Andhra Prabha | ఆంధ్రప్రభ' యాజమాన్యానికి రూ. 55 వేలు జరిమానా

ఈ కేసు జడ్జిమెంట్ కాపీలు మంగళవారం అందినట్లు జర్నలిస్టు గణపతిరావు తెలిపారు. తనకు జరిగిన అన్యాయంపై 2023లో కేసు దాఖలు చేశానని, సరిగ్గా 19 నెలల తరువాత తీర్పు వచ్చిందని ఆయన చెప్పారు. ఈ కేసు వివరాల్లోకి వెళితే..

దివంగత రాంనాథ్ గోయంకా నిర్వహణలో ఉన్న సమయంలో ఇండియన్ ఎక్స్ ప్రెస్ (INDIAN EXPRESS) పబ్లికేషన్స్ గ్రూప్ లోని ఆంధ్రప్రభ దినపత్రికలో విజయవాడకు చెందిన పొలమరశెట్టి గణపతిరావు జర్నలిస్టుగా పనిచేశారు. ఆ యాజమాన్యం మారిన తరువాత కూడా గణపతిరావు 2022 వరకు జర్నలిస్టుగా పనిచేశారు. అంటే దాదాపు 29 ఏళ్లు ఆయన పనిచేశారు. అయితే తన వేతనం నుంచి మినహాయించిన పీఎఫ్ మొత్తాన్ని ఆ సంస్థకు జమ చేయలేదు. దీంతో తాను ఆర్థిక ఇబ్బండితో మానసికంగా వేదకు గురవుతున్నానంటూ, గణపతిరావు విజయవాడలోని కృష్ణా జిల్లా వినియోగదారుల కోర్టులో కేసు దాఖలు చేశారు.

ఈ పిటిషన్ ను విచారించిన వినియోగదారుల న్యాయస్థానం అధ్యక్షులు నేలపూడి చిరంజీవి, సభ్యులు ఎవి. రమణ, కంభంపాటి శశికళ తీర్పు వెలువరించారు.

"పాత్రికేయుడి జీతం నుంచి ప్రావిడెంట్ ఫండ్ నిమిత్తం మినహాయించిన 1,23,048 మొత్తానికి అంతే మొత్తం కలిపి ఆంధ్రప్రభ యాజమాన్యం నుంచి వసూలు చేయండి" అని తీర్పు చెబుతూ, హైదరాబాద్ పీఎఫ్ కమిషనర్ ను ఆదేశించారు. అంతేకాకుండా, 50వేల జరిమానా, కోర్టు ఖర్చుల నిమిత్తం ఐదు వేలు, ఆరు శాతం వడ్డీ తోసహా చెల్లించాలని కూడా కోర్టు తీర్పులో పేర్కొంది. ఈ తీర్పుపై ఉద్యోగులు, మాజీ ఉద్యోగులు హర్షం వ్యక్తం చేస్తున్నారు.

"తీర్పే ఆలస్యం కావచ్చేమో. కోర్టులో న్యాయం జరుగుతుంది" అని జర్నలిస్టు గణపతిరావు వ్యాఖ్యానించారు. తీర్పు వెలువడిన తరువాత ఆయన 'ఫెడరల్ ఆంధ్రప్రదేశ్' ప్రతినిధితో మాట్లాడారు.