోని కారైకాల్ పట్టణానికి 100 కిలోమీటర్లు, పుదుచ్చేరికి 110 కిలోమీటర్లు, చెన్నైకి 180 కిలోమీటర్ల దూరంలో కేంద్రీకృతం కేంద్రీకృతమై ఉన్నట్లు విపత్తుల సంస్థ ఎండీ ప్రఖర్ జైన్ వెల్లడించారు.

"గడిచిన ఆరు గంటల్లో దిత్వా తుపాను 12 కిలోమీటర్ల వేగంతో కదిలిన తుపాన్ 24 గంటల్లో ఉత్తర తమిళనాడు- పుదుచ్చేరి తీరాలకు సమాంతరంగా కదిలే అవకాశం ఉంది" అని విపత్తుల సంస్థ ఎండీ ప్రఖర్ జైన్ విశ్లేషించారు. దీనిప్రభావం వల్ల ప్రకాశం, నెల్లూరు, తిరుపతి జిల్లాల్లో ప్రజలు మరింత అప్రమత్తంగా ఉండాలని కూడా ఆయన హెచ్చరించారు.

రాయలసీమలోని చిత్తూరు, కడప తరువాత తీరప్రాంతానికి సమీపంలో ఉన్ననెల్లూరు జిల్లాలో కలెక్టర్లు ముందస్తు జాగ్రత్తలు తీసుకున్నారు.

నెల్లూరు జిల్లాకు ఆరెంజ్ అలెర్ట్ జారీ చేశారు చిత్తూరు, తిరుపతి జిల్లాలకు రెడ్ అలర్ట్ హెచ్చరికలు జారీ చేశారు. ముందుజాగ్రత్తగా తిరుపతి జిల్లాలోని అన్ని విద్య సంస్థలకు కలెక్టర్ డాక్టర్ వి. వెంకటేశ్వర్ సోమవారం సెలవు ప్రకటించారు. కడప జిల్లాలో కూడా భారీ వర్షాలు కురిసే అవకాశం ఉన్నట్లు అధికారులు తెలిపారు.

దిత్వా తుపాను వల్ల నెల్లూరు, చిత్తూరు, తిరుపతి జిల్లాల్లో భారీ నుంచి అత్యంత భారీ వర్షాలు కురిసే అవకాశం ఉన్నట్లు వాతావరణ శాఖ హెచ్చరించింది. ప్రకాశం, కడప, అన్నమయ్య జిల్లాలకు ఆరంజ్ అలర్ట్ జారీ అయింది. దీనివల్ల రాయలసీమలోని అనంతపురం, సత్యసాయి, కర్నూలు, నంద్యాల, పల్నాడు, బాపట్ల, గుంటూరు జిల్లాలో భారీ వర్షాలు కురిసే అవకాశం ఉన్నట్లు అంచనా వేశారు. తుపాను ప్రభావం వల్ల సముద్రతీరం వెంబడి 80 కిలోమీటర్ల వేగంతో ఈదురుగాలులు వీచే అవకాశం ఉన్నట్లు హెచ్చరికలు జారీ అయ్యాయి.

తుపాను కారణంగా కురిసే వర్షాలతో పంటల నష్టం తగ్గించడానికి ముందు జాగ్రత్తలు తీసుకోవాలని చిత్తూరు జిల్లా వ్యవసాయ శాఖాధికారి జె. మురళీకృష్ణ ప్రత్యేక సూచనలు చేశారు. వరి, వేరుశనగ పొలాల్లో నీరు నిలవకుంగా జాగ్రత్తలు పాటించడంతో పాటు, తుపాను ప్రభావం తగ్గిన తరువాత ఎరువులు వాడకాన్ని కూడా ఆయన సూచనలు చేశారు.

దిత్వా తుపాను నేపథ్యంలో రాష్ట్ర ప్రభుత్వ ప్రధాన కార్యదర్శి విజయానంద్, రాష్ట్ర హోం శాఖ మంత్రి వంగలపూడి అనిత వేర్వేరురు రాయలసీమ, నెల్లూరు జిల్లా కలెక్టర్లతో సమీక్షించడం ద్వారా అప్రమత్తం చేశారు.

తిరుపతి జిల్లాలో సూళ్లూరుపేట, గూడూరు నియోజకవర్గాల్లోని సముద్రతీర ప్రాంతాల్లో ప్రత్యేక చర్యలు తీసుకున్నట్లు తిరుపతి జిల్లా కలెక్టర్ డాక్టర్ వి. వెంకటేశ్వర్ చెప్పారు.

"ఈ ప్రాంతాల నుంచి జాలర్లు సముద్రంలోకి చేపలవేటకు వెళ్లవద్దు" అని కలెక్టర్ వెంకటేశ్వర్ మత్స్యకారులకు హెచ్చరికలు జారీ చేశారు. ఏమార్చడానికి కూడా వీల్లేగుండా రెవెన్యూ అధికారులు, సిబ్బందితో నిఘా ఉంచాం అని కూడా ఆయన తెలిపారు.

అన్నమయ్య జిల్లాలోని ప్రభుత్వ, ప్రైవేటు పాఠశాలలకు రేపు సోమవారం సెలవు ప్రకటించారు. వర్షాలు, నీటిముంపు పరిస్థితులను దృష్టిలో ఉంచుకొని విద్యార్థులు కుంటలు, కాలువలు, చెరువులు, పాడుబడ్డ గోడల వద్దకు వెళ్లకుండా జాగ్రత్తలు తీసుకోవాలని తల్లిదండ్రులను డీఈఓ డాక్టర్ కె. సుబ్రహ్మణ్యం సూచించారు.

దిత్వా తుపాను ప్రభావం చిత్తూరు జిల్లాపై ఆదివారం ఉదయం నుంచి స్వల్పంగా ప్రభావం చూపుతోంది. జిల్లాలోని పులిచర్ల మండలంలో ఉదయం ఎనిమిది గంటల నుంచి మూడు దశల్లో నమోదైన వర్షం పాతం 12.8 మిల్లీమీటర్లు, సోమలలో 10.4, రొంపిచర్లలో 8.2 మిల్లీమీటర్లుగా వర్షపాతం నమోదైంది. ఆదివారం ఉదయం నుంచి కురిసిన వర్షపాతం కూడా ఎక్కువగానే ఉంది.

ఉమ్మడి అనంతరం జిల్లాలోని శ్రీసత్యసాయి జిల్లా పుట్టపర్తిలో కూడా మొత్తం 32 మండలాల్లో 27.2 మిల్లీమీటర్ల వర్షపాతం నమోదైంది. అందులో నంబూలకుంటలో 7.6, అమడగూరు మండలంలో 5.4 మిల్లీమీటర్ల వర్షపాతం నమోదైంది. ఇంకా తేలికపాటి వర్షాలు కురుస్తున్నాయని ఆ జిల్ల అధికారుల ద్వారా తెలిసింది.

తిరుమల శ్రీవారి దర్శనానికి వెళ్లని యాత్రికులను దిత్వా తుపాను వణికిస్తోంది. ఒకపక్క కురుస్తున్న వర్షాలు, మంచుదుప్పటి ముసుగేసిన స్థితిలో ఈదురుగాలులు వణిస్తున్నాయి. దీంతో పిల్లలు, వృద్ధులు ఇబ్బంది పడుతున్నారు. తిరుమల రెండు ఘట్ రోడ్లలో ప్రమాదాలకు ఆస్కారం లేకుండా టీటీడీ అధికారులు ప్రత్యేకంగా దృష్టిసారించారు. ఘాట్ రోడ్డులో కొండచెరియలు విరిగి పడే ప్రమాదం ఉన్నందున వాహనదారులు జాగ్రత్తలు పాటించాలని సూచించారు.