తిరుమల పెద్దపండుగకు 3,500 శ్రీవారి సేవకులు

గత ఏడాదితో పోలిస్తే, యాత్రికుల సంఖ్య గణనీయంగా పెరిగే అవకాశం ఉన్నట్లు టీటీడీ అధికారులు అంచనా వేస్తున్నారు. యాత్రికులకు ఇబ్బంది లేకుండా శ్రీవారి సేవకుల సంఖ్య 3,500 మందిని సిద్ధం చేయాలని ఈఓ అనిల్ కుమార్ సింఘాల్ స్పష్టమైన ఆదేశాలు ఇచ్చారు. గత ఏడాది బ్రహ్మోత్సవాలకు వెయ్యి మంది సేవకులను వినియోగించుకున్నారు.

తిరుమలలో ఈ నెల 23వ తేదీ రాత్రి శ్రీవారి బ్రహ్మోత్సవాలకు అంకురార్పణ జరుగుతుంది. 24వ తేదీ రాత్రి పెదశేషవాహనంతో ఉత్సవాలు ప్రారంభం అవుతాయి. అదే రోజు సాయంత్రం సీఎం నారా చంద్రబాబు రాష్ట్ర ప్రభుత్వం పక్షాన తిరుమల శ్రీవేంకటేశ్వరస్వామివారికి పట్టువస్త్రాలు సమర్పించనున్నారు. అక్బోబర్ రెండో తేదీ చక్రస్నానంతో బ్రహ్మోత్సవాలు ముగుస్తాయి. ఇదిలాఉండగా,

తిరుమలలో బ్రహ్మోత్సవాలకు రెండు నెలల కిందటి నుంచే సన్నాహాలు ప్రారంభం అయ్యాయి. గత ఏడాది ఉత్సవాలు విజయవంతం నిర్వహించడంలో అప్పటి ఈఓ జే. శ్యామలరావు అధికారులు, సిబ్బందిని సమన్వయం చేశారు. ఆ అనుభవంతో ఏర్పాట్లకు సమీక్షలు సాగించిన శ్యామలరావు కొన్ని రోజుల కిందట బదిలీ అయ్యారు.

టీటీడీ ఈఓగా బాధ్యతలు చేపట్టిన అనిల్ కుమార్ సింఘాల్ బ్రహ్మోత్సవాలను విజయవంతం చేయడానికి రంగంలోకి దిగారు.

"ఉభయ దేవేరులతో మలయప్ప స్వామి విహరించే సందర్భంలో దర్శనం కోసం గ్యాలరీల్లో నిరీక్షించే యాత్రికులకు ఇబ్బందులు లేకుండా ప్రత్యేక ఏర్పాట్లు చేయండి. సీనియర్ అధికారులకు బాధ్యతలు అప్పగించండి" అని ఈఓ అనిల్ కుమార్ సింఘాల్ ప్రత్యేక ఆదేశాలు జారీ చేశారు.